PA Kategorial GBKP Tgl. 12 - 18 Agustus 2018

PA MAMRE TGL. 12 - 18 AGUSTUS 2018 (HUT RI)

Nrs. Pdt. Larena Sinuhadji (Bp. Rey Tarigan)

Ogen : 2 Raja-raja 23:24-25

Tema : PEMIMPIN SI MBEBASKEN

Tujun : Gelah Mamre :

1) Meteh pemimpin si erkiniteken ras erkarakter

2) Ngasup jadi pemimpin si mbebasken, erbahan pembaharuan i bas jabu ras masyarakat

Penjelasen Bahan Pustaka Si Badia & Renungen

Latar belakang ogenta sendah (22:1-23:30) nuriken kerna reformasi entah pe pembaharuan si ibahan Josia (Josia ertina : Tuhan menopang), raja si pe-15-ken Kerajan Juda kenca Kerajan Israel terbagi dua jadi Kerajan Israel ras Kerajan Juda. Kai saja si banci sipelajari i bas pembaharuan si ilakoken Josia? Si pemena lebe, amin pe waluh tahun denga usiana sanga ia itangkuhken jadi raja, tapi ikataken i bas bindu 22:2 nina, “Josia ngelakoken kai si ngena ate TUHAN; iikutkenna usihen si mehuli si ibahan ninina Raja Daud, dingen sitik pe ia la nimpang i bas kerina Undang-undang Dibata nari”. I bas si e banci sipelajari maka pembaharuan si payo e me pembaharuan si leben ibenaken i bas diri sendiri, labo iusih Josia si jahat si enggo ilakoken bapana Amon, tapi iusihna si mehuli bagi si enggo ibahan Raja Daud.

Si peduaken, pembaharuan si ilakoken Josia ipalasi alu Kata Dibata. Kenca enggo idatken mulihi kitab Taurat, sope Josia erbahan kai pe ersukuten lebe ia man Dibata arah KataNa. I bas bindu 22:11 ikataken, “Kenca ibegi raja isi kitap e icaingkenna uisna perban biarna”, e me simbolisasi berbalik ku Dibata, janah kuasa i bas Dibata nari mpengasup Josia ngelakoken pembaharuan i bas dirina sendiri bage pe i bas bangsana. Alu kuasa Dibata ibebaskenna dirina ras bangsana i bas iketen kuasa-kuasa dibata-dibata si deban nari si erbahanca la ngena ate Dibata, janah tuhu-tuhu berbalik ras nembah man Dibata. Emaka melala pembaharuan si mehuli si ilakoken Josia i tengah-tengah bangsana erpalasken Kata Dibata (oge 23:1-22).

Secara khusus i bas ogenta sendah ay. 24 ikataken nina, “Guna ngikutken kai si tersurat i bas kitap si idat Imam si Mbelin Hilkia i bas Rumah Pertoton e, kerina kalak si beluh ndilo begu-begu ras ngoge nasip ipelawes Raja Josia. Kerina sembah-sembahen keluarga, berhala-berhala, ras sembah-sembahen perbegu si debanna si lit i Jerusalem ras i belang-belang Juda isasapkenna”. Ayat enda nuriken piga-piga pembaharuan si ilakoken Josia si intina njadiken Dibata sebage Dibata si tuhu-tuhu isembah bangsana la lit nari dibata-dibata si deban si man sembahen. Enda pelajaren si peteluken, i bas kita erbahan pembaharuan la banci lang kerina si ngambati penyembahenta man Dibata arus isasapken, janah tuhu-tuhu njadiken Dibata saja si isembah kita.

Ay. 25 ngatakenca, “La enggo pernah lit sekalak raja pe bagi Raja Josia tutusna, nembah TUHAN asa atena, asa ukurna ras asa gegehna ngikutken kerina Undang-undang Musa. Kenca ia pe lanai enggo pernah lit raja si bagi ia e patuhna”. Si peempatken, mari radu ras ertekad kita ngusih kai si enggo ilakoken Josia : i bas totalitasna nembah Dibata janah asa gegehna ilakokenna kerina si jadi peraten Dibata i bas kegeluhenna.

PA-nta sendah ibahan i bas rangka mperingeti Kemerdekaan RI si pe-73-ken, emaka ibahan tema “Pemimpin Si Mbebasken” alu tujun gelah Mamre meteh pemimpin si erkiniteken ras erkarakter, janah ngasup jadi pemimpin si mbebasken, erbahan pembaharuan i bas jabu ras masyarakat. Ngataken bujur kita erkiteken enggo 73 tahun Dibata ngarak-ngarak perdalinen kemerdekaan bangsa ras negaranta. Enggo silih berganti pemimpin negaranta, gundari enggo presiden si pe-7-ken. Enggo melala pembaharuan si ilakoken pemimpin-pemimpin negaranta khususna presidenta si pe-7-ken, tek kita maka ia tuhu-tuhu ikawali Dibata i bas ia ngelakoken erbage-bage perobahen i bas negaranta. Tapi tentu saja melala denga kekurangen i bas enggo 73 tahun kemerdekaanta. Adi sibaba tema-nta sendah ku bas konteks pemimpin negaranta tentuna si banci ilakoken kita e me sipilih pemimpin si ngasup mbebasken bangsana i bas kerina hal-hal si la mehuli, khususna kebodohan ras kemiskinan. Hal si deban si banci ilakoken kita e me pang kita menyuarakan suara kebenaran adi lit hal-hal si la sue ras aturen si berlaku. E ngenca si banci ilakoken kita.

