SUPLEMEN PA MAMRE GBKP TGL. 13 - 19 AGUSTUS 2023

Pdt. Larena br. Sinuhadji (Nd. ReyRapha Tarigan)

Teks : Kejadin 41:25-41

Tema : REKAM JEJAK JADI PEMIMPIN

Tujun : Gelah Mamre :

- Meteh maka rekam jejak memiliki arti penting jadi pemimpin

- Niksiki rekam jejak pemimpin si bakal ipilih, ula la mediate

Penaruh

Tahun si reh bangsa Indonesia ngelaksanaken pesta demokrasi lima tahunan, i ja ipilih presiden ras wakil presiden bage pe bakal ipilih wakil-wakil rakyat tingkat daerah nari seh ku pusat. I bas rangka ersikap kita guna nentuken pemimpin-pemimpinta maka i bas PA-ta sendah radu ras kita erlajar kerna pentingna rekam jejak calon pemimpin si bakal ipilih kita.

Mpebagesi Kata Dibata

Turi-turin kerna Yusuf akap kami enggo rusur sibegi entah sioge i bas Pustaka Si Badia. Janah turi-turin kerna Yusuf pe sangat menarik, penuh dengan lika-liku kehidupan, tapi tetap ikawali Dibata. Yusuf eme sekalak si tutus erkiniteken man Dibata. Erkiteken ketutusenna erkiniteken maka piga-piga hal si luar biasa terjadi i bas kegeluhenna:

1. Iarak-arak Dibata Yusuf seh maka sangap ia i bas kerina pendahinna (Kej. 39:2). Kasa kai si idahiken Yusuf jore kerina (Kej. 39:23)
2. Ipasu-pasu Dibata Yusuf seh makana kalak si deban pe ngena ate man bana (Kej. 39:21)
3. Ibereken Dibata kepentaren man Yusuf guna ngertiken nipi raja Firaun, erkiteken si e bengket me Yusuf ku bas puncak karir i bas kegeluhenna, e me jadi wakil raja Firaun (Kej. 41:40-46).
4. Ibereken Dibata kengasupen man Yusuf guna ndahiken kerina tugas tanggung jawabna sebage wakil raja alu mehuli seh makana la lit terjadi kelehen i taneh Mesir (Kej. 14:46-57; 47:13-46).
5. Ibereken Dibata kiniteruken ukur man Yusuf seh makana i bas kekuasaan si mbelin si lit i bas ia labo ipergunakenna guna membalas dendam entah pe ngelakoken si jahat. Ialemina senina-seninana si enggo erbahan si jahat man bana (Kej. 50:20). Tetap mehamat ia man orang tuana. Isikapkenna ingan tading si mehulina man orang tuana bage pe kerina senina-seninana (Kej. 47:11-12).

I bas poin-poin i datas situhuna enggo erlajar kita kerna rekam jejak Yusuf sebage sekalak pemimpin. Tapi rikutken ogenta sendah lit piga-piga hal penting si ilakoken Yusuf ras Raja Firaun.

1. I bas ay. 25-36, nggit Yusuf nampati Raja Firaun guna ngantusi nipina ras mereken saran-saran si mehuli alu la transaksional. Ertina banci saja Yusuf mindo imbalan si mbelin i bas penampat si iberekenna, tapi situasi e la imanfaatkenna guna keuntungen dirina sendiri.
2. I bas ay. 33-36, arah saran-saran si ibereken Yusuf man Raja Firaun teridah karakteristik pemimpin si harus ipilih Raja Firaun guna mengatasi krisis. I bas ay. 33 jelas ikataken Yusuf maka harus ipilih sekalak pemimpin si erpemeteh (berakal budi, cerdas) ras pentar (bijaksana) guna ngaturken negeri.
3. I bas ay. 37-41, erlajar kita arah Raja Firaun, sebab sebage sekalak pemimpin nggit ia ngaloken saran, bahkan banci ikataken saran e rehna i bas sekalak budak nari si la iperhitungken i tengah-tengah masyarakat. Janah nggit Firaun milih Yusuf, sekalak budak ras labo bangsa Mesir, guna jadi wakilna.

Versi Audio Silahkan Klik : https://www.youtube.com/watch?v=XwFAJjj2mPw

Pengkenaina

Tema ras tujun PA-ta sendah, ngajuk kita gelah nggit kita menelusuri rekam jejak pemimpin-pemimpin si ateta sipilih guna mimpin bangsa Indonesia i bas Pemilu 2024. I bas tujun si pemena bage pe si peduaken jelas maka rekam jejak e penting janah harus mediate kita kerna si e.

Arah PA-ta sendah erlajar kita kerna rekam jejak Yusuf sebage sekalak pemimpin si erkiniteken man Dibata. Ertina syarat penting si pemena i bas kita milih pemimpin, pilihlah si erkemalangen man Dibata. Amin pe la sada kiniteken ras kita, tapi arah rekam jejakna banci siidah apakah sekalak calon pemimpin e berpikiran terbuka, berjuang demi NKRI, janah mediate man kerina jelma labo saja man si sada kiniteken ras ia.

Yusuf peduli nandangi bangsa Mesir, makana nggit ia nampati bangsa Mesir keluar dari krisis. Syarat si peduaken akap kami, pilihlah pemimpin si nggit berjuang demi kesejahteraan rakyat. Arah rekam jejakna banci siidah kai-kai saja si enggo ilakokenna guna kesejahteraan rakyat.

Arah Yusuf erlajar kita arah kiniteruken ukurna ras ketulusenna. Emaka syarat si peteluken akap kami, pilihlah pemimpin yang rendah hati, tulus, dan tidak transaksional. Arah rekam jejakna banci sitelusuri kerna sikap sekalak pemimpin si rendah hati, tulus, ras anti transaksional. 

Arah Raja Firaun pe banci kita erlajar. Emaka syarat si peempatken akap kami, pilihlah pemimpin si nggit ngaloken kritik ras saran, janah nggit ia berpikir secara objektif. Arah rekam jejakna banci teridah sekalak pemimpin si demokratis. Nggit ia berbagi tugas ras kalak si deban si beluhen asangken ia. Rsd.

Si terakhir akap kami pindolah pemeteh kepentaren arah Dibata nari i bas kita nentuken ras milih pemimpin-pemimpinta i bas tahun 2024 si reh enda, baik presiden wakil presiden bage pe wakil-wakil rakyat daerah nari seh ku pusat.