PA Kategorial GBKP Tgl. 19 - 25 Agustus 2018

PA MAMRE TGL. 19 - 25 AGUSTUS 2018

Nrs. Pdt. Larena Sinuhadji (Bp. Rey Tarigan)

Ogen : Epesus 5:14-16

Tema : NGGELUH I BAS TERANG

Tujun : Gelah Mamre :

1) Meteh maka ia kalak si nggeluh i bas terang ras pemenang

2) Nggit ncidahken biak-biak i bas terang

Penjelasen Bahan Pustaka Si Badia & Aplikasi

Pepulungen i Epesus Rasul Paulus si mantekisa (Perb. Rasul 18:19-21; 19:1-20; 20:17-38). La lit persoalan si khusus i bas perpulungen Epesus si erbahanca Rasul Paulus ngirimken suratna man perpulungen e. Persoalen si semal terjadi i bas perpulungen kalak si tek paksa si e, labo terjeng i Epesus saja, e me lit kalak si atena memecah-belah kiniersadaan i bas perpulungen. Janah i bas sisi si deban melala denga ka perpulungen kalak si tek si lenga paguh kinitekenna. Jadi tujun Rasul Paulus nulisken suratna man perpulungen Epesus e me guna mpeteguhi kiniteken perpulungen gelah reh paguhna i bas ngadapi erbage-bage tantangen ras kiniseran.

Ogenta sendah lit i teruh judul “Nggeluh i bas terang” (bhs. Ind. : “Hidup sebagai anak-anak terang”). Anding-andingen “terang” ras “gelap” akap kami enggo iangkai kita. Nggeluh i bas terang ertina : ngusih kekelengen Dibata (ay. 1); nggeluh erpalasken keleng ate Kristus (ay. 2); melasken pujian man Dibata (ay. 3-4); mperulih erbage-bage si mehuli, si bujur ras si tuhu-tuhu (ay. 9); ndarami kai si ngena ate Dibata (ay. 10). Lawanna e me nggeluh i bas gelap : erlua-lua, erlagu la mehuli entah pe merangap, cakap caram, cakap si lang-lang entah pe si kemali, nipui alu kata si sia-sia, ras la nggit ngikutken Dibata.

Secara khusus ogenta sendah e me ay. 14-16. Ay. 14 e me ende-enden pujin erpalasken Jesaya 26:19; 60:1 si tujunna gelah perpulungen e reh semangatna nggeluh erkiniteken erkiteken Kristus ersinalsal. I bas bhs. Ind., nina, “Kristus akan bercahaya atas kamu”. Ay. 15 e me persinget gelah perpulungen tetap mperdiateken lagu langkahna bagi kalak pentar. I bas bhs. Ind., nina, “Perhatikanlah dengan saksama, bagaimana kamu hidup, janganlah seperti orang bebal, tetapi seperti orang arif”. Emaka penting i jenda gelah perpulungen selalu waspada, berhati-hati, berpikir sebelum berkata-kata atau bertindak, bage pe mengevaluasi kerina si enggo iukurken, ibelasken, bage pe ilakoken, apakah enggo sue ras peraten Dibata? Adi lenga tentuna arus siperobahi, adi enggo tentuna perlu denga sitingkatken kualitas ras kuantitasna. Ay. 16 masih lit hubungenna ras ay. 15, salah sada ciri kalak pentar e me mpergunaken kesempaten si lit alu mehuli gelah ula turah sinanggel, sebab banci jadi kesempaten (waktu, kairos) e la nai banci siulihi.

PA-nta sendah, i bas rangka HUT Mamre GBKP si pe-23-ken, silaksanaken alu tema “Nggeluh i bas terang” alu tujun gelah Mamre meteh maka ia kalak si nggeluh i bas terang ras pemenang, bage pe nggit ncidahken biak-biak i bas terang. Mamre GBKP tuhu-tuhu nggeluh i bas terang Kristus tentuna jadi perayaken sedekah 23 tahun litna lembaga kategorial perbapan i bas gerejanta. Emaka banci sievaluasi baik secara pribadi bage pe secara kelembagaan i bas Runggun masing-masing, umpamana, enggo piga persen Mamre si ncidahken biak-biak i bas terang sedekah 2 tahun terakhir, apakah mengalami peningkatan, stagnasi, entah pe penurunan? Biak-biak i bas terang si nimaksud i jenda sue ras penjelasen i datas kerna nggeluh i bas terang Kristus.

Arah evaluasi si ibahan tentuna banci mabai kita ku bas kai-kai saja si perlu silakoken guna semakin meningkatken kualitas ras kuantitas erkiniteken Mamre baik secara pribadi bage pe secara kelembagaan alu program-program pembinaan si lebih tepat sasaran. Selamat HUT si pe-23-ken ninta man Mamre GBKP.

