SUPLEMEN PA MORIA GBKP TGL. 4 - 10 JUNI 2023

Pdt. Larena br. Sinuhadji (Nd. ReyRapha Tarigan)

 

Bangsa Ras Negara

 

Si Man Ogen : Kejadin 41:37-43

Tema : SIKAP NGATURKEN NEGERI

Tujun : Gelah Moria :

- Meteh kerna pendahin Kesah Dibata i bas kegeluhen Yusuf

- Muat bagin numpak-numpak kemajun bangsa ras negara

Metode : Diskusi

 
Penaruh
 
Kinitekenta ngajuk kita gelah ikut muat bagin secara proaktif i bas berbangsa ras bernegara. Nabi Yeremia ngajuk kita gelah erdahin guna kiniulin kota inganta tading janah iajuk ka kita guna notoken keperlun kota e (Yer. 29:7). Tuhan Yesus pe ngajuk kita gelah taat pajak, “bereken man pemerentah Roma kai patut ibereken man bana.” I bas kesempaten enda erlajar kita mulihken kerna kepedulianta nandangi kiniulin ras kemajun bangsa ras negaranta.
 
Mpebagesi Kata Dibata
 
Si man ogenta sendah li i teruh judul “Jusup jadi wakil raja i Mesir”, i bas terj. TB-LAI nari nina, “Yusuf di mesir sebagai penguasa”. Judul i bas bhs. Ind. nari lebih tepat sebab si lebih itekanken i bas perikop enda e me kuasa si ibereken raja man Yusuf guna mpekena-kena bangsa ras negara Mesir.
 
Turi-turin kerna Yusuf si iangkat jadi wakil raja Mesir akap kami mungkin enggo iteh kita janah mungkin enggo rusur sibegi entah sioge kita. Tapi guna me-refresh ingetenta i jenda mulihi ituriken kami secara garis besar kerna Yusuf enda. Yusuf e me anak Yakub. Lit 12 anak dilaki Yakub, e me : Ruben, Simeon, Lewi, Yehuda, Isakhar, ras Zebulon (i bas ndeharana Lea nari), Yusuf ras Benyamin (i bas ndeharana Rahel nari), Dan ras Naftali (i bas Bilha gundikna nari), Gad ras Asyer (i bas Zilpa gundikna nari), janah lit isebutken sada anak diberuna arah Lea nari si tergelar Dina (bdk. Kej. 30 & 35). Rikutken urutenna, Yusuf e me anak Yakub si pe-11-ken. Sanga umurna 17 tahun, Yusuf idayaken senina-seninana man rombongen kalak Ismael erkiteken nembeh ras cian ate senina-senina man Yusuf si datken ngena ate bapana lebihen asangken man senina-seninana (Kej. 37). Ibaba rombongen kalak Ismael Yusuf ku Mesir. Amin pe nguda denga Yusuf tapi dewasa ia i bas ngalaken kerina kiniseran si nialamina i Mesir bekas pengarak-ngarak Tuhan. I bas Kej. 39:2 ikataken, “TUHAN si ngarak-ngarak Yusuf, seh maka sangap ia i bas kerina pendahinna”. Sanga i bas penjara pe tetap ia iarak-arak ras ipasu-pasu Tuhan seh makana penjaga penjara pe ngena ate man bana (Kej. 39:21). I bas Kej. 39:23 ikataken nina, “erkiteken TUHAN si ngarak-ngarak Yusuf, kasa kai si idahikenna jore kerina”. Labo terjeng je saja, ibereken Dibata kepentaren man Yusuf guna ngertiken nipi (Kej. 40). Ertina, i bas kiningudan Yusuf, tutus ia i bas kinitekenna man Dibata seh makana ibereken Dibata kesangapen ras kejoren i bas geluhna.
 
Ogenta sendah nuriken kerna puncak kesangapen ras kejoren Yusuf i Mesir. I bas paksa si tepat si enggo itentuken Dibata, iangkat raja Mesir Yusuf jadi wakilna. Kepentaren Yusuf i bas ngertiken nipi erbahanca raja Mesir takjub erkiteken enggo terjabab kai si jadi penungkunen raja e kerna antusen nipina. Tapi Yusuf la meganjang ukur, i bas ay. 16 ikataken Yusuf man raja, “Labo terantusi aku, o Raja, tapi Dibata banci mereken antusen si mehuli”. Labo terjeng je saja, Yusuf pe ibereken Dibata kepentaren guna erbahan rencana si brilian guna mengantisipasi ancamen kelihen si bakal terjadi i belang-belang doni bagi si enggo iidah raja Mesir i bas nipina (ay. 33-36). Rencana si brilian enda ialoken raja ras pegawai-pegawaina. Erkiteken reh takjubna raja Mesir man Yusuf, turah pengakun kerna Dibata si erdolat si isembah Yusuf i bas raja Mesir nari nina, “Labo lit dat kita jelma tersikapen asang Yusuf enda, sekalak si lit Kesah Dibata i bas dirina jine. Enggo icidahken Dibata man bandu kerina kejadin enda. Erkiteken si e teridah maka ganjangen pemetehndu ras kebeluhendu asang ise pe” (ay. 38-39). Emaka itangkuhken raja Mesir Yusuf jadi wakilna. Kerina kalak i belang-belang taneh Mesir mehamat man Yusuf, e me tanda si tersirat maka iakuken kalak Mesir Dibata si erdolat i bas kegeluhen Yusuf.
 
