SUPLEMEN PA MAMRE GBKP TGL. 18 - 24 JUNI 2023

Pdt. Larena br. Sinuhadji (Nd. ReyRapha Tarigan)

Teks : Matius 25:31-46

Tema : MAMRE NGGIT NAMPATI

Tujun : Gelah Mamre :

- Meteh orat geluh (nampati) manusia i lebe-lebe Dibata rikutken teks

- Muat bagin mediate ras erpemere ku unit-unit pelayanen GBKP

Penaruh 

Lit dua istilah jaman gundari kerna kininggiten guna nampati kalak si deban (keinginan untuk menolong orang lain), e me empati ras altruisme. Adi empati akap kami enggo rusur sibegi, tapi altruisme mungkin lit denga kita si mbaru denga megisa. Altruisme i bas erti si sederhana e me perilaku menolong orang lain yang didasari oleh keinginan untuk menolong dan dilakukan tanpa pamrih. Istilah altruisme ras empati enda akap kami ilitken erkiteken potensi guna nampati kalak si deban lit i bas diri manusia. Adi ngerana kita kerna nampati, entah pe sisampat-sampaten, labo hal si mbaru entah pe asing erkiteken enggo biasa i bas kegeluhenta si tep-tep wari, apai ka nampati enda merupaken sada bagin si penting i bas kinitekenta.

Mpebagesi Kata Dibata

Ogenta sendah lit i teruh judul perikop “Ukumen i bas wari pendungi” (i bas Alkitab TB-LAI, “Penghakiman terakhir”). Bagin enda rusur isebut cerita apokaliptis, si nuriken kerna gambaren pendungi jaman i ja lit pengadilen terakhir man kerina jelma. Perikop enda merupaken bagin penutup ajaren Yesus kerna pendungi jaman (bindu 24-25). Pengadilen si terakhir i bas perikop enda igambarken bagi kai si terjadi i bas ruang sidang i pengadilen, lit je hakim ras lit si iadili, e me kerina bangsa. 

Perikop iawali alu gambaren kerehen Anak Manusia (Yesus Kristus) i bas kemulianNa sebagei Raja guna menghakimi kerina manusia. Manusia ibagi ku bas dua terpuk. Terpuk si pemena e me manusia si ipepulung i sebelah kemuhen. Kemuhen i jenda simbol manusia si mehuli, si nggeluh sue ras peraten Dibata. Kerina manusia si sebelah kemuhen enda enggo ipasu-pasu Dibata janah ngaloken kinirajan si enggo isikapken Dibata. I bas ay. 34 - 40 lit dialog antara Hakim ras manusia si mehuli ndai. I bas dialog enda jelas si jadi ukuren guna mengadili e me tindaken pelayanen kasih man kalak si sangana lit i bas kesusahen. Si melihe ibere man, si muas ibere minem, si tandang ibere tumpangen, si manjang-manjang ibere uis, si sakit iadep-adep, janah si lit i bas penjara idahi. Kepedulian man kerina kalak si sangana lit i bas kesusahen seri ras kepedulian man Dibata. Kerina manusia si sebelah kemuhen bengket ku bas kegeluhen si tuhu-tuhu si la erkeri-kerin.

Versi Audio klik : https://www.youtube.com/watch?v=dp66HubSQgY

I bas ay. 41-45 terjadi dialog si serupa. Terpuk si peduaken e me si ipepulung i sebelah kawes. Kawes i jenda simbol manusia si la mehuli, si jahat, si la nggeluh sue ras peraten Dibata. Seri bagi terpuk si pemena ndai, si jadi ukuren guna mengadili e me tindaken pelayanen kasih man kalak si sangana lit i bas kesusahen. I bas terpuk manusia si sebelah kawes enda la lit i bas ia empati kepedulian nandangi kalak si lit i bas kesusahen. Si melihe la ibere man, si muas la ibere minem, si tandang la ibere tumpangen, si manjang-manjang la ibere uis, si sakit la iadep-adep, janah si lit i bas penjara la idahi. E maka ipelawes Hakim ndai kerina manusia si sebelah kawes enda masuk ku bas api si la ernimpet-nimpet si enggo isikapken man Iblis ras malekat-malekatna guna ndatken ukumen si rasa lalap.

Pengkenaina

Tema ras tujun i bas PA-ta sendah ngajuk kita Mamre gelah semakin ergiah-giah i bas nampati. Orat nggeluh nampati i jenda jelas palasna e me kiniteken man Dibata i bas Yesus Kristus. I bas ogenta jelas maka manusia si ndatken pasu-pasu ras ngaloken kegeluhen si tuhu-tuhu si la erkeri-kerin e me kita si ngelakoken kerina si jadi peraten Dibata i bas kegeluhen si tep-tep wari, khususna i bas nampati kalak si membutuhken penampat. Selain ogenta sendah, i bas Pusata Si Badia melala ayat-ayat si ngajuk kita gelah nampati umpamana Perb. Rasul 20:35; Gal. 6:2; Ef. 4:2 (bhs. Ind.); rsd. Tapi si paling penting i jenda e me pengalamenta i bas kita ngaloken penampat i bas Dibata nari. Sigejapkenlah maka tuhu mbelin kel kepedulian Dibata nandangi kerina kalak si tek man baNa. Adina enggo tuhu-tuhu sigejapken keleng ate Dibata si mbelin i bas kegeluhenta, maka penampat si ibereken kita man kerina kalak si membutuhken penampat, e me pengataken bujurta man Dibata si ilakoken kita tanpa pamrih.

I bas tujun si peduaken, iajuk kita gelah ikut muat bagin i bas mediate ras erpemere ku unit-unit pelayanen GBKP (PPOS, PAK Gelora Kasih, YKPD Alpha Omega, rsd.). Man banta si sedekah enda enggo mediate ras erpemere mari radu ras sitingkatken kualitas ras kuantitasna, labo saja i bas bentuk materi tapi pe i bas bentuk-bentuk si deban si banci semakin meningkatken kualitas pelayanen i bas unit-unit pelayanen GBKP enda.