SUPLEMEN PJJ GBKP TGL. 11 - 17 JUNI 2023

Pdt. Larena br. Sinuhadji (Nd. ReyRapha Tarigan)

Tema : KERINA TUTUS RAS-RAS ERTOTO (Perb. Rasul 1:12-14)

Kata Penaruh

Ertoto e me sada hal si seh kel pentingna selaku kita kalak si tek man Tuhan. Arah ertoto e me nuduhkenca man banta selaku anak-anakNa lemah i bas ngalaken erbage tantangen nggeluh, emaka arus tetap terus-menerus mindo penampat man Tuhan (bdk. Luk. 18:1; 1 Tes. 5:17; Ef. 6:18). Emaka penting, ertoto secara pribadi, bage pe ras-ras i bas kiniersadanta sebage perpulungen.

Rikutken temata sekali enda, maka lit dua kata penting i jenda, e me tutus ras  ersada (ras-ras). Tutus ertina sungguh-sungguh, bulat ukur. Si peduaken, ersada entah pe ras-ras. Kiniersadan e penting i bas geluhta selaku kalak si tek (Pertoton Tuhan Yesus i bas Yoh. 17, “gelah ersada min ia kerina” - kalak si tek). Emaka selaku kalak si tek, gelah banci reh ersadana kita, banci kita saling mendukung, menopang subuk i bas pelayanen, geluh berbangsa, bage pe geluh pribadi, maka penting kel ertoto ras-ras. Janah erlajar kita arah pengogenta sekali enda, i ja Rasul-rasul Tuhan Yesus ras diberu-diberu si Galilea nari tutus dingen ras-ras ertoto nimai seh nusurna Kesah Si Badia.

Versi Audio Klik : https://youtu.be/hEIA848kB80

Mpebagesi Firman Tuhan

Sope Yesus terangkat ku surga, enggo iperentahken Tuhan Yesus Rasul-rasul gelah ola lebe nadingken kota Jerusalem tapi timai lebe pemere si enggo ipadanken Bapa, e me Kesah Si Badia. Kesah Si Badia si jadi gegeh man Rasul-rasul guna naksiken kerna Tuhan Yesus man kalak si deban mulai kin i Jerusalem, Judea, Samaria seh ku belang-belang doni enda (bdk. Perb. Rasul 1:4,8). Ras ajar-ajar Tuhan Yesus taat kerna perentah enda. Padahal situhuna, situasi si ihadapi Rasul-rasul i kota Jerusalem sendiri labo aman, sabab bas kota e enterem denga kalak si membenci Yesus ras pengikutNa. Ras kenca Yesus keke i bas si mate nari pe semakin mendalam kebencian kalak enda, maka melala berita palsu si ngatakenca ajar-ajar Yesus sendiri si nangko mayat Tuhan Yesus. Amin bage gia, Rasul-rasul tetap ncidahken ketaatan alu mulihken ku Jerusalem bagi si enggo iperentahken Tuhan Yesus ras alu saber nimai nusurna Kesah Si Badia bagi si nipadanken Tuhan Yesus.

Rikutken teks, kenca enggo Rasul-rasul e naksiken kenangkihen Tuhan Yesus ku surga i Uruk Seton nari, maka mulih kalak enda ku Jerusalem. Uruk e dauhna kira-kira sada setengah kilo meter i Jerusalem nari. Kenca seh i Jerusalem, minter lawes ia ku loteng rumah inganna numpang, e me Rasul-rasul Tuhan si sepuluh sada kalak. Tutus atena kerina ras-ras ertoto, ikut pe diberu, bage pe Maria nande Yesus ras senina-senina Yesus (bhs. Ind., “Mereka semua bertekun dengan sehati dalam doa bersama-sama”). Ras enda ilakoken kalak enda sepuluh wari dekahna sope nusurna Kesah Si Badia (wari pe-limapuluh-ken). Ertina, i bas perbeben si ialami rasul-rasul ras pengikut Yesus turah me persadan ras ketedehen ate guna bersekutu. Ketutusen ertoto jadi sada ekspresi iman rasul-rasul ras kerina kalak si tek paksa si e, maka tuhu-tuhu kalak enda ernalem man Tuhan. Kesehatian ajar-ajar Tuhan Yesus ras diberu-diberu si mulai kin Galilea nari enggo setia ikut Yesus i bas penangkih pertoton jadi sada pergegeh maka ajar-ajar Tuhan Yesus e la berjuang sendiri i bas nerusi pelayanen i tengah-tengah doni tapi tetap penalemenna Yesus. Bahkan Janji Tuhan Yesus sope IA nangkih ku surga, tetap IA ras pengikutNa seh ku kedungen jaman enda. Berbeda asum Yesus mabai telu kalak ajar-ajarNa nemani IA ertoto i taman Getsemani (Uruk Seton). I je ajar-ajarNa tertunduh la banci ras Yesus erjaga (mendukung dalam doa - bdk. Mat. 26:36-; Mrk. 14:32-42; Luk. 22:39-46).

