Pdt. Larena br. Sinuhadji (Nd. ReyRapha
Tarigan)
Teks : Markus 1:40-45
Tema : ERGIAH-GIAH ERDIAKONIA
Tujun : Gelah Mamre :
- Meteh maka Yesus me si pepalem pinakit
- Ngelakoken perkunjungen diakonia ras
mpetetap ukur
Penaruh
Sekalak teolog pernah ngatakenca bagenda
nina, “The church can live without buildings. Without diakonia the church
dies.” Terjemahenna kurang lebih, gereja adi la lit gedungna banci denga ia
nggeluh, tapi adi la lit diakoniana mate me gereja ndai. Ertina, pelayanan
kasih merupaken jiwa entah pe nyawa gereja. I bas piga-piga gereja si deban
marturia ras diakonia ipersada, jadi kesaksian dan pelayanan, isingkat
“kespel”. Sebab memang pelayanan kasih labo terbatas guna anggota gereja saja
tapi pe man kerina kalak si membutuhken. I bas si e kita melayani sekaligus
bersaksi kerna keleng ate Kristus. I bas PA-ta sendah mulihi kita isingetken
kerna Diakonia.
Mpebagesi Kata Dibata
Teksta entah ogenta sendah ibuat i bas
Injil Markus i teruh judul perikop “Ipepalem Yesus sekalak si gadamen”.
Turi-turin enda lit paralelna i bas Injil Sinoptik si deban e me Matius 8:1-4
ras Lukas 5:12-16. Banci kari iogenndu i bas inganndu masing-masing guna
memperkaya pengangkanta kerna ogenta sendah.
I bas ogenta sendah ituriken maka sanga
Yesus nyiari kerina kuta-kuta i Galilea guna meritaken Berita Si Meriah, reh me
sekalak gadamen ndahi Yesus. Gadamen (kusta) i bas bahasa Yunanina lepros,
merujuk ku piga-piga jenis pinakit kulit si parah ras menyebar ku kerina anggota
badan, jadi labo terjeng kusta saja. I bas si e tek kalak Jahudi maka pinakit
enda e me ukumen i bas Dibata nari (bdk. Ul. 28:27). E maka i bas Im. 13, kalak
si kena pinakit kulit e ndai harus ikucilken erkiteken ianggap najis, la ia
banci bersentuhan ras kalak si deban. Ertina kalak si gadamen mengalami
penderitaan baik secara fisik bage pe psikis erkiteken ikucilken i bas
masyarakat nari.
Nembah erjimpuh sekalak si gadamen ndai i
lebe-lebe Yesus mindo perkuah ateNa, nina, “Bicara nggit Kam, ngasup kap Kam
pepalem aku.” Mekuah ate Yesus, idudurkenNa tanNa janah ijemakNa kalak si
gadamen ndai, je nari nina Yesus man bana, “Nggit Aku, malemlah kam.” I jenda
teridah maka Yesus nggit njemak kalak si gadamen ndai padahal rikutken aturen
Undang-undang, la banci bersentuhan ras kalak si lit i bas ia pinakit kulitna.
Enda akap kami simbol penerimaan si tulus nandangi kalak si mengalami
penderitaan ganda, baik fisik ras psikis, erkiteken ikucilken i bas masyarakat
nari.
Kenca enggo ijemak Yesus, mis malem gadamenna
janah mejelis pe dagingna. I bas Alkitab terj. TB-LAI nina, “Seketika itu juga
lenyaplah penyakit kusta orang itu, dan ia menjadi tahir.” Tahir i jenda
maksudna malem i bas sudut pandang agama Yahudi nari. I bas si e, si banci
menyataken sekalak si gadamen e enggo tahir entah lenga e me Imam-imam agama
Yahudi (bdk. Im. 14:2; dst.). Emaka i bas ay. 44 isuruh Yesus kalak si gadamen
ndai ncidahken dirina man Imam maksudna gelah dat legalisasi maka kalak si
sakit ndai enggo tahir ras enggo banci bergabung mulihken ku tengah-tengah
masyarakat. Rikutken Im. 14:1-32 lit upacara khusus i bas prosesi pentahiran,
emaka lit piga-piga rubia si harus ibaba ras ipersembahken guna prosesi
pentahiran enda.
Lit si menarik akap kami i bas ay.
44-45. Ikataken Yesus man kalak si enggo malem ndai, “Jaga, ola turiken man ise
pe kerna si enda.” Kai enda maksudna? Enda maksudna gelah kalak si enggo malem
i bas gadamen ndai fokus ku bas Berita Si Meriah. Sebab tujun si utama i bas pelayanen
Yesus e me guna meritaken Berita Si Meriah (Mehuli) kerna kerehen Kinirajan
Dibata (bdk. Mrk. 1:14; 15; 38), i bas terj. TB-LAI, “memberitakan Injil
Allah”. Tanda-tanda sengget e me hanya salah sada media si igunaken i bas
erberita erpalasken perkuah ate Dibata. Janah hal enda memang teridah i bas ay.
