SUPLEMEN PA MORIA GBKP TGL. 11 - 17 JUNI 2023

Pdt. Larena br. Sinuhadji (Nd. ReyRapha Tarigan)

Politik

Si Man Ogen : 1 Samuel 8:1-18

Tema : MILIH PEMIMPIN

Tujun : Gelah Moria :

- Meteh pemindon bangsa Israel guna ngangkat sekalak raja

- Muat bagin i bas ngalo-ngalo pemilihen legislatif ras presiden serentak i bas tahun 2024

Penaruh

Ogenta sendah rusur ikataken sebage turi-turin kerna peralihen sistem kepemimpinen i tengah-tengah bangsa Israel, teokrasi nari ku monarki. Secara teoritis sistem pemerintahan teokrasi e me sebuah sistem politik yang dalam praktiknya menjalankan pemerintahan dengan berpegang pada kedaulatan Tuhan. I bas konteks bangsa Israel paksa si e, Dibata si secara langsung mimpin bangsa e erkelangken hakim-hakim. Dibata si muat keputusen-keputusen nandangi bangsa Israel erkelangken hakim-hakim. Sedangken i bas sistem pemerintahan monarki, raja si mimpin secara langsung entah pe raja si muat keputusen-keputusen nandangi rakyatna. Rikutken kesemalen si umum paksa si e, sekalak raja e seri ras dewa-dewa entah pe raja ianggap sebage dibata si harus isembah.

Mpebagesi Kata Dibata

Konteks ogenta sendah, bangsa Israel paksa si e ipimpin sekalak hakim. Rikutken Buku Katekisasi GBKP nina, “Jabatan hakim yaitu penguasa atau pemimpin militer sekaligus orang yang memimpin pengadilan hukum di tengah-tengah orang Israel.” Ertina i jenda, hakim hanyalah sebage suruh-suruhen Dibata saja i bas ngelaksanaken undang-undang entah pe aturen-aturen Dibata. Samuel e me sekalak hakim si mimpin bangsa Israel (1 Sam. 7:17). Kenca enggo metua, iangkat Samuel anak-anakna, Joel ras Abia, jadi hakim i Israel, khususna i Berseba. Tapi kenca enggo iangkat Samuel anak-anakna jadi hakim, turah persoalen. Terjadi sogok-menyogok bage pe kinilabujuren i bas mutusken perkara-perkara i tengah-tengah bangsa Israel. Persoalen-persoalen enda turah erkiteken Joel ras Abia la ngusih lagu langkah bapana, duit ngenca si jadi perayaken kalak enda duana. I bas si e teridah maka Samuel sekalu orang tua la ia ngasup mabai anak-anakna erkemalangen man Dibata. Tentu banci sibayangken uga cedana pusuh Samuel ngenehen perbahanen anak-anakna.

Persoalen-persoalen si terjadi i tengah-tengah bangsa Israel paksa si e ijadiken momentum entah pe kesempaten bangsa e guna mindo sekalak raja bagi bangsa-bangsa si deban si lit i sekelewetna. Samuel la setuju i bas pemindon bangsa e. I bas Alkitab TB-LAI ay. 6 iterjemahken, “perkataan itu mengesalkan Samuel.” Engkai maka Samuel kesal? Mungkin i bas sada sisi ceda denga pusuh Samuel erkiteken perbahanen anak-anakna, janah i bas sisi si deban pemindon bangsa e la sue ras peraten Dibata nandangi bangsa e.

Hal si menarik akap kami kerna pemindon bangsa Israel enda ndai, e me lit sikap kritis bangsa e nandangi pemimpinna. Samuel enggo metua, adi siterusken jadi pemimpin tentu la nari maksimal. Sementara anak-anak Samuel la ngusih lagu langkah bapana si erbahanca terjadi krisis kepemimpinen i tengah-tengah bangsa Israel.

I bas menanggapi pemindon bangsa e, Samuel labo mengandalken gegehna sebage manusia, mis ia ertoto mindo petunjuk i bas Dibata nari. Jawaben Dibata nandangi pemindon bangsa e banci sioge i bas ay. 7-9. Amin pe situhuna Dibata la senang nandangi pemindon bangsa e, tapi isuruh Dibata Samuel guna megiken pemindon bangsa e alu persinget si tangkas kerna resiko-resiko si bakal terjadi adi iangkat sekalak raja i tengah-tengah bangsa e (ay. 10-18). Tapi i bas dampar si deban sekalak raja harus ngelakoken hal-hal si mehuli. Rikutken Buku Katekisasi GBKP ijelasken maka “seorang raja haruslah menegakkan keadilan, mensejahterakan, memberi rasa aman, memikirkan kepentingan-kepentingan rakyat, membantu rakyat dalam meningkatkan ekonomi sehingga jarak antara yang kaya dan miskin tidak menyolok, menyediakan dan mengatur tempat peribadahan sehingga hidup saling mengasihi satu dengan yang lain.”