Ketutusen Yesus ertoto asum ras-ras i doni enda jadi sada usihen ras motivasi man rasul-rasul guna tetap setia ras tutus ertoto, bagi si enggo ilokeken Yesus sedekah enda (bdk. Mrk. 1:35, Mat. 14:23). Janah siidah pe seterusna kenca rasul-rasul Tuhan ipake Tuhan guna mberitaken Kata Dibata pe maka teridah i je ketutusen rasul-rasul ertoto erpengendes man Tuhan sope mengutus kalak guna melayani entah kegiaten pelayanen si deban si ilakokenna. Perb. Rasul 14:23, “Kenca ertoto man Dibata dingen erpuasa, iendeskenna pertua-pertua e man Tuhan si itekina.”  Perb. Rasul 20:36, “Kenca dung Paulus ngerana ras erjimpuh ia ras kalak e kerina dingen ertoto man Dibata.” Perb. Rasul 21:5, “I tepi lawit ras-ras kami erjimpuh ertoto man Dibata.”

Pengkenaina

Ertoto secara pribadi seh kel pentingna i bas kegeluhenta, gelah geluh pertendinta tetap megegeh ras ngasup kita ngalaken erbage tantangen i bas kegeluhenta alu berserah penuh ras Dibata. Tapi ertoto ras-ras arus tetap sidalaken selaku kita anak-anak Tuhan, sada rarasen i bas Tuhan. Ertoto ras-ras mpersingeti kita maka selaku kula ni Kristus kita arus tetap ersada i bas senang ras susah, arah si e tetap mpeteguhi persadanta ras mpeteguhi kinitekenta man Dibata. Sabab sigejapken la ngasup kita ngalakenca si sada tanpa pertolongen Tuhan.

Bahanta sekali enda pe dalam rangka njemba setiap Runggun gelah kegeluhen Serayan Tuhan rikut ras perpulungen tuhu-tuhu njadiken ertoto e jadi orat nggeluh (gaya hidup). Kesehatian ras ketutusen jadi palas i bas pertoton si ipenangkih kita. Sabab melala siidah kita, asum ertoto syafaat erkiteken ndekah akapna, ku jah ku je ukurna, buka-buka HP-na, tunduh, rsd. Bahkan lit ka anggota jabu si man totoken, asum ertoto enggo ka ia leben lawes ku dapur nikapken pangan-pangan (snack). Teridah i je kurang kesehatian ras ketutusen.
Melala Runggun si enggo lit Tim Doana, si tuhu-tuhu mendukung ras menopang pelayanen Gereja rikut ras perpulungen. Emaka adi lit denga Runggun-runggun lenga lit Tim Doa Runggun maka ibentuklah. Ras iusahaken gelah Serayan Tuhan ikut terlibat ras mendukung i bas Tim Doa enda.

I bas buku Setialah 30, 31, si ngerana kerna Tim Doa (dalam rangka mendukung sasaran pelayanen “Jemaat menjadi pelaku aktif pelayanan”), itulisken piga-piga hal penting:

Tujuan Pelayan Doa:

1. Pelayanan Doa melalui Tim Doa bertujuan untuk memperlengkapi ibadah rutin Gereja, bila ibadah rutin Gereja bertujuan mendeklarasikan Kerajaan Allah melalui pengajaran, ibadah dan penginjilan, maka pelayanan doa menghadirkan Kerajaan Allah lewat doa dan penyembuhan.
2. Tujuan selanjutnya dari pelayanan doa ini ialah menyaksikan kuasa Roh Kudus dalam keseluruhan pelayanan baik penyembuhan, rekonsiliasi, menguatkan jemaat dalam segala pergumulan mereka dan mendatangkan kedamaian.
3. Pelayanan Doa juga bertujuan untuk melatih jemaat untuk berdoa dengan bersungguh-sungguh di dalam iman.
4. Pelayanan Doa bertujuan memberikan kesempatan khusus atau ruang bagi jemaat untuk mengambil bagian (terlibat) secara nyata di dalam pelayanan gereja, mempelajari iman Kristen lebih sungguh dan mendukung pelayanan pastoral di dalam komunitas.

Tanggung Jawab Tim Doa:

1. Tim Doa memiliki tanggung jawab untuk mendoakan baik pelayanan gereja maupun mendoakan semua sisi pelayanan lainnya serta kehidupan anggota komunitas secara luas.
2. Tim Doa bertanggung jawab untuk terus memperlengkapi anggota Tim Doa dengan pelatihan-pelatihan yang dibutuhkan dan pendampingan untuk memastikan setiap anggota tim terus bertumbuh.
3. Sebaiknya seorang dari pertua diberi tugas tanggung jawab khusus untuk mengawasi, mengatur dan menjaga keberlangsungan Tim Doa dalam pelayanan gereja.

Rikutken bahan dage siusahaken lit Tim Doa Runggun bage bas sektor masing-masing. Seh makana tersehi sasaran pelayanen i bas tahun enda, reh buena si terlibat i bas pelayanen ras perpulungenta terlatih bahkan militan i bas ertoto.