PA Kategorial GBKP Tgl. 5 - 12 Agustus 2018

PA MORIA TGL. 5-12 AGUSTUS 2018 (HUT SAITUN)

Pdt. Larena br. Sinuhadji (Nd. Rey Tarigan)

Ogen   : Rut 2:19-3:6

Tema  : NGERGAI PENGALAMEN MORIA SAITUN

Tujun : Gelah Moria : 1) Ngidah uga Rut megiken ras makeken kata ajar Nomi. 2) Ngasup ngidah Moria Saitun jadi teman arih.

Metode PA : Sharing ras Aksi

Klip : Mertua & Menantu

Penjelasen Ogen & Renungen

Kisah Rut ras Nomi tetap jadi kisah si fenomenal seh paksa gundari ras tetap menginspirasi kerina diberu khususna bibi ras permainna (mertua ras menantu). I bas  perikop enda lit telu tokoh si berperan, e me kap Rut, Naomi ras Boas, amin pe Boas la teridah secara fisik tapi itampilken Rut arah kai si ibahan Boas man bana.

Karakter Rut i jenda enggo pasti permain si tuhu-tuhu erkeleng ate man bibina, i ja tetap ihamatina ras ikelengina Naomi aminna pe enggo mate perbulangenna. Rut erdahin guna ncukupi kebutuhenna ras bibina (ay. 2,19,23). Rut terbuka man bibina, la lit si nibunikenna (ay. 19c,21), bahkan si luar biasa, Rut nggit megiken ras makeken kata ajar Nomi (ay. 23,5). Tetap iergaina bibina aminna pe enggo metua. Rut ngasup ngidah ras njadiken Nomi teman arih i bas kegeluhenna. Tek ia, maka Nomi labo mabai ia ku bas si la payo. Bahkan enggo pe kari ia erjabu ras Boas, tetap ikelengina bibi seumur geluhna.

Sedangken Nomi, sebage semetua, seri ras Rut, sangat peduli. Asum idahna mulih Rut alu maba melala gandum, labo lit bahasa si negatif (curiga, entah enggo si lang-lang ilakoken permainna), tapi malah lit kata pasu-pasu si ndarat i bas biberna nari (ay. 19b,20). Nomi tetap mendukung Rut guna terus erdahin i juma Boas, sabab ia pe ngukurken keselamaten permainna (adi i bas juma kalak banci jadi igas-gasina kam). Nomi tetap ngukurken si mehuli guna permainna, ngukuri kiniulin masa depan Rut, la ia egois. I ja rukur ia guna ndarami dilaki man perbulangen Rut gelah meriah iakap Rut. Sangat luar biasa si nilakoken Nomi, sabab la dirina saja iukurina, tapi uga makana meriah ka permainna. La lit ukurna cian entah pe egois, sabab banci jadi ‘di kenca Rut erjabu, perhatian Rut la nari fokus man Nomi. Bahkan iberekenna nasehat rikut “trik-trik” uga makana banci Boas si lit denga hubungen perkade-kaden ras Nomi kedungenna banci jadi perbulangen Rut (ay. 2-4).

Saitun e me organisasi pelayanen GBKP nandangi orang tuanta si enggo berusia lanjut (usia indah, i datas 60 tahun). I bas Sidang Sinode 2015 enggo isahken maka Saitun jadi salah sada persekutuan kategorial i tengah-tengah Gerejanta. Sada kemegahen man banta adi ibereken Tuhan umur si gedang man orang tuanta (ndekah kita er-orang tua ras nggejapken kekelengen, rikut pe lit kesempatenta ngkelengi orang tuanta). Mbue pelajaren si banci sidat kita arah perbahanen Rut selaku permain, orang muda tetap ia mehamat ras ngkelengi semetuana. La ia sepele man semetuana tapi tetap ilibatkenna guna temanna “curhat” bahkan masuken arah Nomi pe ibegiken ras ipakekenna. Tentu perlu kita selektif, labo ka kerina masuken i bas orang tuanta si enggo lanjut umurna. Adi memang la mehuli ula sipake.

