PJJ GBKP Tgl. 19 - 25 Agustus 2018

PJJ GBKP TGL. 19 - 25 AGUSTUS 2018

Pdt. Larena br. Sinuhadji (Nd. Rey Tarigan)

Tema : BAPA SI PAGUH ERKINITEKEN
(Perb. Rasul 10:1-8)

Penjelasen Ogen & Renungan

Sekalak bapak biasana igelari imam bas jabu, ertina, sebagai pemimpin si mabai isi jabuna gelah erkemalangen man Dibata. Desken tugas imam i tengah kegeluhen kalak Israel, e me sebage pengatara antara perpulungen ras Dibata. Bage me iarapken sekalak perbapan Kristen nandangi keluargana. Bahkan i bas Masmur 128:4 lit i je korelasi kepatuhen sekalak perbapan ras pasu-pasu i bas Dibata nari (TB - LAI, “Demikianlah akan diberkati laki-laki yang takut akan Tuhan”). Emaka malem kel ate jabu adi perbapanna kalak si paguh erkiniteken.

I bas perikopta ituriken lit sekalak perbapan si tuhu-tuhu erkemalangen man Dibata, walaupe labo ia kalak Jahudi, gelarna Kornelius. Ia sekalak komandan i bas pasuken tentera Romawi si igelari “pasuken Itali”. Ia ras jabuna kalak si tutus nembah man Dibata dingen rusur erdiakoni man kalak Jahudi si musil. La ia erngadi-ngadi ertoto man Dibata. Sada paksa waktu  asum ia ertoto jam telu karaben, idatna sada pengenehenen i ja Malekat Dibata bengket ku rumahna ras ngatakenca maka pertotonna sedekah enda enggo ibegiken Dibata. Banci ikataken, kalak si tetap setia erkemalangen man Dibata, maka dirina pe iinget ras iperdiateken Dibata. Isuruh Malekat gelah suruh-suruhenna ku Jope guna ngelegi Simon Petrus si genduari sangana kesilang ku rumah sekalak tukang kulit si gelarna Simon ka. Kenca lawes Malekat ndai minter isuruh Kornelius dua kalak prajuritna ras sekalak ajudanna si tutus ku Tuhan guna ngelegi Simon Petrus. Adi siterusken perikop enda, maka kenca enggo jumpa suruh-suruhen Kornelius ras Simon Petrus, maka berkat kalak enda ku Kaesarea ingan Kornelius ras i je me Simon Petrus nehken Berita Si Meriah si kedungenna kalak non-Jahudi si pulung i rumah Kornelius pe idemi Kesah Si Badia. Arah perjumpaan si e, jelas man Petrus maka la erdobahen iakap Dibata manusia e.

Kornelius sekalak bapa si tuhu-tuhu paguh erkiniteken man Tuhan. Ibabaina jabuna pe tutus ersembah man Dibata. Bage pe kehadirenna mpengaruhi anak buahna, i ja prajuritna ras ajudanna pe kalak si tutus erkemalangen man Tuhan. Ertina, sosok dirina jadi usihen man kalak i sekelewetna. Kinitekenna pe teridah arah perbahanenna si mehuli e me kap mperdiateken kalak musil di luar sukuna e me kalak Jahudi. Kiniteken si teridah arah perbahanenna.

Rikutken Firman Tuhan si man oratenta, maka mbue kel man si man usihen arah tokoh Kornelius, secara khusus man Mamre si i bas bulan enda secara organisasi berusia 23 tahun. Adi bandingken 10-20 tahun si lepas, sope organisasi perbapan i bas GBKP lit ras erdalin alu mehuli maka i bas paksa enda enggo melala kel kemajuanna si ilakoken bapa subuk i bas jabu, Gereja bage pe masyarakat. Adi sievaluasi enggo reh teremna Mamre si ku Gereja, i jabu pe enggo lit kerja sama antara suami - istri termasuk soal ngaturken jabu ras pebelin anak-anak (adi nai iakap e kodrat diberu; padahal kodrat diberu hanya mengandung, melahirkan ras menyusui). Janah iarapken arah ulang tahun si pe-23-ken enda mulihi membangkitkan semangat man Mamre GBKP sebage imam i tengah jabu, bapa si paguh kinitekenna, si geluhna mpengaruhi keluarga ras masyarakat sekelewetna, dingen rikutken sloganna tetap erpemere ras erdiate. Selamat Ulang Tahun Mamre GBKP 23 tahun.