SUPLEMEN PJJ GBKP TGL. 13 - 19 AGUSTUS 2023

Pdt. Larena br. Sinuhadji (Nd. ReyRapha Tarigan)

KELENG ATE MPETURAH PERDAMEN (Galati 5:13-15)

(HUT RI Ke-78 & Hari Perdamaian Internasional)

Penaruh

PJJ-ta sendah i bas rangka mperingeti 78 tahun kemerdekaan Indonesia sekaligus mperingeti Hari Perdamaian Internasional si irayaken setiap 21 September benaken tahun 1982. Lit hubungen antara kemerdekaan ras perdamaian. Perdamaian la mungkin terwujud adi la lit kemerdekaan, sebalikna, kemerdekaan pe la banci terwujud adi la lit perdamaian. Rikutken kinitekenta selaku kalak si enggo ngaloken keselamaten i bas Yesus Kristus, palas kemerdekaan ras perdamaian eme keleng ate Dibata.

Mpebagesi Kata Dibata

Secara garis besar surat Paulus man Perp. Galati ilumbaken gelah tuhu-tuhu ieteh kalak si tek man Yesus, subuk kalak Yahudi bage pe non-Yahudi (Yunani), maka syarat si penting sebage kalak Kristen labo kerna Undang-undang Musa (taurat, sunat, mantangken pangan-pangan, rsd.) tapi tek man Yesus. Arah kita tek man Yesus maka kita enggo iperdameken ras Dibata, bebas i bas kuasa dosa (Iblis) nari ras e kerina perkuah ate Dibata man banta. Konteks paksa si e, enggo berkembang i tengah-tengah perpulungen sada kearusen ngikutken Undang-undang Musa maka enggo ikataken Kristen si tuhu-tuhu.

Perikop ogenta sendah ibere judul “Jagalah kebebasenndu” (terj. TB-LAI “Kemerdekaan Kristen”). Kebebasen si enggo ibereken Tuhan arus mampu ipertanggungjawabken ras iaplikasiken alu mehuli. Ay. 1, “Kita enggo bebas genduari sabab Kristus enggo mbebasken kita! Erkiteken si e tetaplah bagi kalak bebas, janah ola nai kam nggit itindih pasangen bagi budak.” Bahkan tegas Paulus ngatakenca, “Adi pelepasndu diirindu isunatken, e nuduhken maka Kristus la lit ertina man bandu.”

Secara khusus i bas bahan PJJ-ta mulihi ipertegas Paulus maka perpulungen e enggo bebas (merdeka) sabab enggo ipilih Dibata arah kita tek man Yesus. Tapi sijaga maka kebebasen e ola sempat kebablasen (ate-ate) je nari jadi alasen si erbahanca geluhta ikuasai peraten dagingta (terj. TB-LAI nina, “Tetapi janganlah kamu mempergunakan kemerdekaan itu sebagai kesempatan untuk kehidupan dalam dosa”). Si arus idalanken perpulungen e me nggeluh i bas sikeleng-kelengen. Bere maka keleng ate si njemba kam guna nggeluh sisampat-sampaten. Sabab undang-undang pe si ibereken Tuhan man Musa i bas kerehen Yesus enggo ipersada ku bas sada pedah, “Kelengilah temanndu manusia bagi kam ngkelengi dirindu.” Intina kemerdekaan, kebebasen, i bas dosa mabai kita nggeluh sikelengen-kelengen sada ras si debanna alu la ibatasi golongen, suku, tingkat sosial, pendidiken, rsd. La lit nari belat-belat. Tapi adi i bas kegeluhenta selaku kalak si tek pe sikaraten dingen siatahen, sada paksa waktu bakal kernep nge persadanta e. E maka arus kita tetap metenget.

Versi Audio Silahkan Klik : https://youtu.be/PDPE9obG5wo

Pengkenaina

Puji Tuhan i bas tgl. 17 Agustus enda kita merayakan 78 tahun kemerdekaan Indonesia.  Patut kita ngataken bujur, pelin-pelin perkuah ate Tuhan man banta, e maka arus sipakeken kegeluhenta selaku kalak si bebas (merdeka) alu bertanggung jawab ula ate-ate. Lebe sigejapken kita enggo merdeka maka nggeluhlah sebage kalak si enggo merdeka: semangat, lit keriahen ukur, sura-sura si mehuli tetap ilakoken, dem alu pengataken bujur, ertina si kerina ngena ate Dibata harus tetap sidalanken. Slogan HUT RI 78 tahun eme “Terus melaju untuk Indonesia maju” kita iajuk guna terus ikut muat bagin i bas kemajun bangsa ras negaranta Indonesia. Emaka mari radu ras kita terus berkarya i bas bidangta masing-masing gelah jadi pasu-pasu man bangsa ras negaranta.

Sue ras tema PJJ-ta sendah, “Keleng ate mpeturah perdamen”, radu ras sipahami maka keleng ate Dibata i bas Yesus Kristus mpeturah perdamen antara Dibata ras manusia. Labo terjeng je saja, keleng ate Dibata maba kedamen i bas dirinta, i bas keadaan si kugana pe geluhta idem alu damai sejahtera. Keleng ate Kristus pe mpengasup kita guna erdame ras sesama manusia. I bas si e tentuna nggeluh sikeleng-kelengen i tengah-tengah perpulungen kalak si tek harus terus ilakoken, sebab i bas kekelengen lit kedamen. Tapi kedamen i jenda labo seri ras “zona nyaman” entah pe “cari aman.” Ertina kebenaran rikutken Kata Dibata tetap harus siperjuangken amin pe kerna si e kita harus ngenanami kiniseran.

I bas rangka mperingeti Hari Perdamaian Internasional, kita pe iajuk guna pembarken perdamen i japa pe kita ringan. Kedamen i bas Kristus harus leben sigejapken i bas dirinta, kenca bage maka lakokenlah dame e i bas kegeluhenta si tep-tep wari. Umpamana, kerehenta i japa pe maba keriahen ras kedamen, nyaman kalak adi ngerana ras kita, pengerananta maba kedamen man kalak si deban, nggit kita jadi juru dame man senina turangta si sangana i bas konflik, sikapta i bas konflik labo jadi provokator tapi jadi mediator gelah terjadi perdamen, rsd.