Kebutuhen kalak si enggo metua, lit teman ngerana-ngerana, bahkan katepen kita menjadi pendengar si mehuli. Sabab kalak si enggo metua rusur lit atena teman ercakap, ras mulih-ulih lalap cakapna. Si nderbih enggo ituriken, sekali enda pe banci denga ituriken, bahkan lebih sepuluh kali (enggo mulai kolihen). Mbue pengalamen orang tuanta si enggo lansia (Saitun) si mekatep enggo silupaken; ndube ia natang-natang kita, ngajari alu saber, melayani kebutuhenta, nggit berkorban guna kita, ras melala denga si deban. Tapi gundari kenca enggo ia metua, kadang la nari siinget kiniulin, bahkan enggo siakap beban keberadaan orang tuanta (subuk nande entah pe semetuanta), erkiteken kesibuken ras pergumulen sialami kita. Firman Tuhan sekali enda mpersingeti kita jadilah kita teman arih si mehuli man orang tuanta si enggo Saitun, ngkelengi ras ngergai ia. Pindo tetap gegeh ras kesabaren i bas Dibata nari maka kesempaten si meherga guna ngkelengi orang tuanta (semetuanta) la si sia-siaken.

PA MAMRE TGL. 5 - 11 AGUSTUS 2018 (HUT SAITUN)

Nrs. Pdt. Larena Sinuhadji (Bp. Rey Tarigan)

Ogen : Masmur 52:10-11

Tema : ERLAJAR RAS NGERGAI PENGALAMEN SAITUN

Tujun : 1) Meteh maka Mamre si enggo Lansia desken batang saitun si meratah bulungna. 2) Ngasup ras nggit erlajar ras ngergaken Saitun.

Metode : Diskusi & Aksi

Pengantar

I bas PA sendah banci sipake metode BGA (Baca, Gali, Alkitab). Piga-piga hal si penting i bas metode BGA enda : 1) Mengidentifikasi tokoh-tokoh si lit i bas ogen. Kai saja si banci sipelajari arah tokoh-tokoh si lit? 2) P3JT (Pelajaran, Peringatan, Perintah/Pesan, Janji, Teladan) kai saja si idatken kita i bas ogenta sendah? 3) Sharing ras tekad. Memang i bas sada sisi metode BGA banci memperkaya pemahamenta kerna Kata Dibata, tapi i bas sisi si deban banci ka kari la fokus ku tema bage pe tujun PA sendah si enggo itentuken i bas buku PA-nta, erkiteken melala hal si deban si penting ras menarik guna ijadike pembelajaran. Amin bage gia tujun pemahamen entah pe pendalamen Alkitab banci tercapai arah metode BGA enda.

Latar Belakang Ogen

 Ogenta sendah termasuk i bas Mazmur bindu 52, si ibere judul “Ukumen men kalak jahat”, e me ende-enden pengajaren Daud si ncidahken kinitekenna kerna pasu-pasu ras ukumen i bas Dibata nari. Kalak si ernalem man kejahaten dingen kebayaken dat ukumen i bas Dibata nari, tapi sebalikna, kalak si ernalem man Dibata dat pasu-pasu i bas Dibata nari. I bas ay. 2 nari banci idatken kita lit empat tokoh e me, Daud, Doeg kalak Edom, raja Saul, ras imam Ahimelek. Turi-turin kerna 4 tokoh enda banci sidalami i bas 1 Sam. 21:1-22:23. I bas ogenta sendah adi sioge benaken ay. 1 nari teridah maka lit telu ngenca tokoh si utama, e me Daud, Doeg ras Dibata.

Bereken kesempaten man kerina peserta PA guna ngoge bahan ogenta sendah alu manjar-anjar janah iulih-ulihi kira-kira telu kali gelah tuhu-tuhu sioge secara teliti. Kenca bage bereken kesempaten man kerina peserta guna sharing kerna kai saja si enggo ipelajarina arah tokoh-tokoh si lit, P3JT, bage pe kai si jadi tekadna kenca enggo ipelajarina bahan ogenta sendah. Kenca enggo la nai lit si ngerana entah pe sharing maka pemimpin PA mereken kesimpulen kerna kai-kai saja si penting i bas kerina si enggo ibagiken kerina peserta bage pe si enggo isikapken pemimpin PA.  

