SUPLEMEN PA MAMRE GBKP TGL. 20 - 26 AGUSTUS 2023

Pdt. Larena Sinuhadji (Nd. ReyRapha Tarigan)

Teks : Ulangen 15:4-11

Tema : ERDIATE RAS ERPEME

Tujuan : Gelah Mamre

- Meteh maka kegeluhen bangsa Israel enggo ipasu-pasu Dibata ras jadi pasu-pasu man kalak si deban

- Ngasup jadi bapa si erdiate ras erpemere

Pengantar 

Tema i bas bahan PA Mamre sekali enda dalam rangka HUT Mamre pe-28-ken merupaken Motto Mamre GBKP. Mekatep pernyataan si enggo biasa sibegi, menjadi slogan semata, enggo kurang imaknai. Maka sekali enda mulihi Mamre ipersingeti, tugas mbelin selaku bapa i tengah keluarga, i tengah gereja, bage pe masyarakat, maka kehadiren Mamre GBKP arus lit nilai lebihna eme i bas nehken kekelengen, erpemere ras erdiate. Bahkan jelas, guna nehken kekelengen, erpemere ras erdiate la perlu itimai bayak materi lebe. Sabab guna banci kita erpemere ras erdiate palasna si utama eme kekelengen, kemurahan hati. Sebab melala siidah kalak bayak secara materi tapi pelitna la tanggung. Ula lebe man kalak si deban, man keluargana pe ia perhitungen. Berbeda ras Perp. Makedoni, si secara finansial musil tapi ukurna e i bas nehken kekelengen luar biasa. Bagi si itulisken Paulus bas 1 Kor. 8:2-4, “Perpulungen-perpulungen e enggo iuji alu mesangat alu kiniseran-kiniseran si inanamina. Tapi keriahenna si simpar dingen kemusilenna si la teralang e erbahanca ia melumbar mere, tempa-tempa ia bayak. Pang aku ngatakenca, maka perpulungen e enggo mere asa ngasupna -- lebih nge pe asa ngasupna -- alu ukurna ersuruh. Alu meseksek ipindokenna man kami gelah ibereken kesempaten man bana guna ikut muat bagin i bas nampati kalak Kristen si i Judea.”

Emaka i bas bahan PA Mamre minggu enda pe ras-ras kita erlajar arah firman Tuhan kitab Ul. 15:4-11, maka Tuhan enggo masu-masu kegeluhen bangsa Israel, ibenaken i bas bangsa budak nari, idilo Tuhan jadi umatNa, si enggo ibebaskenNa ras ipasu-pasuNa.  Tuhan mereken persinget, pengajaren maka kekelengen Tuhan si enggo ialoken bangsa enda arus ibagikenNa man kalak si deban.

Penjelasen Teks

Tahun Sabat (Ibrani : shmita; pelepasan) Sabbath Year atau Sabbatical Year adalah tahun ke tujuh dari siklus tahun agrikultural yang diperintahkan Tuhan untuk dijalankan bangsa Israel ketika sudah sampai di Kanaan. Selama tahun shmita, tanah harus dibiarkan tidak ditaburi atau ditanami, menjadi masa perhentian penuh dari kegiatan pertanian. Kerina aktivitas cocok tanam, bagi pesikap taneh (membajak), nuan, mere pupuk, ilarang hukum Yahudi (halakha). Bage pe kerina buah-buahna si turah sendiri ianggap sebage hefker (tidak bertuan) ras la banci ibuat kerina kalak. Kerina utang, kecuali bangsa asing, arus imasapken.

Secara khusus i bas perikopta, Ulangen 11, si ibere judul “Tahun Pepituken” (terj. TB-LAI “Tahun penghapusan hutang”) eme perentah Tuhan man banga Israel gelah i bas tep-tep ujung tahun pepituken bangsa enda arus nasapken utang kalak si rutang man bana kecuali kalak pertandang. Bage pe bangsa enda arus empati, peduli, man kalak si deban sesama bangsa Israel, la banci nggeluh erbana-bana. Alasenna jelas, bangsa enda enggo ipasu-pasu Tuhan.

Tuhan si enggo masu-masu bangsa enda, maka enggo sepantasna bangsa enda pe jadi pasu-pasu man kalak si deban i tengah-tengah bangsana secara khusus. Ay. 4, “Tuhan si masu-masu kam i negeri si iberekenNa man bandu, emaka sada pe la lit kam kalak musil” (terj. TB-LAI, “Maka tidak akan ada orang miskin di antaramu, sebab sungguh TUHAN akan memberkati engkau di negeri yang diberikan TUHAN, Allahmu, kepadamu untuk menjadi milik pusaka.” Dari bangsa budak menjadi bangsa merdeka dan diberkati Tuhan, tidak ada yang miskin dan akan tetap diberkati Tuhan di tanah Kanaan, yang sebentar lagi mereka akan masuki”). Eme si arus tetap iinget ras njemba bangsa Israel guna nehken kekelengen man sekelewetna.

Perbahanen konkrit dalam rangka mediate man kalak si deban si arus ilakoken rikutken perikopta eme mereken pinjamen kalak si musil ras kekurangen (ay. 6-10). 
Ay. 6 mereken pinjamen duit man melala bangsa-bangsa si deban, tapi bangsa Israel sendiri la perlu minjam i bas bangsa si apai nari pe (bhs. Ind., “Apabila Tuhan Allah memberkati engkau seperti yang dijanjikanNya kepadamu, maka engkau akan memberi pinjaman kepada banyak bangsa, tetapi engkau sendiri tidak akan meminta pinjaman”).

