SUPLEMEN PJJ GBKP TGL. 27 AGT. - 2 SEP. 2023

Pdt. Larena br. Sinuhadji (Nd. ReyRapha Tarigan)

ERDAHIN GUNA KINIULIN PERPULUNGEN (2 Korinti 8:16-19)

Penaruh 

Sekalak seniman keturunan Libanon - Amerika si tergelar Kahlil Gibran, pernah nuliskenca i bas bukuna si berjudul “Sang Nabi” bagenda nina, “Kerja adalah cinta yang mewujud. Dan apabila kamu tidak dapat bekerja dengan cinta melainkan hanya dengan kebencian, lebih baik kamu tinggalkan pekerjaanmu dan duduk di gerbang kuil sambil meminta sedekah dari mereka yang bekerja dengan sukacita.” Kai pe si idahiken kita adi sidahiken erpalasken keleng ate maka hasilna pe maba keriahen ras pasu-pasu man banta. Labo terjeng je saja, hasil pendahin si idahiken kita erpalasken keleng ate maba keriahen ras pasu-pasu man ise pe si ngaloken hasil pendahinta ndai. I bas kesempaten enda erlajar kita kerna erdahin guna kiniulin perpulungen.

Mpebagesi Kata Dibata

Judul perikop i bas ogenta sendah eme “Titus ras teman-temanna” i bas terj. TB-LAI “Titus diutus” ras terj. BIMK “Titus dan kawan-kawan yang diutus bersamanya.” Arah judul perikop enda enggo teridah secara garis besar kai isi bagin surat Rasul Paulus enda man Perp. Korinti. Banci ikataken bagin surat enda eme surat rekomendasi Paulus man Perp. Korinti kerna kapasitas Titus sebage sekalak kepercayaan Paulus guna nampati pelayanen i Korinti.

Titus eme salah sada murid Paulus selain Timotius. Bedana ras Timotius, Titus tuhu-tuhu labo kalak Yahudi. Janah Titus banci ikataken murid kepercayaan Paulus guna menyelesaikan konflik-konflik si terjadi i tengah-tengah perpulungen, emaka rusur Titus iutus Paulus ku daerah-daerah konflik (bdk. 2 Kor. 2:13; 7:6-14; 8:6-23; 12:18; Gal. 2:1-3; 2 Tim. 4:10; Tit.1:4).

Lit dua alasen si akap kami mendasari ikirimkenna surat rekomendasi enda man Perp. Korinti. Si pemena, erpalasken ay. 20-21, kerna transparansi keuangan. Transparansi keuangan enda penting sebab si idahiken Paulus eme pepulung dana guna nampati perpulungen i Yerusalem. Gelah ula lit kecurigaan i bas proses pengumpulen ras penggunaan dana bantuan enda, emaka iutus Paulus Titus ras timna ku Korinti guna nampati proses enda. Si peduaken, mereken penjelasen kerna kapasitas Titus ras timna guna ndahiken dahin-dahin pelayanen termasuk meritaken Berita Si Meriah. I bas ay. 18 ras 22 isebutken Paulus maka lit teman-teman si nemani Titus. La isingetken Paulus ise saja si nemani Titus. Lit penafsir si ngatakenca Lukas entah pe Apolos si imaksudken Paulus. Tapi i jenda si penting, Titus ras timna ipercaya Paulus guna ndahiken pelayanen alu  mehuli i Korinti.

Piga-piga kualitas pelayanen si irekomendasiken Paulus nandangi Titus man Perp. Korinti eme, si pemena, Titus eme sekalak si ergiah-giah ukur erdahin guna kiniulin perpulungen. Ergiah-giah ukur i bas terj. Bhs. Ind., eme giat penuh dengan kesungguhan, lit ka i je unsur kerelaan hati tanpa pamrih di dalam melayani (ay. 16-17). Si peduaken, Titus eme sekalak si proaktif, lit i bas ia inisiatif guna ndahiken dahin pelayanen tanpa harus isuruh-suruh (ay. 16-17). Si peteluken, Titus ras timna eme kalak si enggo teruji integritasna ras terteki, emaka labo saja Paulus si ngutus ia, perpulungen-perpulungen si deban pe ikut mengutus Titus ras timna (ay. 18-19). 

Versi Audio silahkan klik : https://youtu.be/k78jek7uJoA

Pengkenaina

Tema i bas PJJ-ta sendah i bas rangka memotivasi kita kerina perpulungen gelah ikut muat bagin i bas dahin-dahin pelayanen i GBKP i japa pe kita, la lit si tading-tading. Sue ras sasaran pelayanan GBKP 2023, “Jemaat menjadi pelaku aktif pelayanan,” emaka enggo sibentuk erbage-bage tim pelayanen. Salah sada tim si ibahas i bas Buku PJJ-ta eme Tim Khotbah. I bas Buku Garis Besar Pelayanen (GBP) GBKP tahun pelayanan 2021 - 2025 hlm. 78 lit je Tim Khotbah. Meliputi: Isi, bentuk, sajian. Pengkhotbah. Peralatan yang dipakai. Dokumentasi. Keperluan koneksitas. I jenda la lit penjelasen secara mendetail kerna Tim Khotbah enda. Mungkin enggo pernah ijelasken i bas awal tahun.

I bas si e perlu lebe siperjelas maka labo kerina perpulungen banci berkhotbah. Sebab khotbah ugapa pe erkaiten ras pemberitaan firman Tuhan i mimbar nari i bas kebaktin-kebaktin. I bas Buku Tata Gerejanta Psl. 80 kerna Warga Sidi, la lit i je ketentuan maka warga sidi banci berkhotbah. Rikutken Tata Gereja Psl. 92 ras 114 tugas tanggung jawab pemberitaan firman (khotbah) ilakoken pertua ras pendeta. Ertina Tim Khotbah i jenda akap kami guna semakin meningkatkan kualitas pemberitaan firman Tuhan si ilakoken pendeta entah pe pertua. Emaka lit tim khusus si ibentuk guna si e, termasuk i bas rangka memfasilitasi pembinaan-pembinaan man pendeta ras pertua guna meningkatken kualitas isi, bentuk, ras sajian khotbah.

Adina i bas lingkup warga sidi akap kami istilahna labo khotbah, tapi “nehken penggejapen” entah pe “mabai renungen.” I bas si e pe banci ka ilitken pembinaan khusus gelah iteh perpulungen dasar-dasar nehken penggejapen entah pe mabai renungen, baik i bas PJJ bage pe PA-PA Kategorial.

Emaka man banta si seh asa gundari lenga terlibat aktif i bas pelayanen, marilah ikut muat bagin. Titus i bas ogenta sendah banci jadi teladan entah pe penyemangat man banta. Ateta lit min i bas kerina perpulungen ergiah-giah ukur erdahin guna kiniulin perpulungen, lit kerelaan hati (keleng ate) tanpa pamrih i bas ndahiken dahin pelayanen, lit min i bas kerina perpulungen inisiatif guna ikut muat bagin i bas dahin-dahin pelayanen. Mari radu ras sitotoken gelah semakin mbue perpulungen si nggit ikut muat bagin i bas dahin-dahin pelayanen i gerejanta masing-masing. Dibata si mpengasup kita erdahin guna kiniulin perpulungen alu palas keleng ate Dibata. Soli Deo Gloria!