Sue ras tujun si peduaken maka si paling pas e me mengkoreksi dirinta sendiri. Kita kerina pemimpin bai i bas jabuta, mungkin lit kita si jadi pemimpin i bas Gereja ras masyarakat. Penungkunenna, apakah kita enggo jadi pemimpin si erkiniteken, pemimpin si mbebasken i bas kerina kuasa si la mehuli nari si lit i bas doni enda, ras pemimpin si mabai pembaharuan? Adi enggo ninta, bujur man Dibata si enggo mpengasup kita. Tentuna arus tetap sipertahanken ras sitingkatken kualitas ras kuantitasna. Adi lenga ninta, maka kerina si ilakoken Raja Josia si jadi ogenta sendah banci jadi usihenta guna kita tuhu-tuhu jadi pemimpin si erkiniteken, pemimpin si mbebasken i bas kerina kuasa si la mehuli nari si lit i bas doni enda, ras pemimpin si mabai pembaharuan. Dibata si mpegegehi kita.

PA MORIA TGL. 12-18 AGUSTUS 2018 (HUT RI)

Pdt. Larena br. Sinuhadji (Nd. Rey Tarigan)

Ogen : Ester 4:1-17

Tema : PEMIMPIN SI MBEBASKEN

Tujun : Gelah Moria :

1) Ngidah kinipangen ras perjuangen Ester mbebasken bangsa Jahudi

2) Mbebasken generasi i bas ancamen pinakit sosial

Metode PA : Nobar (Nonton Bareng) kerna Pinakit Sosial

Klip : Dampak Pengguna Narkoba

Pengantar

Guna mpebagesi pengangkanta kerna perikop enda, maka metode sipake kita e me metode BGA (Baca Gali Alkitab). Alu bage, teridah bedana kita er-PJJ ras er-PA. I ja adi PA 70% Pendalaman Alkitab, 30% penggejapen. Janah metode enda pe nampati kita guna mbue ngidah ras terbuka nandangi point-point penting si banci sikembangken jadi melala tema. Erkiteken bas buku bimbingen PA Morianta enggo itentuken tema, maka kari bas akhirna sikaitken lebih khusus ku tema si iarapken.

Latar Belakang Ogen

I bas bindu (isingkat bd.) 3 jelas teridah maka perentah raja Ahasweros arah arahen politik kotor perdana menterina Haman, maka bangsa Jahudi, subuk nguda entah metua, diberu entah danak-danak arus ibunuh. Kerina arus ikernepken janah erta-ertana pe irampas (bd. 3:13). Munculna perentah enda, erkiteken litna perasaan merewa dingen nembeh ate Haman man Mordekai i ja la nggit Mordekai erjimpuh dingen nembah mungkuk man Haman. Alasen Mordekai jelas, maka ia kalak Jahudi, maka la banci ia nembah mungkuk man manusia seyakatan Dibata. Maka enggo iputusken Haman, maka labo Mordekai saja ngenca atena ibunuhna, tapi kerina kalak Jahudi si lit i bas kerajaan Persia (bd. 3:1-6).

Tokoh- Tokoh Ras Karakterna  I Bas Ogen

Mordekai, e me turang Ester sembuyak bapa, tapi asum mate orang tuana, ibuat Mordekai ia jadi anak angkatna je nari ipebelin-belinna bagi anakna kel (bd. 2:7). Janah Mordekai bas perikop enda icidahken sosok si peduli nandangi bangsana Israel. Tuhu-tuhu ia erceda ate nandangi kai si bakal terjadi nandangi bangsana. Icaingkenna bajuna tanda ceda atena, ipakena uis guni, icaburkenna abu ku takalna, je nari erdalan ia ku tengah kuta janahna ngandung nderkuh-nderkuh alu pusuh si getem. La nari iukurkenna kerna dirina, mela ngenehen jelma si nterem. Si e kerina erkiteken keleng atena nandangi bangsa Israel. Mordekai pe memegang prinsip alu nteguh, i ja ikirimken Ester paken Mordekai gelah itang-tangina uis guni e, la ia nggit.  Jelmana sangat teguh memegang prinsip, ras la ise pe banci “menyogok” ia termasuk turangna sendiri si enggo ianggapna jadi anakna. Berikutna sangat teguh perjuangenna, pantang mundur, la murah putus asa. Kurang akapna respon bas Ester nari, tapi terus idesakna gelah Ester bertindak (bd. 4:12-14).

