PA Kategorial GBKP Tgl. 26 Agt. - 1 Sept. 2018

PA MAMRE TGL. 26 AGT. - 1 SEPT. 2018 (HUT PERMATA)

Nrs. Pdt. Larena Sinuhadji (Bp. Rey Tarigan)

Ogen : Masmur 139:1-6

Tema : BAPA SI ERPENGANGKA NANDANGI ANAK

Tujun : Gelah Mamre :

1) Ngangka bagi Dibata nandai kita bage me pe Mamre nandangi anak

2) Ngasup mpersiapken anak secara kiniteken ras keberhasilen nggeluh

Metode : Studi Kasus

Penjelasen Bahan Pustaka Si Badia & Aplikasi

Judul i bas perikop ogenta sendah e me “Kai pe ieteh dingen ikelengi Dibata”, judul i bas Alkitab TB-LAI “Doa di hadapan Allah yang maha tahu”, janah judul arah Alkitab BIS-BIMK nari “Allah mahatahu dan memelihara segala-galanya”. Arah kerina judul perikop enda situhuna enggo banci sidat kita inti syair ende-enden pertoton si ibahan Daud. Tek Daud maka Dibata si isembahna e me Dibata si Mahamengetahui ras Mahahadir.

Labo terjeng je saja, Dibata si isembah Daud e me Dibata si tuhu-tuhu nandai, melindungi ras memelihara kegeluhen kalak si tek man baNa. La lit si terbuni i lebe-lebe Dibata. Manusia mungkin banci ibunikenna kai si enggo ilakokenna i lebe-lebe kalak si deban, banci ibunikenna perukurenna, tapi lang i lebe-lebe Dibata. I bas si e nina Daud, “Mbagessa penandaiNdu kerna aku, lanai terjaka perukurenku si e” (ay. 6), i bas bhs. Ind. nina, “Terlalu ajaib bagiku pengetahuan itu, terlalu tinggi, tidak sanggup aku mencapainya” (bdk. BIS - BIMK, “Terlalu dalam bagiku pengetahuanMu itu, tidak terjangkau oleh pikiranku”).

Erkiteken Dibata si isembah Daud e me Dibata si Mahamengetahui, Mahahadir, tuhu-tuhu nandai, melindungi ras memelihara kegeluhenna, ngataken bujur Daud man Dibata janah ipujina Dibata (ay. 14). Tuhu-tuhu iendeskenna geluhna man Dibata, ikatakenna i bas ay. 23-24, “Pepayolah aku o Dibata, tandailah pusuhku, uji dingen datkenlah perukurenku. Pepayolah entah mawen lepak dalan si kudalani, je nari babailah aku arah dalan si tetap rasa lalap”, i bas bhs. Ind. nina, “Selidikilah aku, ya Allah, dan kenallah hatiku, ujilah aku dan kenallah pikiran-pikiranku; lihatlah, apakah jalanku serong, dan tuntunlah aku di jalan yang kekal!”

Tema i bas PA-nta sendah e me “Bapa si erpengangka nandangi anak” (i bas rangka HUT PERMATA GBKP) alu tujun gelah Mamre ngangka bagi Dibata nandai kita bage me pe Mamre nandangi anak, ras ngasup mpersiapken anak secara kiniteken ras keberhasilen nggeluh. Arah ogenta sendah, tema, bage pe tujun, iarapken gelah kita Mamre tuhu-tuhu nandai (mengenal) anak-anakta khususna si enggo PERMATA. Adi sibandingken ras penandai Dibata nandangi kita tentuna la lit ise pe kita si ngasup erkiteken melala keterbatasenta sebage manusia. Tapi paling tidak lit usahanta guna tuhu-tuhu nandai anak-anakta. Lit usaha ning kami erkiteken anak-anakta adi enggo usia PERMATA biasana enggo melala waktuna i luar rumah guna pendidikenna, dahinna bage pe bersosialisasi. I bas si e tentuna kita sebage perbapan arus tetap beluh menjalin komunikasi ras anak-anakta. Janah i bas sisi si deban beluh ka kita membawa dirinta sebage kandu-kandu (sahabat) nandangi anak-anakta si enggo usia dewasa. Cara rukurta, pengerana, bage pe perbahanenta tentuna arus lit bedana ras sanga anak-anakta kitik denga.

Si paling penting akap kami, mari radu ras siusih Daud i bas relasina si mehuli ras Dibata. Relasina si mehuli nandangi Dibata mabai ia ku bas kiniteken maka Dibata si isembahna e me Dibata si Mahatahu, Mahahadir, tuhu-tuhu nandai, melindungi dingen memelihara kegeluhenna. Mari radu ras rusur sibaba anak-anakta si enggo PERMATA i bas pertotonta. Siendesken kegeluhenna man Dibata gelah anak-anakta ibabai Dibata ku dalan si mehuli, mehamat man banta sebage orangtuana, ibegikena kata ajarta, sukses i bas pendidikenna, pendahinna bage pe pergaulenna. Janah si paling penting kita sebage orangtuana ngasup mereken teladan si mehuli i lebe-lebe anak-anakta. Selamat HUT ninta man PERMATA GBKP. Dibata si masu-masu PERMATA GBKP secara kelembagaan bage pe secara pribadi lepas pribadi.