SUPLEMEN PJJ GBKP TGL. 25 JUNI - 1 JULI 2023

Pdt. Larena br. Sinuhadji (Nd. ReyRapha Tarigan)

Tema : ERTOTO RAS ERDAHIN GUNA SI ENTEREM (Jeremia 29:4-7)

(Konfesi GBKP Bab V: Masyarakat)

Penaruh

Manusia iciptaken Dibata sebage makhluk sosial, ertina i bas diri manusia enggo lit naluri guna saling berkomunikasi, saling berinteraksi, lit rasa kepedulian guna nampati entah pe mindo penampat, lit iketen kemanusiaan, rsd. I bas si e tentuna kita harus nggit menerima realita maka kita nggeluh berdampingan ras kalak si deban, kita nggeluh i tengah-tengah kalak si enterem entah pe masyarakat. Adi lit manusia si nggeluh tertutup, entah pe menutup diri i bas masyarakat sekitarna tentu jadi penungkunen entah pe kecurigaan, jangan-jangan anggota teroris, jangan-jangan pabrik narkoba, jangan-jangan itu tempat tinggal selingkuhan, rsd.

PJJ-ta sendah ngerana kerna kepedulian kalak si tek, khususna kita anggota GBKP, nandangi kalak si enterem entah pe masyarakat i sekelewetna.

Mpebagesi Kata Dibata

Ogenta sendah akap kami enggo rusur sioge entah pe sibegiken, e me surat Nabi Jeremia i Jerusalem nari man kerina kalak Israel si enggo iangkut ku Babilon jadi tabanen Raja Nebukadnesar. Konteks ogenta sendah, Nabi Jeremia labo terjeng mereken pergegeh man bangsa Israel si sangana ngenanami kiniseran i Babilon, Jeremia pe sangana meng-counter berita-berita si la benar arah nabi-nabi palsu nari (ay. 8-9). Surat enda isehken Jeremia sekitar tahun 597 SM, setahun entah dua tahun kenca bangsa Israel itaban i Babilon. Ertina ndekah denga bangsa e harus tading i Babilon (ay. 10-14).

Lit piga-piga hal si banci jadi refleksi man banta i bas PJJ-ta sendah. Si pemena, Nabi Jeremia mabai bangsa Israel si sangana lit i bas pembuangen i Babilon, ngaloken kinata kegeluhen, entah pe berdamai dengan kenyataan. Labo kerina si terjadi i bas kegeluhen sue ras si niarapken kita. Jadi, dari pada mengabiskan waktu hanya dengan meratapi nasib, lebih baik menerima dan berdamai dengan kenyataan.

Si peduaken, Jeremia ngajuk bangsa e gelah move on, tetap melanjutkan hidup dan tetap berkarya. I bas ay. 5, ngajuk Nabi Jeremia gelah bangsa e memenuhi kebutuhen primerna  (sandang pangan ras papan). I bas Alkitab Bahasa Indonesia Masa Kini (BIMK) nina, “Menetaplah di situ. Bangunlah rumah-rumahmu. Bukalah ladang dan nikmatilah hasilnya.” I bas ay. 6, Nabi Jeremia ngajuk gelah bangsa e tetap meneruskan generasi. I bas Alkitab BIMK nina, “Kawinlah supaya kamu mendapat anak, dan biarlah anak-anakmu juga kawin supaya mereka pun mendapat anak. Jumlahmu harus bertambah dan tidak boleh berkurang.” I bas si e bangsa e labo terjeng beranak-pinak tapi si utamana e me melestarikan warisan religius erkiniteken man Dibata, sebab keluarga e me wadah pendidikan religius.

Si peteluken, adi i bas ay. 5 ras 6 orientasina guna diri sendiri entah pe kelangsungan kehidupan keluarga sendiri, emaka i bas ay. 7 Nabi Jeremia pe ngajuk bangsa e gelah mediate nandangi kiniulin masyarakat kota i ja bangsa e tading, alu ikut muat bagin ndahiken dahin-dahin si mehuli, janah ertoto guna keperlun masyarakat i sekelewetna, sebab adi sikap kota e, bangsa Israel pe ikut sikap kegeluhenna. Kata “sikap” i bas Alkitab terj. Bhs. Ind., “sejahtera” ras “makmur”.  

Versi Audio Silahkan Klik : https://www.youtube.com/watch?v=J5i-A4XsmrQ

Pengkenaina

Tema i bas PJJ-ta sendah ngajuk kita gelah ertoto ras erdahin guna si enterem rikutken Konfesi GBKP Bab V si ngerana kerna “Masyarakat”, nina, kami percaya, bahwa masyarakat adalah sekumpulan manusia yang diciptakan Allah menurut gambar dan rupaNya (Kej. 1:26-27). Dalam perjalanan sejarah, terjadi pengelompokan masyarakat berdasarkan daerah, budaya dan suku bangsa (Kej. 11:5-8, 12:1-2). Dalam kehidupan bermasyarakat, gereja dipanggil  menjadi garam dan terang dengan menerima dan menghargai keberagaman (Mat. 5:13-15).

Arah isi konfesi i datas iajuk kita guna menjadi garam ras terang alu ngaloken ras ngergaken keberagaman.

Rikutken ogenta sendah, iajuk kita gelah mediate (peduli) nandangi kesejahteraan masyarakat sekelewetta i japa pe kita tading. Melala si banci silakoken i bas rangka kepedulianta nandangi kalak si enterem si lit i sekelewetta. Umpamana, nggit kita terbuka alu berkomunikasi ras jiranta, ikut muat bagin i bas kegiaten-kegiaten RT/RW, nggalari iuren warga, reh kita adi lit jiranta si kemalangen, nampati jiranta si sangana kesulitan ekonomi, rsd. Si e kerina idahiken kita alu palas kiniteken maka kita sebage kalak si enggo ngaloken keselamaten i bas Yesus Kristus iutus guna ncidahken keleng ate Kristus man sekelewetta.

Hal si deban si harus ilakoken kita e me ertoto guna kiniulin ras kesejahteraan masyarakat i sekelewetta. Sebab adi sikap lingkungen masyarakat i japa pe kita tading, kegeluhenta pe sikap, sejahtera ras makmur. Adi suasana lingkungen masyarakat i sekelewetta sejuk, damai, ramah, saling peduli, penuh tenggang rasa, emaka geluhta pe lebih berkualitas.