PJJ GBKP Tgl. 12 - 18 Agustus 2018

PJJ GBKP TGL. 12-18 AGUSTUS 2018

Pdt. Larena br. Sinuhadji (Nd. Rey Tarigan)

Tema : TUHAN MBEBASKEN BANGSANTA

HUT RI KE-73 (Ulangen 6:20-25)

Penjelasen Ogen & Renungan

Kitab Ulangen e me sada kitab si isina khotbah-khotbah Musa man bangsa Israel asum bangsa e ngadi i taneh Moab, kenca enggo mentasi perdalinen si gedang sope bengket ku taneh perpadanen Kanaan. Khotbah enda ilumbaken Musa gelah bangsa Israel tetap erkemalangen man Tuhan, nginget Tuhan si enggo mulahi bangsa Israel i bas penjajahen Mesir nari. Janah kesetian er-Dibata enda arus terus-menerus nggeluh i bas diri bangsa Israel termasuk man kesusuren si arah pudi (anak-anak bangsa Israel), si la ietehna kerna kehebaten ras kemahakuasaan Tuhan si enggo icidahkenNa. Enda me si terjadi bas perikop enda, uga tanggung jawab orang tua man anak-anakna gelah ietehna erkemalangen man Tuhan.

Perikopta ibere judul “Kata persinget maka ola ngelanggar pedah Tuhan”. Sekali nari Musa mpersingeti bangsa Israel maka kegeluhen bangsa Israel tuhu-tuhu ipasu-pasu Tuhan, bagi si enggo ipadanken Tuhan man Abraham, Ishak ras Jakub. I ja iberekenNa sada negeri si mehumur desken dah ras tengguli, ipajekkenna rumahna si mejile, idapetina melala barang si mehuli, sumur si la bekas bangsa enda ngkalisa ras peken anggur bage pe saitun si la bekas kalak enda nuan. Arah si e kerina Tuhan mindo gelah bangsa enda tetap setia erkemalangen man Tuhan. E maka i jenda pe ipersingeti Musa tanggung jawab orang tua guna tetap mewarisken geluh pertendin si mehuli man anak-anakna. Enggo ibayangken Musa, maka sada paksa waktu anak-anak bangsa Israel mereken sada penungkunen si arus ijawab ras ijelasken orang tua, gelah lit pengangkan si payo je nari turah kiniteken si paguh bas diri anak-anak. “Engkai maka iperentahken Tuhan Dibata kita ngikutken kerina Undang-undang enda? Gelah kepatuhen man orang tua turah erkiteken kesadaren sendiri labo ikut-ikuten entah pe terpasa. Umumna orang tua gagal i bas merespon (menjawab) penungkunen anak alu njabab, “bage kin perentah Tuhan”, entah pe, “la perlu nungkun-nungkun si paling penting patuhi saja”, rsd. Enda me si erbahanca la lit entah kurang lit kesadaren guna patuh man Tuhan. E maka iajari Musa adi lit penungkunen i bas anak-anakdu nari maka jawablah kita banci bagenda erkiteken Tuhan. “Adi la Tuhan si erdahin, la jadi kai kel kita. Ingat pertolongen Tuhan  ula lupaken. Bagenda arus jawabndu maka iperentahkenNa gelah kita patuh man Tuhan, sabab Dibata si masu-masu kegeluhenta. Ingat, marenda kita budak i Mesir. Tapi Tuhan enggo mbebasken bangsa Israel alu gegehNa si mbelin. IlakokennNa kejadin-kejadin si dahsyat si erbahanca mbiar bangsa Mesir ras rajana bage pe pegawainana. Janah perentah guna ngikutken Undang-undang e me perentah Tuhan gelah bangsa enda tetap setia ernalam man Tuhan. Adi perentah e tetap ilakoken, maka Dibata tetap njagai bangsa e ras erbahanca mehuli sikerajangenna, ngena ate Dibata man bana”.

Kepatuhen man Undang-undang Dibata erbahanca tetap kita nggeluh i bas dame sejahtera, pelin-pelin guna keuntungenta. Adi la kita patuh enggo pasti geluhta la teratur dingen erbanca la kita sikeleng-kelengen sada ras si debanna. Jadi kepatuhen sangat terkait ku bas pasu-pasu Tuhan. Adi la patuh, labo pasu-pasu sidatken kita tapi ukumen. Emaka ndalanken Undang-undang Tuhan, la banci erkiteken ikut-ikuten entah pe terpaksa tapi kesadaren sendiri erkiteken sigejapken uga Dibata si erdahin i bas segedang-gedang geluhta. PerbahanenNa erbahanca kita mejuah-juah. Dingen tanggung jawab orang tua guna nerusken warisen kiniteken man si nusurken gelah tetap erkemalangen man Tuhan.

Tuhan enggo mbebasken kita, tanggung jawabta guna njagai kebebasen si enggo ibahan Dibata. Ula nari kita nggeluh bagi kalak si tertaban, i ja kuasa kegelapan, penyakit sosial erbahanca la nari kita banci berkarya alu mehuli. Tanggung jawabta ka guna mereken kebebasen man kalak si deban, ula sitaban kalak erkiteken bayaken, hebaten kita asangken ia, alu sikap diskriminatif, la adil, semena-mena, rsd. Tanggung jawabta kalak i sekelewetta datken pasu-pasu ras kemalemen ate bagi si enggo iberken Tuhan banta. Merdeka!