Bahkan adi lit sapih-sapih bangsa Israel si kekurangen, la banci kalak si enggo ipasu-pasu Tuhan nggeluh erbana-bana, arus isampati. Melumbar mere dingen berelah pinjamen asa si iperlukenna - termasuk rikutken gegehta ka. Enggo pe ndeher tahun nasapken utang (banci jadi la nari banci iulihkenna senta ndai - sabab adi enggo seh tahun nasapken utang eme tahun pepituken, utangna siputihken), e pe tetap sibereken guna mpenahagi bebanna si mberat. Adi la kita nggit nampati temanta ndai, Tuhan jadi imbangta sabab geluhta enggo ipasu-pasuNa. Erlebuh kalak si butuh pertolongen ndai man Tuhan, maka ipersalahken Tuhan kita. Berekenlah alu melumbar ras keriahen ukur gelah tetap ipasu-pasu Tuhan i bas kerina si idahiken bangsa enda. Kai si ilumbaken man bangsa Israel, mulihi ipertegas i bas Padan Si Mbaru arah teologi Paulus, asum Paulus mpersingeti kalak Korinti si secara finasial bayak (1 Kor. 9:7, “Sekalak-sekalak iberekennalah sue ras si enggo itetapkenna i bas ukurna, ola alu pusuh jungut-jungut entah pe bagi terpaksa, sabab Dibata ngkelengi kalak si mere alu ukur meriah”). Kalak musil dingen kekurangen lit nge rusur i tengah kalak Israel, emaka ula tutup matanta terlebih tertutup pusuhta guna penahangi beban si mberat i bas ia. Perentah Tuhan melumbarlah mere man bana (ay. 7-10).

Adi bangsa Israel tetap ngikutken Tuhan dingen alu tutus ngelakoken kasa kai si iperentahken Tuhan maka Tuhan tetap masu-masu bangsa enda rikutken si ipadanken Tuhan pe isehkenNa i bas waktuNa. Si penting kesetiaan ernalem man Tuhan ras ketaaten ndalanken perentahNa.

Versi Audio Silahkan Klik : https://www.youtube.com/watch?v=XBFkmuvOxZ8

Aplikasi

Selamat HUT Mamre pe-28 tahun-ken i bas tahun enda. Momen ulang tahun biasa ipake guna ngataken bujur man Tuhan sabab Tuhan tetap masu-masu kegeluhenta secara khusus Mamre GBKP si genduari ulang tahun 28 tahun. Momen ulang tahun pe biasa ipake guna berefleksi, kai si sedekah enda silakoken ras kai nari si bakal silakoken ku wari-wari seterusna gelah geluh si enggo ibereken Tuhan banta tetap geluh si erguna. Kai nari si perlu man pekenan i bas geluhta.

Sada lebe, tetap ngataken bujur man Tuhan. Bersyukur, bersyukur dan bersyukur. Ngataken bujur kita man Tuhan, sabab geluhta, rikut kai pe si lit bas kita labo erkiteken gegeh beluhta semata tapi erkiteken Tuhan. La lit sekalak pe Mamre si meganjang rukur bahkan erpengakap maka si lit bas ia erkiteken gegehna jine, tapi perkuah ate Tuhan. Jadilah Mamre si meteruk ukur.

Si peduaken, pengataken bujurta man Tuhan arus sicidahken alu Mamre tetap erdiate ras erpemere. Motto "Mamre Erpemere Mamre Erdiate" arus ikonkritken alu erbage perbahanen si mehuli subuk secara pribadi bage pe institusi kelembagaan Mamre. Secara kelembagaan, enggo mbue perbahanen si nyata ilakoken Mamre. Umpamana nampati beasiswa man siswa ras mahasiswa anak GBKP si berprestasi tapi secara finansial kurang. Beasiswa man kalak si kurang mampu. Mereken modal usaha man anggota Mamre si secara ekonomi kurang guna modal usahana, mereken seminar-seminar si berkaitan ras kiat membangun usaha era digital, rsd. Bage pe secara pribadi mbue hal konkrit si enggo ilakoken ras terus-menerus akan ilakoken. Mereken infomasi pekerjaan man PERMATA bage pe Mamre si membutuhken, mere senyuman, mere motivasi bahkan mereken pinjamen man Sn./Tr. si terteki. Sabab lit ka kalak minjam labo guna membangun usaha tapi guna hal-hal si sifatna konsumtif. Dahin nehken kekelengen labo pernah lit kata finish (selesai), tapi arus terus-menerus silakoken, sabab jelas firman Tuhan ndai mpersingeti kita, kalak musil dingen kekurangen lit lalap i sekelewetta. Asa gegeh, kengasupen rikutken keriahen ukurta sisampati kekelengenta si sangana butuh pertolongen bas kita nari. Mekatep si terjadi, mbue kita kari disukusi, panjang lebar, seh ku tantangen, rintangen. Lit ka si ngerana, “Enggo isampati, labo ka ngataken bujur, malah isalahkenna kita.” Piah dungna tantangen e erbahanca kita mundur guna nampati, guna erbahan si mehuli. Si terjadi PA Mamre enggo dung, ndekah diskusi, saling mereken pendapat ras berdebat, tapi bukti konkrit guna erdiate ras erpemere tetap denga bas wacana. Mulailah dari diri sendiri, mulai dari hal kecil, mulailah guna peduli, empati man kalak i sekelewetta si membutuhken penampat i bas kita nari.