PJJ GBKP Tgl. 5 - 12 Agustus 2018

PJJ GBKP TGL. 5-12 AGUSTUS 2018 (HUT SAITUN)

Pdt. Larena Sinuhadji (Nd. Rey Tarigan)

Tema : MOMOKENLAH KINIULIN DIBATA (Mazmur 52:10-11)

Penjelasen Ogen & Aplikasi

Mazmur 52, si ibere judul “Ukumen men kalak jahat”, e me ende-enden pengajaren Daud si ncidahken kinitekenna kerna pasu-pasu ras ukumen i bas Dibata nari. Kalak si ernalem man kejahaten dingen kebayaken dat ukumen i bas Dibata nari, tapi sebalikna, kalak si ernalem man Dibata dat pasu-pasu i bas Dibata nari. Adi sioge benaken ay. 2 nari, teridah maka Doeg nge si ernalem man kejahaten (bdk. 1 Sam. 21:1-22:23). I bas ay. 7 tek Daud maka kalak si ernalem man kejahaten ikernepken Dibata, itangkap Dibata, je nari isarenNa janah ipiserNa ku doni kalak mate.

I bas ay. 10-11 si jadi ogenta sendah, Daud mperseri dirina desken batang saitun si meratah bulungna, si turah i bas Rumah Dibata. Batang saitun raduken ras anggur e me sinuan-sinuan si penting i tengah-tengah bangsa Israel paksa si e erkiteken melala manfaatna. Bulungna lalap meratah i bas kerina musim. Kayu saitun biasa igunaken guna erbahan lemari, rsd. I bas buahna nari banci ihasilken minak si melala gunana, umpamana, jadi salah sada bahan guna ipan (2 Kron. 2:10), banci ijadiken bahan bakar (Mat. 25:3), jadi tambar (Luk. 10:34; Jak. 5:14), ijadiken minak urapan janah merupaken salah sada bahan si penting i bas persembahen tutungen (Kel. 29:40-41), rsd. Batang saitun banci turah seh 6 meter gedangna, janah banci ijadiken ingan guna berlindung. Batang saitun banci seh ratusen tahun umurna. Erkiteken si e maka batang saitun rusur ijadiken simbol kerina si mehuli termasuk simbol pasu-pasu Dibata nari guna ncukupi kerina kebutuhen kalak si ernalem man baNa.

Daud mperseri dirina desken batang saitun erkiteken tek ia maka kalak si ernalem man keleng ate Dibata datken pasu-pasu i bas Dibata nari. E maka ertekad Daud guna ngataken bujur ras ermomo kerna kiniulin Dibata rasa lalap (ay. 11).

PJJ-nta sendah i bas rangka HUT Saitun si pe-27-ken. Saitun e me gelar kategorial perpulungen GBKP si enggo lanjut usiana. Lansia i bas GBKP enggo la nai i teruh bidang Diakonia tapi enggo jadi kategorial si berdiri sendiri. Ertina, pembinaan ras perhatian man kalak si lanjut usia pe seh kel pentingna. Si niarapken i bas litna lembaga kategorial Saitun enda tentuna gelah reh erkualitasna kerina lansia si lit i bas GBKP bagi batang saitun i bas ogenta sendah. E maka man banta kerina si lenga lansia mari radu ras sidukung lembaga kategorial saitun enda, baik dukungen moril bage pe materil gelah reh erkualitasna pelayanen man lansia GBKP. Si jadi penungkunen man kerina lansia i bas GBKP, i bas usia si pe-27-ken, pang entah lang bagi Daud si mperseri dirina bagi batang saitun? Tentuna labo i bas hal ngaloken pasu-pasu Dibata saja tapi si pentingna, tuhu-tuhu geluh ernalem man Dibata, ngataken bujur ras ermomo kerna kiniulin Dibata rasa lalap, i bas kata si deban, lansia GBKP tuhu-tuhu banci jadi usihen i bas kai pe, entah pe jadi pasu-pasu man kerina jelma. Selamat HUT Saitun GBKP ninta, Tuhan si masu-masu lansia GBKP.