SUPLEMEN PA MAMRE GBKP TGL. 6 - 12 AGUSTUS 2023

Pdt. Larena br. Sinuhadji (Nd. ReyRapha Tarigan)

Teks : Epesus 2:19-22

Tema : KELUARGA DIBATA

Tujun : Gelah Mamre :

- Meteh maka kerina ngawan perpulungen GBKP eme anggota keluarga Dibata

- Muat bagin i bas kerina dahin-dahin gereja

Penaruh

Mungkin pernah sibegi gelar MBE entah pe “Member of the British Empire” eme gelar kehormaten Kerajaan Inggris si ibereken Ratu entah Raja Inggris man kalak si berjasa i bas bidangna. Man kalak si ngaloken gelar MBE enda tentu jadi sada kebanggaan, sebab selain tanda kehamaten, gelar enda pe erbahanca kalak si ngalokenca jadi anggota keluarga Kerajaan Inggris. Adi enggo jadi anggota keluarga kerajaan tentuna lit hak-hak istimewa si ialokenna, tapi lit ka konsekuensina, melala kewajiben si harus ilakokenna selaku ia anggota keluarga kerajaan. I bas PA-ta sendah radu ras kita erlajar kerna statusta sebage anggota keluarga Dibata rikutken ogenta.

Mpebagesi Kata Dibata

Surat rasul Paulus man Perp. Epesus si ipantekina (bdk. Perb. Rasul 18:19-21; 19:1-20; 20:17-38) ertujun guna mpeteguhi kiniteken man Yesus Kristus bage pe mpeteguhi kiniersadaan i bas perpulungen. Judul perikop si jadi ogenta sendah eme “Ersada i bas Kristus” (terj. TB-LAI, “Dipersatukan di dalam Kristus”, terj. BIMK, “Satu karena Kristus”). Rikutken judul perikop jelas maka tujun Rasul Paulus nuliskenca si jadi ogenta sendah, gelah perpulungen ersada i bas Kristus, ula nai lit pembedaan-pembedaan antara kalak Yahudi ras si labo Yahudi, kerinana enggo ipersadaken Kristus.

I bas ay. 19 teridah keadaan perpulungen paksa si e, lit denga pembedaan (diskriminasi) antara kalak si tek si berlatar belakang Yahudi ras si labo kalak Yahudi. Kalak si labo kalak Yahudi rusur ianggap warga kelas dua, “la ersunat” (ay. 11), pertandang, entah pe kalak asing. I bas si e Rasul Paulus ngingetkenca maka kerina kalak si tek ndatken hak si seri i lebe-lebe Dibata, erkiteken kerehen Kristus ku tengah-tengah doni enda guna meritaken Berita Si Mehuli kerna perdamen man kerina jelma. Emaka Rasul Paulus ngajuk perpulungen gelah ersada i bas Kristus, ula nai lit diskriminasi, sebab kerinana enggo jadi sada warga, anggota keluarga Dibata. 

I bas ay. 20-22 Rasul Paulus negaskenca, sebage anggota keluarga Dibata kerina kalak si tek harus njadiken Yesus Kristus palas persukina, gelah i bas persadan kalak si tek, pajek Rumah Pertoton Si Badia i ja Dibata ringan alu KesahNa. Alu bage kerina si jadi peraten Dibata banci tersehi i tengah-tengah doni enda erkelangken gerejaNa. Emaka kerina anggota keluarga Dibata harus ikut muat bagin i bas ndahiken dahin-dahin si mehuli si enggo leben irencanakenNa (bdk. ay. 10).

Pengkenaina

I bas PA-ta sendah radu ras kita isingetken mulihi kerna statusta sebage anggota keluarga Dibata. Sebage anggota keluarga Dibata tentuna melala hak-hak istimewa si ialoken kita. Keselamaten i surga ras i doni enggo ialoken kita. Pasu-pasu Dibata nari enggo ialoken kita. Dame sejahtera enggo igejapken kita, rsd. Tapi selaku anggota keluarga Dibata kita pe iajuk gelah jadi pasu-pasu ras er-Berita Si Mehuli man sekelewetta, i bas pengerananta, perukurenta, bagepe perbahanenta, gelah kerina kalak nandai Yesus Kristus erkelangken kita.

Secara khusus i bas tujun si peduaken, iajuk kita gelah ikut muat bagin i bas dahin-dahin pelayanen i gerejanta masing-masing. Ikut muat bagin i bas dahin-dahin pelayanen i gereja eme salah sada bagin i bas konsekuensi jadi anggota keluarga Dibata. Pengajuk enda sue ras tema tahun pelayanen GBKP 2023 “Jemaat menjadi pelaku aktif pelayanan.” Ertina banci radu ras sievaluasi seh bulan 8 enda, apakah kerina kita Mamre enggo muat bagin i bas dahin-dahain pelayanen i gerejanta masing-masing?

Mungkin melala denga kendala-kendala si erbahanca kita la ikut muat bagin i bas dahin-dahin pelayanen. Lit kendala si sifatna pribadi i bas diri masing-masing Mamre, umpamana, lenga beluh ngaturken waktu, lenga lit semangat entah pe kisat, lenga lit dukungen i bas Moria rumah nari, rsd. Lit ka kendala arah darat nari, umpamana, lit anggota Mamre si dominan, si erbahanca la lit kesempaten man Mamre-mamre si deban guna ikut muat bagin i bas dahin-dahin pelayanen. Kurang melibatkan kerina Mamre i bas kegiaten-kegiaten pelayanen. Rusur rubat antara Pengurus Mamre, si erbahanca jadi batu antuken man anggota Mamre si deban, rsd. Si e kerina banci jadi bahan evaluasi man banta kerina, radu ras sidarami jalan keluarna, gelah tujun si peduaken i bas PA-ta sendah banci iwujudken i gerejanta masing-masing. Dibata si mpengasup kita ngelakoken kerina si jadi peratenNa.