45, si iberitaken kalak si enggo malem ndai labo Berita Si Meriah tapi berita
maka ia enggo malem i bas pinakitna nari. Adi sibandingken ras turi-turin i bas
Luk. 17:11-19, i bas 10 kalak si enggo ipepalem Yesus, sekalak ngenca si reh
mulihken guna muji Dibata janah erjimpuh i lebe-lebe Yesus guna ngataken bujur.
Ertina, kalak si ndarami Yesus hanya untuk datken mujizat ngenca, labo lit i
bas ia perobahen geluh si tuhu-tuhu erpalasken kiniteken man Dibata.
Pengkenaina
Tema ras tujun PA-ta sendah ngingetken
kita mulihi maka salah sada tugas tanggung jawab kalak si tek si penting e me
ncidahken keleng ate Kristus alu nampati kalak si deban entah pe erdiakonia. GBKP
secara kelembagaan enggo erpala-pala ndalanken diakonia alu mehuli. I bas buku
Garis Besar Pelayanan (GBP) GBKP Tahun Pelayanan 2021-2025 hlm. 29-30 ikataken,
“GBKP pada dasarnya telah cukup banyak berkiprah dalam kehidupan bergereja,
bermasyarakat, berbangsa, dan bernegara, khususnya dalam bidang Diakonia.”
Ertina diakonia si ilakoken GBKP secara kelembagaan enggo seh ku tingkat
nasional. Janah rikutken cakupen diakonia secara holistik pe melala si enggo
iupayaken GBKP labo terjeng diakonia secara karitatif saja. Tapi amin bage gia
tentuna melala denga si harus ipesikap GBKP i bas ndalanken Diakonia.
Lit piga-piga hal si banci sirenungken
arah ogenta sendah. Si pemena e me kerna palas i bas kita erdiakonia. Palasta
tentuna keleng ate, ras kepedulian entah pe keberpihakkan Dibata nandangi kalak
si lemah, menderita, entah pe kaum marginal. Palas enda akap kami sangat
menentukan i bas praktekna. Rikutken ogenta sendah, mekuah ate Yesus emaka
nggit IA mpepalem kalak si gadamen. Adi enggo tuhu-tuhu sigejapken keleng ate
Dibata secara pribadi, tentu i bas kita erdiakonia pe proses bage pe hasilna mehuli
ras maksimal guna kemulian gelar Tuhan Yesus. I bas si e tentuna harus leben
sigejapken keleng ate Dibata man banta secara pribadi.
Si peduaken, kenca enggo ipindo kalak si
gadamen perkuah ate Yesus guna mpepalemsa, mis ipepalem Yesus kalak si gadamen
ndai. Salah sada pengertin i bas kata “diakonos” (dilaki) entah pe “diakonissa”
(diberu) e me, kalak si selalu
siap sedia hadir pada saat dibutuhkan,
proaktif melihat kebutuhan orang yang dilayani. Emaka mari siusih kai si
ilakoken Tuhan Yesus si cepat tanggap i bas nampati kalak si membutuhken
penampat. Jalur birokrasi biasana jadi penghambat i bas kita cepat tanggap
nampati kalak si membutuhken penampat.
Si peteluken, i bas kita erdiakonia sekaligus
lit je proses saling menguatkan kiniteken kerina pihak si terlibat, khususna i
bas perpulungen kalak si tek. Ula sempat terjadi bagi ogenta sendah i ja
enterem kalak si hanya mengharapkan mujizat i bas Yesus nari tapi la beritakenna
Berita Si Meriah. Ertina erdiakonia labo terjeng nehken entah pe ngaloken tanda
keleng ate si berbentuk materi saja, lit je proses saling menguatkan kiniteken.
I bas pihak si ngaloken penampat, tek ia maka penampat si tuhu-tuhu rehna i bas
Dibata nari, Gereja hanyalah saluran berkat Tuhan. Man pihak si nehken pe
iingetna maka tugas tanggung jawab si utama i bas ia nehken penampat e me
keleng ate Dibata guna kemulian gelar Dibata.
Si peempatken, mari radu ras
sitingkatken kualitas ras kuantitas Diakonia i bas Runggunta masing-masing.
Diakonia labo terjeng i bas bentuk karitatif saja tapi harus meningkat ku
reformatif ras transformatif rikutken prioritas kebutuhen i bas Runggun
masing-masing. Umpamana adi lit perpulungen si sakit labo terjeng perkunjungen,
nehken tanda kekelengen, ras mpetetap ukur. Lit upaya-upaya si deban gelah
perpulungenta pe reh sehatna ras terhindar i bas pinakit nari. Emaka ilitken
klinik si rutin buka setiap wari Minggu i bas Runggunta, gelah perpulungen pe banci
sedini mungkin mendeteksi pinakit. Ilitken seminar-seminar kesehatan secara
rutin gelah lit perobahen ku bas gaya hidup si lebih sehat. Pangan-pangan i bas
PJJ ras PA Kategorial tuhu-tuhu mperdiateken kesehaten, labo terjeng ntabehna
saja. Ilitken grup entah pe tim jalan sehat, bersepeda, ras olah raga si deban
secara rutin. Rsd.-na. Enda akap kami diakonia si mencakup teluna, karitatif, reformatif ras transformatif. Dibata si mpegegehi kita i bas kita erdiakonia.
Tidak ada komentar:
Posting Komentar