PA Kategorial GBKP Tgl. 2 - 8 Sept. 2018

PA MAMRE TGL. 2 - 8 SEPT. 2018 (NKRI)

Nrs. Pdt. Larena Sinuhadji (Bp. Rey Tarigan)

Ogen : Roma 13:1-5

Tema : GBKP RAS NKRI

Tujun : Gelah Mamre :

1) Ngangka (nggejapken) maka pemerintah e me persuruhen Dibata

2) Patuh ras ikut njagai keutuhen Negara Kesatuan Republik Indonesia

Metode : Diskusi

Penjelasen Bahan Pustaka Si Badia & Aplikasi

Judul i bas perikop ogenta sendah e me “Patuh nandangi pemerentah si erkuasa”, judul i bas Alkitab BIS-BIMK nari nina “Kewajiban terhadap pemerintah”. Patuh nandangi pemerentah si erkuasa arus silakoken erkiteken Dibata si netapkenca (ay. 1) janah pemerentah si erkuasa e me persuruhen Dibata labo saja guna kiniulin jelma si nterem (ay. 4). Kepatuhen nandangi pemerentah e arus silakoken secara konkrit alu, si pemena lebe, mendukung kai pe si ibahan pemerentah guna kiniulin jelma si nterem (ay. 2). Si peduaken, secara proaktif ras tulus ngelakoken kerina perbahanen si mehuli ijapa pe (ay. 3, 4).

Penungkunenna, pemerentah si uga si nimaksudken Rasul Paulus? Pemerentah si nimaksudken e me pemerentah si ideal, e me si mempergunaken kuasa si lit bas ia guna kiniulin kalak si nterem (rakyat), entah pe pemerentah si tuhu-tuhu ndalanken tugas tanggung jawabna alu jujur ras benar rikutken aturen-aturen si berlaku alu tujun guna kiniulin kalak si nterem. Adi la sidalanken si benar, maka pemerentah si erkuasa e labo Dibata si netapkenca ras labo persuruhen Dibata. I bas si e kerina kalak si tek arus lebih patuh man Dibata (bdk. Perb. Rasul 5:29; Dan. 3:16-18; 6:7-11). I bas suratna man Timotius, Rasul Paulus ngajuk perpulungen gelah notoken pemerentah si erkuasa gelah banci ndalanken tugas tanggung jawabna alu mehuli (1 Tim. 2:1-2).

Tema i bas PA-nta sendah e me “GBKP ras NKRI” alu tujun gelah Mamre ngangka (nggejapken) maka pemerintah e me persuruhen Dibata, janah patuh ras ikut njagai keutuhen Negara Kesatuan Republik Indonesia. Adi sinen secara objektif si terjadi bas negaranta akap kami pemerentah NKRI si gundari, tek kita maka Dibata si netapkenca, janah tek kita maka pemerentah si gundari e me persuruhen Dibata si ngelakoken kerina si mehuli guna kiniulin jelma si nterem. I bas si e tentuna melala denga kelemahen i jah i je si perlu ipekena-kena gelah kesejahteraan banci inanami kerina rakyat Indonesia.

Uga peranta selaku kalak si tek i tengah-tengah NKRI? Adi sisungkun sada per sada mungkin melala kita si enggo muat bagin i bas kemajun bangsa ras negaranta, mungkin melala si lenga, janah mungkin melala ka kita si la mediate erkiteken lebih ngukurken diri sendiri. I bas PA-nta sendah iajuk kita gelah semakin meningkatken kuantitas ras kualitas keterlibatenta guna kiniulin bangsa ras negaranta bage pe guna ikut njagai keutuhen NKRI.  

PA MORIA TGL. 2 - 8 SEPT. 2018

Pdt. Larena br. Sinuhadji (Nd. Rey Tarigan)

Ogen  : Jop 1:4-5

Tema : ORANG TUA SI ERPENGERTIN NANDANGI ANAK

Tujun : Gelah Moria : 1) Meteh uga Jop erpengertin nandangi anak-anakta (notoken anak, ndampingi anak,  ngajarken anak, ras seterusna). 2) Lebih Peka (erdiate) nandangi pinakit Sosial bas kegeluhen anak singuda

Metode PA : Niksiki ras Diskusi

Klip : Dampak Pengguna Narkoba

Penjelasen Bahan Pustaka Si Badia & Renungen

Bahanta sekali enda ngerana kerna kisah Jop khususna si berkaiten ras anakna. Jop e me kalak bayak si tetap erkemalangen man Dibata, kalak si mehuli dingen la lit perbahanenna si jahat. Banci kataken ia me kalak si bayakna i Timur tapi labo e erbahanca la lit waktuna guna ersembah man Tuhan bage pe perhatin man anak-anakna. Anakna lit 10 kalak, 7 dilaki ras 3 diberu. Pustaka ngatakenca, maka anakna si dilaki semal erbahan pesta man-man alu ergiliren.  Turangna si diberu pe tetap itenahkenna ikut pulung. Janah Pustaka Si Badianta ncatatkenca, kenca tiap pesta enggo dung, lampas erpagi-pagi keke Jop, je nari ipersembahkenna persembahen tutungen guna pebadiaken anakna e sekalak-sekalak. Janah si e ilakokenna, sebab rukur ia, banci jadi anakna e enggo erbahan dosa si la teridah erkiteken ceda ukur Dibata alu la iarapna (TB-LAI mengatakan “Demikianlah dilakukan Ayub senantiasa”). Jadi jelas, si nilakoken Jop sebage bapa si tuhu-tuhu ertanggung jawab, ifungsikenna dirina sebage imam bas jabu ras e idalanken setiap saat. Labo wari-warin entah pe song-song sebab mbiar kel ia man Dibata.