I bas puncak kejayanna tetap denga Yusuf meteruk ukur, idahikenna kerina tugas tanggung jawabna sebage wakil raja alu mehuli seh makana la lit terjadi kelihen i taneh Mesir. Alu meteruk ukur ialemina senina-seninana si enggo erbahan si jahat man bana, i bas Kej. 50:20 ikataken Yusuf nina, “Jahat sura-surandu man bangku, tapi enggo isalihken Dibata e jadi si mehuli, gelah arah e banci iselamatken Dibata kesah enterem kalak si nggeluh denga genduari”. Iingetna denga keluargana si sangana i bas kiniseran erkiteken kelehen si terjadi i belang-belang doni, memahat ia  man orang tuana, ibabana bapana ras kerina keluargana Israel nari ku Mesir, isikapkenna ingan si mehulina man bapana ras keluargana gelah banci tersikapen geluhna. Yusuf jadi pasu-pasu man kalak Mesir bage pe man keluargana. Luar biasa kai si ilakoken Yusuf enda, erkiteken melala kalak i bas puncak kejayanna meganjang ukurna, la mediate nandangi kalak si deban, ras lanai ingetna kai pe asangken kesangapen ras kejoren dirina jine.
 
Pengkenaina
 
Tema ras tujun i bas PA-ta sendah mabai kita gelah semakin mencintai bangsa ras negara inganta nggeluh, e me Indonesia. Kai si banci siusih arah tokoh Yusuf erpalasken ogenta sendah adi sikaitken ras tema bage pe tujun PA-ta sendah? Si pemena lebe erlajar kita arah Yusuf i bas kinitekenna si paguh man Dibata. Kiniteken Yusuf enda teridah arah kiniseran bage pe kesangapen si ialamina. I bas kerina keadaan, tetap paguh kiniteken Yusuf man Dibata. Enda lebe palasta i bas kita berkarya i tengah-tengah bangsa ras negaranta.

 

Si peduaken, erkiteken kinitekenna si paguh, ipengasup Dibata Yusuf erbahan si mehuli i bas setiap keadaan. I bas rumah Potifar mehuli ibahanna kerina dahin si idahikenna. I bas penjara pe, kai pe dahin si mehuli si banci ibahan Yusuf, ibahanna. Erbahanca kepala penjara pe ngena ate man bana. Sanga ibere kepercayaan guna ngertiken nipi raja, e ilakokenna alu mehuli. Sanga ibere kepercayaan jadi wakil raja guna ngaturken negara Mesir gelah terhindar i bas bencana kelihen, e pe ilakokenna alu mehuli. Erlajar kita arah pengalamen Yusuf, i bas kerina keadaan, baik susah entah pe senang, tetap ia ngasup berkarya untuk bangsa ras negara i ja ia tading.
 
Si peteluken, amin pe enggo lit i bas puncak karirna alu jabaten wakil raja, tetap ia meteruk ukur. Ngasup denga ia ngehamati orang tuana ras mperdiateken senina-seninana rikut keluargana. Enda banci jadi sada cermin man banta si gundari lit jabatenna i bas pemerintahan, baik jabaten si rendah bage pe jabaten si meganjang. Tetap meteruk ukur ras kataken bujurlah man Dibata erkiteken ibereNa kesempaten kam kerina guna jadi Apartur Sipil Negara (ASN). Pergunakenlah kesempaten si lit guna berkarya demi kemajun bangsa ras negaranta.
 
I bas Konfesi GBKP lit piga-piga bab si berkaiten ras kegeluhen berbangsa dan bernegara. Si pemena, Bab V kerna Masyarakat, iajuk kita gelah menjadi garam ras terang dengan menerima dan menghargai keberagaman. Si peduaken Bab VII kerna Pemerintah, iajuk kita gelah bermitra, mendoakan dan taat pada pemerintah sebab tek kita maka pemerintah e me hamba Allah untuk menyejahterakan bangsa dan negara. Selain si e, iajuk kita gelah kritis nandangi kebijakan-kebijakan si ibahan pemerintah alu berdialo ras menyuarakan suara kenabian. Si peteluken, Bab VIII kerna Politik, iajuk kita gelah menggunaken politik sebage sarana kesaksian ras alat guna menghadirkan nilai-nilai Kerajaan Allah. Mari radu ras kita muat bagin i bas numpak-numpak bangsa ras negaranta Indonesia gelah gelar Dibata pe semakin ipermuliaken.