PJJ GBKP Tgl. 26 Agt. - 1 Sept. 2018

PJJ GBKP TGL. 26 AGT. - 1 SEPT. 2018

Pdt. Larena br. Sinuhadji (Nd. Rey Tarigan)

Tema : PESIKAP RUMAH PERTOTON (Hagai 1:2-15)

Penjelasen Ogen & Renungan

Enggo kira-kira 20 tahun ndekahna, kenca mulih pembuangen i Babilon nari (tahun 538 - 520 SM), pembangunen Rumah Pertoton i Jerusalem la terdungi. Situhuna batu palas Rumah Pertoton si enggo hancur i bas tahun 587 SM enggo sempat ipajekken mulihi, tapi erkiteken penduduk i sekitar Jerusalem si la setuju Rumah Pertoton ipajekken mulihi ngambatisa maka pembangunen Rumah Pertoton ipengadi (bdk. Esra 4:1-24). Sanga pemerentahen raja Darius, sekalak raja Persia, pembangunen Rumah Pertoton ilanjutken (Esra 4:24). Tapi melala ka jungut-jungut kalak Israel si erbahanca jatuh mental pemimpin-pemimpin Israel paksa si e, Gubernur Zerubabel ras Imam Agung Yosua. I bas ogenta sendah benaken ay. 1-6 nggambarkenca jungut-jungut kalak Israel : sitik hasil rani, kurang denga pangan-pangan, ras kurang denga sen.

I bas keadaan si bagenda rupana nabi Hagai reh ku tengah-tengah bangsa Israel guna nehken pedah-pedah si isina mereken semangat, optimisme, entah pe keyakinen, sue ras si enggo isuruh Dibata man bana, gelah ipajekken mulihi Rumah Pertoton seh dung. I bas pedah-pedah si isehken Hagai man bangsa Israel teridah maka enggo ilupaken bangsa e keseimbangen antara erdahin guna ncukupken kebutuhen geluh ras ersembah man Dibata. Rumah Pertoton e me ingan ersembah man Dibata si merupaken simbolisasi entah pe tanda kerehen Dibata i tengah-tengah bangsa Israel, simbolisasi entah pe tanda pasu-pasu si isehken Dibata man bangsa e, labo terjeng pasu-pasu si sifatna materi tapi pe pasu-pasu si sifatna non-materi : kedamen, kemalemen ate, alu sukacita ras pengataken bujur banci menikmati kerina bentuk pasu-pasu Dibata, rsd.

Kenca ibegiken pemimpin-pemimpin bangsa e rikut kerina kalak Israel si enggo mulih i bas pembuangen nari, mis bangsa e sedar ras alu mbiar man Dibata ngelakoken kerina si ipedahken Dibata erkelangken nabiNa Hagai guna membangun Rumah Pertoton. Erkiteken si e ipekeke Dibata ukur kalak Israel lako erdahin mahan Rumah Pertoton, janah erpadan Dibata niNa, “AKU erpadan tetap nemani kam” (ay. 13).

Tema i bas PJJ-ta sendah e me “Pesikap Rumah Pertoton”, i bas rangka Minggu Perawaten Inventaris Gereja. Gereja memang labo gedungna rikutken kerina sarana pra-saranana, Gereja e me kita kerina kalak si tek man Yesus Kristus. Tapi gedung rikut kerina sarana pra-sarana e penting guna mendukung kalak si tek erkiniteken man Dibata. I bas keadaan si genting entah pe mesera, i ja kalak Kristen itekan, isiksa, rsd., mungkin memang gedung Gereja e labo hal si penting. Tapi i bas keadaan si aman i ja kita banci membangun sarana pra-sarana guna beribadah tentuna arus tuhu-tuhu sipaken guna membangun gedung Gereja bage pe kerina sarana pra-sarana ibadah si debanna.

Ogenta sendah ngingetken kita mulihi kerna keseimbangen antara ibadah ersembah man Dibata ras kegeluhenta si tep-tep wari i ja kita beraktifitas, beraktualisasi, ras erdahin guna ncukupken kebutuhen geluhta. Tentuna akap kami enggo sibahan waktu khusus guna ersembah man Dibata i bas jabuta masing-masing. Janah waktu khusus guna kita ersembah secara komunal bas Gerejanta masing-masing pe enggo sipergunaken alu mehuli. I bas si e perlu ka nge kita mediate nandangi keadaan gedung Gerejanta bage pe sarana-sarana si deban si lit i bas Gerejanta masing-masing. Memang mungkin lit si ertugas khusus guna mperdiateken kondisi gedung ras sarana-sarana si deban i bas Gerejanta, tapi kita pe banci muat bagin i bas merawat bage pe melengkapi sarana-sarana i bas Gerejanta.

Hal si deban si mungkin banci menjadi renungen man banta, mari radu ras kita turut mendukung pembangunen-pembangunen i bas GBKP labo terjeng terbatas i bas Runggun entah pe Klasista. Mungkin lit kita si jungut-jungut erkiteken melalasa siakap struk-struk undangen guna pembangunen Gereja. Mungkin lit kebiaren bas kita la kari bias sen si lit bas kita adi lalap ikut muat bagin i bas kerina pembangunen si lit i bas GBKP. Sue ras ogenta sendah, mari radu ras kita erkiniteken maka Dibata pasti ncukupken kerina kebutuhen geluhta.