Jop tetap ndalanken tanggung jawabna selaku bapa alu mehuli amin pe ia kalak bayak ras banci jadi sibuk guna ngaturken kerina usahana (biri-birina lit 7 ribu, untana 3 ribu, lembuna seribu ras keledena 5 ratus. Suruh-suruhenna pe seh kal teremna). Enggo pasti waktuna melala ikeriken guna ngaturken (memenej) usaha ras si erdahinna. Lit denga waktuna guna ngajarken ras nehken kekelengen man anakna. Ietehna maka waktu ras kengasupenna terbatas selaku orangtua guna 24 jam nemani anakna. Tapi tetap ibahanna pendekaten ras pendampingen entah maun anak-anakna e enggo ngeliami gelar Dibata alu la isedarina.

Tema ngatakenca “Orangtua si erpengertin nandangi anak” janah bahan PA enda dalam rangka HUT PERMATA GBKP si pe-70-ken. Anak e me erta si mehergana kel pemere Dibata. Emaka melala jabu, ‘di kenca lenga jumpa tuah iusahakenna uga makana banci ibereken Dibata anak e ku tengah jabuna, la peduli ngkeriken mbue materi (duit). Tapi realitana mekatep kurang sedalanen ras kai si ipahami kita ndai. Melala orangtua menelantarkan anakna, kurang waktu guna mendampingi, ngkelengi, erkomunikasi ras anak-anakna. Alasenna, sibuk ndaramai materi guna anak. Payo memang materi sidarami guna anak-anakta, guna persekolahen, guna masa depanna. Tapi sia-sia kedungenna, materi enggo cukup melala tapi anakta ndai enggo terbawa pergaulan bebas erkiteken kurang waktunta mendampingi ras ngkelengi anakta. Sesibuk uga pe orangtua, terbeluh ia guna mereken waktu si berkualitas (prime time) guna anakta. Bahkan si berkembang genduari melala orangtua (nande/Moria), lebih mbue waktuna ras HP-na asangken anakna sendiri. Emaka perlu kita bertobat guna si e, gelah pentar kita makeken teknologi maju i bas jaman Now enda. Lit piga-piga aturen i bas pemakaian Media Sosial (umpamana ketika kita bicara dengan anak kita, lihatlah dia, jangan lihat HP kita. Saat bermain, ataupun jalan-jalan jangan gunakan HP kita. Saat makan tidak ber-HP, batasi penggunaan HP, sebagai orangtua kita harus melek teknologi supaya tetap bisa mengawasi anak kita dengan HP-nya, supaya bersih dari konten-konten yang tidak berguna, rsd.). Ras sebage tujun peduaken, gelah kita lebih peka nandangi pinakit sosial i bas kegeluhen anak si nguda. Kita arus metenget ras erjaga-jaga sebab ise pe banci kenaina, subuk seks bebas, pemaikaian obat terlarang (Narkoba), judi, minum-minuman keras, tawuran, rsd. Tetap bangun komunikasi si mehuli antara kita ras anakta benaken kitik-kitik gelah kenca enggo dewasa pe (PERMATA) tetap kita ndeher ras ia bahkan jadi sahabat subuk i bas suka ras dukana. Maka la ia terpengaruh ku bas pergaulan si la mehuli.

Mari siusih Jop, i ja leben ibabaina anakna erkemalangen man Dibata sabab e bena-bena pemeteh (Kuan-kuan 1:7). Ras anakna lit waktu guna ertoto ras ersembah man Tuhan. Walaupe enggo rusur ilumbaken kerna ibadah keluarga, melala denga jabu-jabu si kurang akapna penting erbahan ibadah keluarga alu alasen sibuk ras la lit waktu. Padahal Kata Dibata merupaken benteng pertahanen jabunta bage anakta guna tetap nggeluh bagi si ngena ate Tuhan. Secara organisasi, i bas HUT PERMATA enda, kategorial Moria pe banci membangun komunikasi ras kategorial PERMATA kerna kai si ibutuhken, iarapken PERMATA man orangtuana bage pe man Gereja. Ula kari formalitas ngenca anak-anakta pulung (PA terlebih kegiaten PA Padang si mbue peminatna), tapi kinitekenna la terbangun sabab la kapna meriah ngoge ras mpelajari Firman Tuhan. Terjeng pulung-pulung ngenca akapna meriah. Enda me ke depan si perlu ibangun kedekatan antara Moria ras PERMATA secara organisasi. Selamat Ulang Tahun PERMATA GBKP pe-70-ken. Jadilah rudang-rudang Gereja.