PJJ GBKP Tgl. 2 - 8 Sept. 2018

PJJ GBKP TGL. 2 - 8 SEPT. 2018 (HUT PERMATA)

Pdt. Larena br. Sinuhadji (Nd. Rey Tarigan)

Tema : JABU NEPA ORAT GELUH PERMATA (Epesus 6:1-4)

Penjelasen Ogen & Renungan

Rasul Paulus mpersingeti pepulungen i Epesus kerna tanggung jawab si arus idalanken orangtua bage anak-anak i tengah jabu gelah jabu e tetap paguh ras harmonis. Anak-anak arus ngikutken ajar orangtua, rikutken si ngena ate Tuhan. Ras orangtua arus ngkelengi anakna, ola pesega-sega anakna si erbahanca ia merawa (TB-LAI : “jangan bangkitkan amarah di dalam hati anakmu”).  Adina lit penungkunen, ise lebe ndalanken tanggung jawab, orangtua nandangi anak entah sebalikna, anak nandangi orangtua? Enggo pasti orangtua. Sebab orangtua e me kap wakil Dibata i ja anak e ititipken Dibata man banta. Maka tanggung jawab si pemena lebe arus idalanken orangtua, uga makana orangtua banci ngepkep, engkelengi ras mabai anakta geluh erkemalangen man Tuhan. Sebab mekatep orangtua lalai i bas tanggung jawabna si mbelin e.

Paulus mpersingeti kerna kewajiben anak e me patuh man orangtua (ay. 1). Patuh ngikutken ajar orangtua, sue ras peraten Tuhan. Anak-anak banci patuh asum orangtua tuhu-tuhu jadi usihen si mehuli man anakna. Sebab mbue orangtua, beluh ngajarken si mehuli (jujur, mengampuni, taat, rsd.) tapi ia sendiri la ndalankenca. Enggo pasti membal bahkan anak-anak sulit guna makenca. Emaka lit istilah ngatakenca “children do what they see” (anak-anak melakukan apa yang mereka lihat dari orangtuanya). “Satu perbuatan lebih berharga dari pada seribu kata-kata”, ertina, ipindoken orangtua i jenda jadi usihen si mehuli man anakna gelah alu bage anak-anak e patuh ngikutken kai si iajarken orangtua, sebab palasna kai si iajarken Tuhan. Ay. 2, mpehaga nande ras bapa. Enda bagin i bas 10 Perentah Tuhan si ibereken Dibata man Musa i deleng Sinai, e me perentah pelimaken. Anak-anak mpehaga orangtua sebab tanggung jawab si mehuli si enggo ilakoken orangtua, labo hanya dalam rangka anak ngataken bujur man orangtua, ras erbahanca orat geluh anak e mehuli tapi pe lit ulih si idatken anak e, e me kap geluh mejuah-juah ras ndekah nggeluh i doni enda (panjang umur).

Tanggung jawab orangtua e me kap ngkelengi ras mpebelin anak-anak, bagi si ngena ate Tuhan. Ertina, si ibereken kita man anak e sumberna e me kap Kata Dibata gelah si ngena ateNa silakoken kita i bas nehi tanggung jawab. Sabab banci jadi labo sura-sura Tuhan sipelebeken tapi sura-suranta orangtua. Lit orangtua memaksaken kehendak gelah anak menjadi number one tapi la ietehken kemampuan ras sura-sura anak. Si penting lit kebanggaan tersendiri asum anak e tampil berprestasi. Enda labo salah, asal sura-sura anak ras passion anak siikutken/idampingi labo keinginenta. Orangtua arus ngelitken waktu si utama guna anak i bas membangun kedekaten ras komunikasi si mehuli man anak. Ula sempat la sieteh kai kebiasanna, biakna, teman-temanna, hobina rsd. erkiteken kurang sibangun kedekatenta ras anakta.

Tema ngatakenca “Jabu nepa orat geluh PERMATA”, ertina, keluarga adalah wadah pertama dalam rangka pembinaan iman, membangun karakter nandangi anak-anakta, labo KAKR (Sekolah Minggu) entah pe sekolahna. Ula sibereken tanggung jawab si mehuli  ras mbelin enda man Gereja, walaupe situhuna lit i je peran Gereja ras sekolah tapi tetap si utamana keluarga. PERMATA secara organisasi i bas Tgl. 12 September berusia 70 tahun. Enggo pasti berbeda pendekatenta nandangi PERMATA si genduari, si rusur ikataken PERMATA jaman now entah pe milenial. Tapi si la berubah adalah kekelengenta ras tanggung jawabta nandangi anakta. Tetap bangun mezbah keluarga, jadiken anakta si pemena menjadi sahabatta gelah nyaman ia tetap curhat ras kita asum lit persoalenna. La daramina teman si la bertanggung jawab entah pe ndabuh ku bas pergaulan bebas. Sitotoken maka PERMATAnta i bas usiana 70 tahun tetap bersinar, ras ipake Tuhan jadi sira ras terang i doni erkiteken bentuken bas jabunta nari.