SUPLEMEN PJJ GBKP TGL. 18 - 24 JUNI 2023

Pdt. Larena br. Sinuhadji (Nd. ReyRapha Tarigan)

Tema : RENDE MUJI TUHAN (Keluaren 15:1-8)

(Tim Kesaksian Ekspresif)

Penaruh

Bapa Gereja Agustinus pernah ngatakenca “Qui bene cantat, bis orat” ertina, “ia yang bernyanyi dengan baik sama dengan berdoa dua kali.” Pernyataan enda nuduhkenca man banta, seh kel pentingna rende muji Tuhan, sabab i bas kita rende situhuna seri ras dua kali kita ertoto. Bahkan adi siperdiateken i bas ibadah-ibadah si ilakoken kita, rende muji Tuhan mengambil porsi cukup mbue, i ja kurang lebih 6 seh 7 kali kita rende. 

Janah tujun utama i bas rende muji Tuhan i bas ibadah si ilakoken kita e me memuliaken Tuhan. I ja arah rende muji Tuhan, perpulungen jumpa ras Tuhan ras perjumpaanna e men-trasformasi (mengubah) geluhna. Emaka si jadi pusat ibadah e Tuhan labo liturgos, pendeta, entah pe tim singers.
 
Mpebagesi Kata Dibata

Perikopta, Keluarem 15:1-8 rusur igelari “Nyanyian tepi laut” ibahan kenca bangsa Isarel ngepari Lawit Merah. Janah ende-enden Musa enda pe banci ikataken ende-enden si pemena si tercatat i bas Pustaka Si Badianta (PL). Pujian enda ncidahken penemani ras pengarak-ngarak Tuhan nandangi bangsa Israel asum iayak-ayak Firaun ras tenterana kenca ndarat Mesir nari. Bahkan i bas bangsa enda ngepari Lawit Merah, erdalan me bangsa e arah taneh janah arah kawes ras kemuhenna lau enggo bagi lingling. Sedangken asum iayaki tentera bangsa Mesir, kenca matawari pultak, lau lawit enggo ka mulihken bagi biasa. Itamburina gereta perang, si maba gereta e, puanglima-puanglima ras kerina tentera Mesir si ngayaki bangsa Israel ku bas lawit ndai, sada pe la lit si tading. Bahkan lit pengakuan i bas tentera Mesir nari maka Tuhan-lah si erperang guna bangsa Israel ngelawan bangsa Mesir. Tapi bangsa enda enggo igawer Tuhan i lawit.

Versi Audio silahkan klik : https://www.youtube.com/watch?v=QyDA24-zd4g

Piga-piga hal banci siidah i bas perikopta sendah e me: si pemena, ende-enden e jelas itujuken man Tuhan. Adi siidah i bas ay. 1, “Ateku rende man Tuhan.” Ay. 2, “Emaka ateku muji Ia, … kupebelin gelarNa arah ende-endenku.”

Si peduken, kemenangen e jelas erkiteken Tuhan. Tuhan nge si tuhu-tuhu erperang guna bangsa Israel. Piga-piga pernyataan siidah kita arah ogenta sendah, Tuhan enggo menang alu mulia, enggo ibenterkenNa kerina kuda ras si ngersaksa. Tuhan pengawal si megegeh, si enggo nelamatken aku. IbenterkenNa ku bas lawit tentera Mesir ras gereta perangNa. TanNdu si kemuhen, o Tuhan tuhu-tuhu seh kel gegehna. IembuskenNdu lawit, emaka launa erjerungjung ku das. Arah kalimat-kalimat si tersurat i bas perikop enda, jelas maka Tuhan nge si bertindak, labo erkiteken gegeh ras kehebaten kalak Israel.

Si peteluken, arah ende-enden Musa enda siidah kerna kehebaten ras kemahakuasaan Tuhan. Dibata si erkuasa, nai-nai nari, genduari, seh rasa lalap. Arah si e erbahanca tetap ukurta ndalani wari-wari kegeluhenta, amin sekali mbue perbeben si man hadapen. Dibata alu kuasaNa si mbelin tetap nampati kita anak-anakNa.

Pengkenaina

Tema PJJ-ta sekali enda “Rende Muji Tuhan” (Tim Kesaksian Ekspresif) mpersingeti kita selaku kalak si enggo ngaloken keselamaten i bas Tuhan bahkan tetap kita itemaniNa i bas suka ras duka tetap kita mpermuliaken Tuhan, secara khusus arah rende Muji Tuhan. Ende-endenta si iendeken kita alu sungguh-sungguh erbahanca Tuhan imuliaken, dingen ermanfaat ka man banta. Enden-enden e mpegegehi kinitekenta, nampati kita, mpelimbarui kegeluhenta. Sebage contoh saja, asum lit pergumulen i bas geluhta, rende kita, siendesken geluhta man baNa arah ende-endenta (umpamana, “Segedang-gedang geluhku”, “O Tuhan Kam penampat”, “Allah peduli”, rsd.), mpegegehi kita ngalaken perbeben e.

Bahkan situhuna secara kesehaten pe mbue kel manfaatna asum kita rende. Menurut dokter sehat.com bernyanyi meningkatkan kekebalan tubuh, mencegah penuan dini, melatih otot perut, menurunkan tekanan darah tinggi, meningkatkan kinerja otak, memperlancar pencernaan, menjaga kinerja sistem pernapasan, merawat paru-paru, mengoptimalkan fungsi jantung, meningkatkan metabolisme tubuh, dll.

Janah arah bahanta sekali enda pe, mpersingeti Tim Ibadah si enggo lit i bas Gerejanta (Tim Musik, Tim Singers, Seksi Ibadah, Tim Paduan Suara, rsd.) tuhu-tuhu ipersiapken alu mehuli, subuk sope melayani alu persiapen si maksimal (gelah ula meros), bage pe i bas melayani i bas ibadah. Tepat waktu, penampilan tetap ijaga ras motivasi i bas melayani arus terus-menerus ipelimbarui gelah tetap Tuhan imuliaken ras berkomitmen i bas melayani.