SUPLEMEN PA MORIA GBKP TGL. 2 - 8 JULI 2023

Pdt. Larena br. Sinuhadji (Nd. ReyRapha Tarigan)

Si Man Ogen : Kuan-kuanen 2:1-10

Tema : MESEKSEK NDATKEN PENGAJAREN

Tujun : Gelah Moria :

- Meteh uga pentingna ndatken kepentaren guna nehken pengajaren

- Meseksek ngajari anak-anak

Metode PA : Ceramah Parenting

Penaruh

Pendidiken e me pilar utama si sehkel pentingna man kerina kalak. Arah pendidiken iarapken tambah pemeteh terlebih lit perubahen paradigma (cara berpikir) si lebih maju (open minded). Emaka pas kel, kata bijak si ngatakenca, la pernah lit kata finish (selesai) i bas kita erlajar (long life education). Arah ise pe, arah kai pe (rubia-rubia, tumbuh-tumbuhen), ras i japa pe (la ibatasi ruang ras waktu) banci terus kita erlajar. Si pasti kalak pembelajar geluhna erguna man kalak si deban. 

I bas tradisi Yahudi, pendidiken agama e me tanggung jawab orang tua, tanpa terkecuali man orang tua si sibuk sebage pekerja. Orang tua ertanggung jawab mengajar anak-anakna, bahkan orang tua mengajar seh ku kempu sebab umumna keluarga Yahudi tading i bas sada rumah raduken ras keluarga besar. Adi siidah leluhur kalak Israel, Abraham, Ishak, Yakub menjadi keluarga man kerina keluargana. Sebagai bapa, sebage imam, labo saja bapa e sebage pengantara  antara Tuhan ras umat, tapi pe sebage guru si ngajarken kerna perbahanen Tuhan si mulia ras pe padan Tuhan man bangsa enda secara turun-temurun.

Mpebagesi Pengangkan Kerna Ogen

Kepentaren (pemeteh) e me erta si mehergana (ay. 4). Arah pengalamenna, Salomo nggejapken uga ergana kepentaren lebih asa emas, pirak, permata ras erta si meherga si debanna (bdk. Kuan. 8:10-12; 16:16). Uga carana maka lit kepentaren i bas manusia?

Si pemena. Jelas maka manusia iperlengkapi Dibata alu pemeteh ras kepentaren. Kepentaren, pemeteh rehna i bas Dibata nari arah manusia erkemalangen man Dibata. Ay.6 Tuhan kap si mereken kepentaren, i bas Ia nari kap manusia ndatken pemeteh ras pengertin. Bage pe bas Kuan-kuan 1:7, “Bena-bena kepentaren e me erkemalangen man Tuhan Dibata”. Yakobus 1:5, “Tapi adi lit i bas kam si kurang kepentarenna, ertotolah ia man Dibata si mereken kepentaren man bandu”. Kepentaren e labo idatken secara otomatis, tapi tetap sipindo man Tuhan, dingen nggeluh i bas erkemalangen man baNa.

Si peduaken. Lit proses si arus sibentasi. La banci instan. I bas sepanjang geluhta tetap tekun erlajar/pembelajar. Piga-piga proses rikutken teks ogenta sendah : 1) Keikhlasan untuk menerima pengajaran, nasehat. Ay. 1 "pelajarilah si ku kataken man bandu o anakku", terj. Ind., "Hai anakku, jikalau engkau menerima perkataanku dan menyimpan perintahku di dalam hatimu." 2) Iulih-ulihi gelah ula lupa. 3) Megermet ras berusaha ngantusisa kai si enggo ipelajari. Ertina, arah kerina situasi si terjadi i bas geluhta subuk suka duka banci jadi sada pelajaren si meherga banta. Lit lalap makna i bas kerina peristiwa si terjadi i bas geluhta. Lit pesan moral si isehken Dibata, si banci jadi sada kepentaren man manusia. Megati situasi, perbeben geluh erbahansa manusia reh pentarna bas geluhna. Bahkan i bas peristiwa si la bagi ukur, banci tetap mendewasaken kita, erbahanca kita naik kelas. Contoh, asum Covid melanda, melala kalak akhirna ngadi i bas erdahin ras beralih menjadi pengusaha online, beluh erbahan kue, mengisi konten kreatif di YouTube, rsd.

Si peteluken. Kepentaren arus iupayaken, iperjuangken, iusahaken desken ndarami emas ras erta si terbuni. Ertina, kepentaren arus jadi hal si penting i bas geluhta, si mehergana i bas geluhta. Erkiteken arah litna kepentaren, sieteh mbedaken apai si mehuli, apai si jahat dingen sidalanken si mehuli, sebab palas kepentaren e me erkemalangen man Tuhan.
 
