SUPLEMEN PA MORIA GBKP TGL. 27 AGT. - 2 SEP. 2023

Pdt. Larena Sinuhadji (Nd. ReyRapha Tarigan)

Nilai Spiritual Kekerabatan

Si Man Ogen : Kejadin 47:1-12

Tema : MEDIATE RAS ERPEMERE MAN SANGKEP NGGELUH

Tujun : Gelah Moria :

- Meteh perbahanen Yusuf nandangi sangkep geluh

- Jadi pasu-pasu man sangkep geluh arah si lit bas ia

Metode : Diskusi & Aksi

Penaruh

“Sangkep nggeluh” adi rikutken Kamus Karo Indonesia ertina: kelengkapan hidup, yaitu: kalimbubu, sembuyak, dan anak beru. Adi rikutken ogenta sendah, enterem sangkep nggeluh Yusuf. Yusuf eme anak Yakub. Lit 12 anak dilaki Yakub, eme : Ruben, Simeon, Lewi, Yehuda, Isakhar, ras Zebulon (i bas ndeharana Lea nari), Yusuf ras Benyamin (i bas ndeharana Rahel nari), Dan ras Naftali (i bas gundikna Bilha nari), Gad ras Asyer (i bas gundikna Zilpa nari), janah lit isebutken sada anak diberuna arah Lea nari si tergelar Dina (bdk. Kej. 30 & 35). Rikutken urutenna, Yusuf eme anak Yakub si pe-11-ken. Adi rikutken Kej. 46:26-27 ikataken, “Teremna kesusuren Yakub si lawes ku Mesir lit 66 kalak, la ibeligai ndehara anak-anakna. Dua anak Yusuf si dilaki tubuh i Mesir, emaka lit 70 kalak kerina keluarga Yakub lawes ku Mesir.”

Mpebagesi Kata Dibata

Si man ogenta sendah merupaken bagin-bagin akhir kisah kegeluhen Yusuf. Enggo radu ras siteh maka kitik-kitik nari Yusuf enggo ndatken perlakuan si la mehuli arah senina-seninana. Sanga umurna 17 tahun, idayaken senina-seninana Yusuf man rombongen kalak Ismael erkiteken nembeh ras cian ate senina-senina man Yusuf si datken ngena ate bapana lebihen asangken man senina-seninana (Kej. 37). Ibaba rombongen kalak Ismael Yusuf ku Mesir. Erbage-bage kiniseran ialami Yusuf, benaken jadi budak i rumah Potifar. Ifitnah ndehara Potifar janah itamaken ku bas penjara. Ilupaken juru inemen raja si pernah isampatina. Mungkin melala denga kiniseran si nialami Yusuf si la ituriken i bas Pustaka Si Badia.

Tapi i bas si e, la pernah salahken Yusuf kalak si deban apai ka isalahkenna Dibata i bas kiniseran-kiniseran si nialamina. Tetap tutus ia erkiniteken man Dibata seh makana iarak-arak Dibata Yusuf i bas kegeluhenna. I bas Kej. 39:2 ikataken, “TUHAN si ngarak-ngarak Yusuf, seh maka sangap ia i bas kerina pendahinna.” Sanga i bas penjara pe tetap ia iarak-arak ras ipasu-pasu Tuhan seh makana penjaga penjara pe ngena ate man bana (Kej. 39:21). I bas Kej. 39:23 ikataken nina, “erkiteken TUHAN si ngarak-ngarak Yusuf, kasa kai si idahikenna jore kerina.” Labo terjeng je saja, ibereken Dibata kepentaren man Yusuf guna ngertiken nipi Raja Firaun si erbahanca naik status Yusuf, budak nari jadi wakil Raja Firaun.

I bas jabaten ras kuasa si lit i bas dirina, tetap Yusuf meteruk ukur. La igunakenna jabaten ras kuasa si lit guna membalas dendam. Ialemina salah senina-seninana. Yusuf si proaktif ngelakoken rekonsiliasi ras senina-seninana seh makana terjalin relasi si harmonis ras sangkep nggeluhna.

I bas Pustaka Si Badia la lit judul perikop si man ogenta sendah, emaka masuk ku bas perikop sebelumna alu judul “Jakup ras keluargana lawes ku Mesir.” Adi rikutken Alkitab terj. BIMK lit judul i bas perikop si man ogenta sendah eme “Yakub menghadap raja Mesir.” Bagin enda nuriken maka kenca enggo erdame Yusuf ras senina-seninana, isuruh Yusuf senina-seninana nehken pesan man bapana Yakub gelah pindah ku Mesir sebab ndekah denga bencana kelehen janah gelah banci iperdiateken Yusuf bapana si enggo metua (Kej. 45:9-11). Kenca enggo seh kerina sangkep nggeluh Yusuf ku taneh Mesir, ibaba Yusuf lima seninana bage pe Yakub bapana ngadap man raja Mesir.

Sambuten Raja Mesir man sangkep nggeluh Yusuf akap kami sangat luar biasa. I bas Kej. 46:16 ituriken, “Kenca seh berita e ku istana raja, maka enggo reh senina Yusuf, meriah ukur raja ras kerina pegawaina.” Labo terjeng je saja, itenahken Raja Mesir kerina sangkep nggeluh Yusuf reh i Kanaan nari ku Mesir. Isikapken Raja Mesir transportasi khusus guna maba kerina keluarga Yusuf pindah Kanaan nari ku Mesir. Rikutken ogenta sendah, enggo isikapken Raja Mesir daerah Gosen jadi ingan tading Yakub ras kerina sangkep nggeluh Yusuf. Daerah Gosen ipilih erkiteken je ingan si mejilena janah lit je asuh-asuhen Raja Mesir. Erkiteken iteh raja latar belakang pendahin Yakub ras sangkep geluhna sebage permakana, isuruhna ka senina-senina Yusuf guna jadi ermakan man asuh-asuhenna. Enda akap kami sambuten si luar biasa i bas Raja Mesir nari nandangi Yakub ras kerina sangkep nggeluhna.