Ester, sekalak kemberahen raja, kalak Jahudi si berjuang guna bangsana. Secara fisik, mejile rupana janah potongenna pe sikap (2:7). Keleng kel atena man turangna si enggo ianggapna jadi bapana. La ia lupa desken kacang lupa kulit. Meteruk ukurna ras mehuli, i ja iberekenna uis man paken Mordekai. Kenca la nggit pe Mordekai makesa, labo e erbahanca ngadi Ester nungkuni kai si enggo jadi. I ja suruhna ka Hatah, suruh-suruhenna si dilaki guna ngorati Mordekai, kai si enggo jadi janah engkai maka bage perbahanen Mordekai. Ertina, perbahanenna man Mordekai labo formalitas saja tapi tuhu-tuhu tulus, iklas ras serius. Awalna kurang gigih perjuangenna erkiteken litna kendala, tapi erkiteken kata “cambuk” arah Mordekai nari (ay. 14, adi sinik pe i bas paksa-paksa si bagenda, ugapa pe reh penampat man kalak Jahudi tah i ja nari gia, kalak Jahudi selamat nge, tapi Ester mate, ras kesusuren bapana bakal imasapken), ia siap mate guna bangsana. Nggit ia ngkorbanken dirina guna bangsana. Ester pe, teridah selaku pemimpin si berkarakter ras erkemalangen man Tuhan. Teridah i bas pemindonna man bangsa Israel guna mendukung perjuangenna arah doa ras puasa. Sekalak si berintegritas, labo hanya sekedar bicara. I ja labo hanya suruhna kalak ertoto ras erpuasa ia lang, tapi kai si isuruhna man kalak ia pe dalankenna (ay. 16d, “aku ras suruh-suruhenku si diberu pe la man, la minem selama telu wari telu berngi”).

Bangsa Israel, icidahken i jenda ceda atena, ras mbiar asum ibegina perintah bas raja nari arah momo maka maka bangsa Israel bakal ikernepken. Lit kinibiaren tapi tetap ernalem man Tuhan, teridah tangis alu sora si megang ras ngandung bangsa Israel i belang-belang propinsi rikut make usis goni. Erpuasa bangsa enda sebage tanda tetap ernalem man Tuhan.

Suruh-suruhen Ester si diberu ras dilaki termasuk Hatah merupakan sosok si erdahin si tutus ndahiken tugasna.

P3JT (Pelajaran, Perintah, Peringatan, Janji, Teladan)

Kai saja sibanci sidatken kita? Enggo tentu sada lebe kepedulian nandangi bangsanta bagi si enggo icidahken Mordekai. Kai pe nggit ia ndalankenca, dingen la nari pikirkenna dirina si penting keselamaten bangsana. Bage pe si ilakoken Ester, nggit ia ngkorbanken dirina guna keselamaten bangsana. Si berbentuk peringatan e me perkataan Mordekai man Ester si kedungenna memotivasi Ester, ”Adi sinik pe kam i bas paksa-paksa si bagenda”. Ertina, banci jadi genduari kita lit i bas posisi zona nyaman, la pe kita ikut berjuang, bangsata tetap banci selamat, tapi kita ras kesusurenta la nari iergai (ay. 14). Ula kari lit bas pikirenta, adi la aku je, la kari tembe, la berhasil. La pe kita je, pasti berhasil nge, adi nina Tuhan berhasil. Tapi kita la nari iperhitungken sabab la sipakeken gegeh, kepentaren, talenta si lit guna ikut berjuang nelamatken bangsata. Berikutna, terpanggil kita guna keselamaten ras kiniulin bangsanta.

Rikutken Tema ras Tujun i bas bahan PA Moria sekali enda, “Pemimpin Si Mbebasken” ras Moria terpanggil guna mbebasken generasi i bas ancamen pinakit sosial. Penjajahen si banci mengancam masa depan bangsanta, masa depanta, la nari i bas penjajah asing tapi melala termasuk radikalisme ras pinakit sosial si enggo menyebar subuk ku kuta-kuta kitik, ras itendengna orang tua, bage pe anak-anak. Narkoba, judi, premanisme, korupsi, radikalisme termasuk terorisme erpalasken agama. Erkiteken narkoba melala anak-anak entah pe orang muda enggo hancur masa depana, erkiteken la nari lit semangat hidup, kreativitas mati. Berhentilah kita menjadi Moria entah sekalak si pragmatis, si hanya berpikir untung - rugi. Adi menguntungken man banta, la pe payo, benar sikuit, si penting mbue menghasilken materi, umpamana mendorong pasangen guna korupsi, jadi agen togel, nggit ngedarken narkoba gelah pedas ndatken materi, nggit igalari kalak guna erbahan berita palsu bas media sosial si tujunna guna menteror kalak si deban, rsd.

Pemahamen si bagenda me si perlu ireformasi i bas dirinta nari, maka tetap kita nggeluh i bas kebenaren. Moria menjadi garda terdepan pang ngataken kebenaren guna melawan korupsi, judi, narkoba, radikalisme, terorisme, politik identitas, rsd. Kita terpanggil guna ertoto ras erpuasa guna bangsa kiniulin bangsa ras tindaken-tindaken nyata (kongkrit) dalam rangka mbebasken generasi muda i bas ancamen pinakit sosial nari. Marilah kita jadi Ester-Ester jaman genduari si bergandengan tangan guna berjuang i bas penjajahen ras ancamen pinakit sosial nari.