Amin pe enggo iterangken alu tangkas resiko-resiko si bakal ialami adi iangkat sekalak raja, bangsa e tetap berkeras i bas pemindonna. Emaka ibereken Dibata kai si jadi pemindon bangsa e. Si menarik i bas proses selanjutna, Dibata tetap campur tan i bas nentuken sekalak raja (bdk. Ul. 17:14-20). Ertina amin pe sistem pemerintahan enggo berubah teokrasi nari ku monarki, Dibata tetap ngarak-ngarak bangsa e i bas kegeluhen selanjutna. 

Pengkenaina

Arah ogenta sendah, erlajar kita piga-piga hal, si pemena, pemimpin ras kepemimpinen e me sada keharusen rikutken Kata Dibata i bas Pustaka Si Badia. Dibata si isembah kita e me Dibata kiniraturen, adi la lit pemimpin ras kepemimpinen si erkemalangen man Dibata maka la lit kiniraturen. Emaka harus lit pemimpin ras sistem kepemimpinen si sue ras pertaten Dibata. Paling tidak kitalah lebe Moria harus ngasup menjadi pemimpin si mehuli nandangi dirinta sendiri. Sekalak filsuf Aristoteles pernah ngatakenca, “Sebelum menjadi pemimpin yang baik, jadilah pengikut yang baik.” Ertina erlajarlah jadi pemimpin si mehuli arah kepatuhenta nandangi perentah-perentah Dibata i bas Pustaka Si Badia.

Si peduaken, harus lit sikap kritis nandangi pemimpin-pemimpinta ras kebijaken-kebijakenna. I bas si e tentuna harus lit lebe kepedulianta nandangi pemimpin-pemimpin si lit i sekelewetta. Sikap peduli enda erbahanca sikap kritis si lit i bas kita labo guna menjatuhkan pemimpin tetapi guna nampati pemimpin erbahan kebijaken si benar sue ras peraten Dibata. Adi lit pemimpin si zalim i bas kepemimpinenna, kita pe harus pang bersikap menentang amin pe ikataken i bas Pustaka Si Badia maka pemimpin-pemimpin si lit i sekelewetta itetapken Dibata (Roma 13:1). I bas Perb. Rasul 5:29 ikataken, “Kita harus lebih taat kepada Allah dari pada kepada manusia.”

Tema ras tujun PA-ta sendah ngajuk kita gelah pentar i bas memilih pemimpin. Enda dalam rangka tahun politik i bas negaranta i ja i bas tahun si reh 2024 bakal ilaksanaken pemilu serentak guna memilih presiden, kepala daerah bage pe legislatif. I bas si e tentuna Konfesi GBKP perlu ka jadi rujukenta, khususna Bab VII si ngerana kerna Pemerintah ras Bab VIII si ngerana kerna Politik.

Bab VII Pemerintah. Kami percaya bahwa:

• Pemerintah adalah hamba Allah untuk menyejahterakan bangsa dan negara (Roma 13:4-5). Dalam pemahaman itu, orang Kristen bermitra, mendoakan dan taat kepada pemerintah (Yer. 29:7; Mat. 22:21; 1 Tim. 2:1-2). Di samping itu, orang Kristen harus berdialog dan menyuarakan suara kenabian terhadap pemerintah dalam melaksanakan kewajibannya untuk menegakkan kebenaran dan keadilan (Maz. 72:1-4).

Bab VIII Politik. Kami percaya bahwa:

• Politik merupakan upaya untuk menata kehidupan masyarakat demi kesejahteraan bersama.
• Politik menjadi sarana kesaksian dan alat untuk menghadikan Kerajaan Allah di tengah masyarakat.
• Gereja menolak setiap upaya partai politik, sekelompok orang atau perorangan yang menjadikan gereja sebagai kendaraan politik.
• Dalam pentas politik, gereja hadir sebagai garam dan terang baik dalam proses pencerahan masyarakat, mengkritisi kebijakan dan memberikan pertimbangan dalam pengambilan keputusan-keputusan politik.
• Gereja dipanggil mempersiapkan warganya untuk diutus dalam politik.

I bas si e tentuna mari radu ras kita peduli nandangi bangsa ras negaranta. Sitotoken genduari nari kerna kerina proses persiapan ras pelaksanaan pemilu serentak i bas tahun si reh. Ula kita golput, entah pe la ikut muat bagin i bas pemilu serentah enda. Genduari nari enggo ndarami informasi kerna rekam jejak calon-calon pemimpin bangsanta. I bas waktuna kari banci terpilih pemimpin-pemimpin si erkemalangen man Tuhan. Dibata si mpegegehi kita.