Sebage anak si mehamat man orang tuana, bage pe engkelengi senina turangna, Yusuf tuhu-tuhu mperdiateken kelangsungan hidup kerina sangkep geluhna. Ipergunaken jabaten, kuasa, ras kinibayaken si lit i bas ia guna tuhu-tuhu mensejahterakan sangkep geluhna. I bas ay. 11-12 ituriken, “Kenca bage ipetetap Yusuf me bapa ras senina-seninana ringan i taneh Mesir. Iberekenna mana kalak enda taneh arah ingan si mejilena i negeri e, ndeher ras kota Ramses, sue ras si iperentahken raja. Isikapken Yusuf nakan man bapana, senina-seninana kerina ras keluarga bapana si deban, seh ku bas anak si ngudana kel pe.” 

Versi Audio silahkan klik : https://youtu.be/WQKDuHhwDmU

Pengkenaina

Rikutken tema ras tujun PA-ta sendah, iajuk kerina kita Moria gelah mediate ras erpemere man sangkep geluhta. Arah ogenta sendah, karakter mediate ras erpemere enggo iteladanken Yusuf man banta. Lit piga-piga hal si akap kami banci memperkuat karakter mediate ras erpemere man sangkep geluhta rikutken kisah kegeluhen Yusuf.

Si pemena lebe la banci lang arus lit bas kita relasi si mehuli ras Dibata. Kisah Yusuf ncidahken man banta maka Yusuf sekalak si tutus erkiniteken ras erkemalangen man Dibata. Enda akap kami palasta mediate ras erpemere man sangkep geluhta. Adi enggo tuhu-tuhu sigejapken uga belinna keleng ate Dibata nandangi kita manusia si erdosa, labo mesera guna memahami karakteristik mediate ras erpemere. Tapi adi nggeluh denga i bas kita keegoisan, hanya ngukurken diri sendiri, enggo pasti mesera guna ngangkai karakter mediate ras erpemere. Sebab lit budaya Karo, “nimpan ras muniken” si sedalanen ras karakter “pelit” la nggit berbagi bahkan man senina ras turangta kel sekali pe. 

Si peduaken, karakter mediate ras erpemere harus idukung alu perdamen i bas relasi ras sangkep geluhta. Arah kisah kegeluhen Yusuf, radu ras siteh, erdame lebe Yusuf ras senina-seninana maka banci mediate ras erpemere alu mehuli. I bas perdamen lit saling menghargai sada ras si deban, i bas perdamen lit kepedulian, janah i bas perdamen lit saling tolong-menolong. Emaka i bas si e, marilah siupayaken suasana dame i bas relasi ras sangkep geluhta.

Si peteluken, erlajar kita arah Raja Firaun si alu meriah ukur menyambut keluarga besar Yusuf. Ertina orientasi karakteristik mediate ras erpemere e labo terjeng ngadi bas sangkep geluhta saja, man ise pe si membutuhken penampatta marilah kita nggit peduli ras nampati alu meriah ukur, sebab Dibata pe alu meriah ukur enggo ncukupken kerina kebutuhen geluhta. Emaka sebage pengataken bujurta man Dibata marilah sikembangken karakter mediate ras erpemere man kerina makhluk.

Si peempatken, kai pe si lit i bas kita banci simanfaatken guna mendukung karakter mediate ras erpemere. Adina i bas ogenta sendah, Yusuf tuhu-tuhu makeken kerina si lit i bas ia guna kesejahteraan sangkep geluhna. Pemere Dibata man banta labo terjeng kinibayaken, melala talenta si ibereken Dibata man banta, kerinana banci ipergunaken guna mperdiateken sangkep geluhta, emaka sipergunakenlah.

Si pelimaken, PA-ta i bas rangka sosialisasi nilai spiritual kekerabatan. I bas Buku Garis Besar Pelayanan (GBP) GBKP Tahun Pelayanan 2021 - 2025, salah sada perilaku Tata Nilai GBKP eme “kekerabatan”. I bas teruh enda ibahan kami deskripsi dan peta perilaku Tata Nilai GBKP K4 - Kekerabatan (hlm. 45)

Deskripsi:
Saling peduli dan menghargai perbedaan dalam membangun kerja sama tim pelayanan yang sinergis (Yoh. 15:13-15; 1 Kor. 13:5-10).

Panduan Perilaku:

• Menghargai setiap orang apapun latar belakangnya
• Memberi kesempatan kepada berbagai pihak untuk berkontribusi
• Terbuka dalam bekerja sama untuk menghasilkan nilai tambah
• Suka menolong orang lain
• Membangun lingkungan kerja yang kondusif

Kata-kata kunci:

• Peduli (caring)
• Perbedaan (diversity)

Kalimat afirmasi:
“Kami saling peduli dan menghargai perbedaan dalam membangun kerja sama tim yang sinergis”

Perilaku yang dianjurkan:

• Saling membantu dan mendukung sesama insan organisasi dan masyarakat
• Menghargai ide, pendapat, maupun saran orang lain
• Mengingat kontribusi setiap orang dari berbagai latar belakang yang berbeda-beda
• Bersinergi untuk mencapai tujuan bersama

I bas si e marilah sikembangken tata nilai kekerabatan i bas kegeluhenta si tep-tep wari baik i tengah-tengah jabu, ras sangkep geluhta, i tengah-tengah masyarakat, khususna i tengah-tengah pelayanenta i bas Gerejanta masing-masing. Dibata si mpegegehi kita.