Tokoh-tokoh I bas Ogen & P3JT

Tokoh Doeg e me tokoh si la mehuli amin pe ikataken Daud maka Doeg enda kalak si mbisa. Ihagakenna kejahatenna (ay. 3). Rusur nipui dingen ngerencanaken si jahat (ay. 4). Ngena atena kempak kejahaten lebih asangken si mehuli, janah katana la tuhu (ay. 5). Sekalak penipu si meriah ukurna nakiti kalak (ay. 6). Banci ikataken Doeg enda geluhna ernalem man kejahaten ras kebayaken (ay. 9).

Tokoh Daud i bas ogenta sendah igambarken desken batang saitun si meratah bulungna, si turah i bas Rumah Dibata. Penjelasen kerna batang saitun banci sioge i bas bahan PJJ i datas. Arah batang saitun enda teridah maka karakter Daud e me kalak si ernalem man keleng ate Dibata si tetap seh rasa lalap. Labo saja ngaloken pasu-pasu i bas Dibata nari tapi Daud pe la erngadi-ngadi ngataken bujur ras ermomo kerna kiniulin Dibata.

Dibata i bas ogenta sendah e me Tokoh si adil ras konsisten i bas keputusenNa, IA mereken pasu-pasu man kalak si ernalem man baNa, janah mereken ukumen man kalak si ernalem man kejahaten ras kebayaken. Ukumen i jenda banci iertiken sebage ukumen guna mendidik entah pe mendisiplinken. Adi sedar ras ertobat tentuna labo ikernepken, itangkap Dibata, je nari isarenNa janah ipiserNa ku doni kalak mate.

Arah latar belakang ogen, tokoh-tokoh si lit, kira-kira P3JT (Pelajaran, Peringatan, Perintah/Pesan, Janji, Teladan) kai saja si banci idatken kita? Pelajaran, umpamana, amin pe erta kebayaken penting i bas geluhta, tapi ernalem ras mpehaga Dibata em si utamana i bas geluh i doni enda. Peringatan, umpamana, mbiarlah man Dibata asangken man doni enda, sebab Dibata adil i bas keputusenNa, iukumNa kalak si ernalem man kebayaken ras kejahaten. Perintah entah pe Pesan, umpamana, geluhlah alu ernalem man Dibata. Janji, umpamana, Dibata la pernah lupa man janjiNa, ipasu-pasuNa kalak si ernalem man baNa. Teladan, umpamana, usihlah Daud si geluhna tuhu-tuhu ernalem man Dibata, geluhna desken batang saitun.

HUT Saitun

PA-nta sendah ibahan i bas rangka HUT Saitun si pe-27-ken. Tema “Erlajar Ras Ngergai Pengalamen Saitun” alu tujun gelah Mamre 1) Meteh maka Mamre si enggo Lansia desken batang saitun si meratah bulungna. 2) Ngasup ras nggit erlajar ras ngergaken Saitun. Leben sikataken bujur man Dibata erkiteken enggo lit lembaga kategorial khusus man perpulungenta si enggo lanjut usiana. Arapenta tentuna arah litna lembaga kategorial Saitun enda reh erkualitasna kerina Mamre si lansia i bas GBKP. Guna njabab tujun si peduaken, tentuna Saitun enda arus sidukung baik secara moril bage pe materil gelah reh majuna ras reh erkualitasna pelayanen i bas lansia GBKP.

Si jadi penungkunen man kerina Mamre si enggo lansia i bas GBKP enda, i bas usia si pe-27-ken, pang entah lang Mamre ngatakenca bagi Daud si mperseri dirina ras batang saitun? Tentuna labo i bas hal ngaloken pasu-pasu Dibata saja tapi si pentingna i bas geluh tuhu-tuhu ernalem man Dibata, ngataken bujur ras ermomo kerna kiniulin Dibata rasa lalap, i bas kata si deban Mamre si enggo lansia tuhu-tuhu jadi usihen i bas kai pe, entah pe jadi pasu-pasu man kerina jelma. Adi jawabenna “pang”, puji Tuhan! Ertina Mamre si lansia enggo tuhu-tuhu jadi usihen. Adi “lang” maka kai si jadi tekad Mamre si lansia? Si niarapken tentuna sope melala kalak si erlajar ras ngergai pengalamen saitun, leben enggo icidahken lansia uga geluh ernalem man Dibata.