Uga ulih ras guna kepentaren? Jelas, kepentaren erbahanca sieteh kai ertina erkemalangen man Tuhan ras ndatken pemeteh kerna Dibata. Sada kesangapen, keuntungen jadi kalak si erkemalangen man Tuhan ras meteh perukuren Dibata, hikmat si megajangna erbahanca kita tenang nggeluh, nampati kita, meteh apai si mehuli ras si la mehuli ras ngasup ndalanken si ngena ate Tuhan. Kepentaren erbahanca kalak jadi kalak benar ras bujur, ndatken ampang-ampang i bas kerina godaan ras si jahat. Kalak si setia, benar, bujur ugapa pe pasti isampat Dibata i bas kerina godaan ras si jahat. Ikawali Tuhan ras iampang-ampangi Tuhan. Kalak si ngayaki kepentaren ulihna maba kesenangen. Amina pe proses si ibentasi labo gampang, mbue tantangen, tapi erkiteken mindo tetap hikmat Tuhan, setia ndalanken kebenaren  (tetap berintegritas) maka kedungenna maba kemalemen ate man bana.

Versi Audio Silahkan Klik : https://www.youtube.com/watch?v=uLavWyRsnWc

Pengkenaina

Tema ras tujun i bas PA-ta sendah mulihi memotivasi ras mpersingeti kita uga pentingna kepentaren ras pemeteh. Perenungen si banci jadi refleksi man banta, apakah kita sebage nande pembelajar? Senang ngaloken informasi, pembinaan, pengajaren subuk si sifatna formal entah pe informal. Formal i jenda, labo terjeng bangku sekolah tapi ‘di kenca lit pembinaan-pembinaan si berkaiten ras kai saja pe nggit kita ngikutisa, umpamana: parenting, kesehaten, ketrampilan memasak, bage pe si berkaiten ras bidang kerohanian, semangat kita ngikutisa. Pernyataan “belajar seumur hidup” (long life education) tuhu nggeluh i bas dirinta sebage nande. Moria terus-menerus erlajar gelah ngasup ka jadi guru hikmat man anak-anakna.

Bahkan pengajaren utama si arus nggeluh i bas diri orang tua (Moria) e me Firman Tuhan. Adi siperdiateken i bas kitab Ul. 6:5-6 si rusur ikataken “Shema Israel”, i ja tanggung jawab orang tua mereken pengajaren man anak-anakNa kerna Dibata si esa, arus berulang-ulang isehken (iulih-ulihi) ras i-sharing-ken (icakapken) asum kundul, i bas perdalanen, pekesahken, rsd. Man kalak Yahudi, Kitab Suci e me sumber utama guna banci nandai pribadi Dibata. Emaka sada kewajiben man orang tua mpetandaken Tuhan sebage pencipta, si mada kegeluhen, ingan penalemen seh makana anak-anak pe mbiar (erkemalangen) man Tuhan. Bahkan mbue pengalamen i ja arah pelajaren menghafal Taurat si merupaken dasar keimanen anak-anak Yahudi si kedungenna mabai anak-anak Yahudi itandaina identitasna, keyakinenna ras sangat militan nandangi kinitekenna man Dibata. Uga kita man anak-anakta i bas paksa enda? Enggo nge siajarken firman Tuhan man anak-anakta, lit nge ibadah keluarganta? Ula lebe silakoken ibadah keluarga bersama, terkadang erkiteken kesibukenta, kita sendiri la lit waktu guna bersaat teduh, erlajar kerna Kata Dibata ras mindo kepentaren i bas Dibata nari sebage orang tua. Selain kita ngajarken kerna hal si mehuli man anakta, maka kita pe arus jadi usihen si mehuli man anak-anakta (role model).

Ras tujuan si peduaken, meseksek ngajari anak. Sebage Moria, konsisten ras ula ermedu-medu tetap siajarken anak-anakta. Pola asuh (parenting style) siarapken sebage kita orang tua e me support (dukungenta) man anak arus sedalanen ras ekspetasinta man anakta. Ula kari dukungenta kurang tapi ekspetasi terlalu tinggi, entah pe sebalikna dukungen tinggi kai pe sibereken, tapi la lit ka pe harapenta man anakta. Bahkan si parahna, dukungen ras ekspetasi sama sekali la lit man anakta. Enggo pasti anak-anakta labo mehuli kari masa depanna. Tetaplah sipindo kepentaren man Tuhan i bas kita jadi wakil Tuhan nandangi anak-anakta.