PJJ GBKP Tgl. 9 - 15 September 2018

PJJ GBKP TGL. 9 - 15 SEPTEMBER 2018

Pdt. Larena br. Sinuhadji (Nd. Rey Tarigan)

Tema : BUDAYA DALAN NEHKEN BERITA SI MERIAH (1 Korinti 9:19-23)

Penjelasen Ogen & Renungan

Paulus banci ikataken sekalak Rasul Tuhan si luar biasa i bas er-PI entah pe nehken Berita Si Meriah. I bas Pustaka Si Badia, lit 13 kitab Paulus si nulissa (dari 27 kitab PB). Erbage-bage kuta enggo isiarina guna banci ia nehken Berita Si Meriah, janah si enda igejapina erkiteken enggo idatkenna keselamaten i bas Dibata nari, emaka rutang kel akapna guna meritaken Berita Si Meriah man kalak si deban. Secara khusus man perpulungen Korinti walaupe la iakui kalak kerasulenna, labo e erbahanca ia surut bahkan tetap semangat. Bahkan lit nge situhuna upahna i bas ia nehken Berita Si Meriah, tapi si e la ialokenna (ay. 12b-15). Man Paulus, dahin meritaken Berita Si Meriah enggo sada kearusen man bana janah sada tanggung jawab si iendesken Dibata man bana. Guna si e ijadikenna dirina budak nandangi kerina jelma gelah banci enterem kalak nandai Kristus. Gambaren budak si ipake Paulus ncidahken dirina siap muat posisi si meterukna, si penting Kata Dibata isehken. Sabab labo mesukah i bas meritaken Kata Dibata, pasti mbue tantangen si man alanken Paulus. Tapi arah gambaren budak si ipakena berarti siap ia ngaloken kai pe si jadi man bana.

Je nari metode er-Pi si ipake Paulus e me beradaptasi ras budaya rikut lingkungen i ja ia melayani. I tengah-tengah kalak Yahudi, bagi kalak Yahudi Paulus, e me soal kepatuhenna nandangi Undang-undang Musa (tapi cara memaknaina pasti enggo berbeda, labo terjeng legalitas). Man kalak Yunani si bebas, bagi kalak e ka Paulus walupe Undang-undang Kristus nge ulu kegeluhenna. Ertina, kebebasen si ilakoken Paulus tetap erpalasken malang man Tuhan. Man kalak si merampek kinitekenna, bagi ia e ka Paulus. Ertina, Paulus la memaksaken kalak si deban mengikuti aturen mainna (bagi kalak Yahudi, entah Yunani, entah bagi ia). Paulus ngergaken budaya ras kebiasan kalak setempat i bas ia banci nehken Berita Si Meriah. Janah metode Paulus enda ka si nipake Belanda (NZG) ndube i bas nehken Berita Si Meriah man kalak Karo. Bahasa lebe si ipake e me bahasa Karo (Kitab Masmur si pertama iterjemahken i bas Cakap Karo oleh Pdt. J.H. Neumann serta iterbitken Bijbel Genootscahap). I bas buku Pdt. E.P. Gintings (Sejarah GBKP), ituliskenna maka sistem adat istiadat hidup kalak Karo ipake dalam rangka mengabarkan Injil. Merga Si Lima, Tutur Si Waluh ras Sangkep Si Telu (hlm. 49). Falsafah kalak Karo pe ipake : mehamat (hormat), medes ukur (solider) ras metami er-anak beru (kasih), budaya runggu. Setiap lit dahin ikerjaken alu semangat gotong royong (sistem aron), budaya runggu/arih-arih muat si mehuli. Ibadah Kerja Rani si mulai ilakoken i GBKP thn. 1926 i Kabanjahe, e me budaya panen si nggambarken keriahen ukur ras ngataken bujur man Dibata erkiteken pasu-pasuNa. Thn. 1965 dalam Sidang Sinode diputuskan Gendang Tradisional Karo dapat dipakai dalam pesta atau ibadah Gereja. Merga Si Lima, Tutur Si Waluh dan Rakut Si Telu juga ikut memperkaya dalam rangka nehken Berita Si Meriah maka murah pemberitaanna ilakoken. Emaka “ertutur” lebe biasana ilakoken maka dat orat tutur i bas perjumpaan ras sesekalak jelma.

Rikutken tema-nta i bas PJJ sendah, “Budaya dalan nehken Berita Si Meriah” maka payo kel budaya Karo seh kel mehulina ipake dalam rangka nehken Berita Keselamaten. Si penting nina Rasul Paulus, arah metode si ipake kita enterem sidatken kalak guna banci tandaina Yesus Kristus.