PA MORIA TGL. 19 - 25 AGUSTUS 2018

Pdt. Larena br. Sinuhadji (Nd. Rey Tarigan)

Ogen : Ende-enden Salomo 2:11-14

Tema : KINIJILEN SI MEHERGA MAN PERBULANGEN

Tujun : Gelah Moria : 1) Meteh maka kinijilen ndehara nambahi kemalemen ate ras keleng ate

2) Ngasup mereken pujin (apresiasi) ras ndalanken kinijilen si tuhu-tuhu

Metode PA : Kesaksian Pribadi & Diskusi

Klip : Kisah hidup istri yang setia

Penjelasen Bahan Pustaka Si Badia & Aplikasi

2:11 Paksa mbergeh ras paksa perudan enggo lepas. 2:12 I bas mbalmbal rudang-rudang enggo terlak e kap paksana rende-rende. Sora ndukur erlebuh terbegi i juma-juma. 2:13 Buah ara enggo mulai tasak, bau bunga anggur enggo teranggeh. Mari impal, mari keleng ateku, ikutken aku. 2:14 Kam desken nderpati si cebuni i bas lingling batu. Pelepas min kuidah rupandu si mejile, pediat min kubegi sorandu si mehuli e.

Kitab ende-enden Salomo e me ende-enden keleng ate si nipepulung i bas sada kitab. Isina e me ende-enden dilaki ngaloi ende-enden diberu entah pe ende-enden dilaki ialoi ende-ende diberu. Janah ende-enden enda mekatep iertiken jadi gambaren kerna hubungen Dibata ras bangsaNa. Sope nats si jadi perikopta situhuna enggo ibenaken arah pujin sekalak diberu nandangi dilaki. Janah secara khusus i bas perikop enda merupaken respon i bas dilaki nari man sekalak diberu si isina berupa pujian ka. Ituriken kerna ketedehen ate man pasangen, i ja paksa mbergeh ras perudan enggo lepas, janah i bas mbal-mbal rudang-rudang enggo terlak, buah ara enggo mulai tasak, bau bunga anggur enggo mulai teranggeh. Bage pe ketedehen ate man pasangenna si la ibuni-buniken tapi iekspresikenna, iungkapkenna, “Mari impal, mari keleng ateku, ikutkenndu aku”. Lit dua kali panggilan (penyebuten) nandangi pasangenna, si banci membangkitken romantisme, impal - keleng ateku. Igambarkenna pasangenna ndai desken nderepati si cebuni i bas ling-ling batu, gelah min nuduhken rupana, rupana si mejile si itujuken man pasangenna, la man kalak si deban. Apresiasi si ibereken labo hanya berupa pujian fisik tapi pe karakterna, “pediat min kubegi sorandu si mehuli e”. Sora i jenda labo hanya kebeluhen rende tapi termasuk kata-kata si ipedarat pasangenna si diberu si mereken motivasi ras semangat.

Bahan PA Moria sekali enda dalam rangka HUT Mamre GBKP pe-23-ken, alu tema “Kinijelen si meherga man perbulangen”. Alu tujun si pemena, meteh maka kinijilen ndehara nambahi kemalemen ate ras keleng ate. Pasangen suami - istri e me dua insan si enggo ipersada Dibata, si nggeluh guna jadi penolong man pasangenna. Suami hadir sebagai penyemangat istri bage pe sebalikna, termasuk kecantikan subuk fisik ras batin (inner beauty). Adi cantik fisik tentuna relatif, tapi si pasti pasangenta si enggo ibereken Dibatalah siakap kita si gantengna entah pe si cantikna walaupe melala kalak ganteng ras cantik i sekelewetta. Pemahaman e min arus nggeluh bas pasangen suami - istri gelah njagai masing-masing pribadi la pindah ke lain hati erkiteken idahna ka lit si tergantengen (terjilen) asangken pasangenna. Kinijelen fisik ras pertending penting dalam rangka nambahi kemalemen ras keleng ate. Kinijilen fisik akan luntur oleh bertambahna usia ras erbage-bage hal, tapi labo berarti la perlu siperdiateken. Umumna kalak Karo lemah (kurang) dalam hal perawaten body entah pe wajah, alu alasen sibuk ngurusi jabu entah pe juma; “man kai nari perawaten adi enggo ia pasangenta?” Ertina, enda penting tapi labo si terpenting. Si pentingna e me kap kecantikan dari dalam (inner beauty) dingen enda la ermasap-masap (tidak lekang oleh waktu) e me kelemahlembuten, ate saber, kekelengen, kesetiaan, rukur meteruk, mehuli rsd. Biak-biak enda me si banci mereken semangat ras kemalemen ate man pasangen terutama adi lit situasi-situasi si erbahanca latih ukur perbulangen tapi kehadiren ndehara banci jadi “tambar” man perbulangenna.

Tujun si peduaken, ngasup mereken pujin (apresiasi). Lit lima bahasa cinta : 1)          Melalui kata-kata pujian (apresiasi). 2) Melalui sentuhan fisik. 3) Meluangkan waktu yang berkualitas. 4) Melalui tindakan melayani. 5) Memberi hadiah (gift). Kata-kata pujian (apresiasi) itamaken bas nomor urut pemena, sabab kerina kita ibereken Tuhan babah si banci ipakeken selain kalak si tuna wicara. Tapi mekatep sulit kel kita mereken apresiasi (pujian) termasuk man pasangen sendiri. Tentu mbue alasenna, selain tidak terbiasa erkitken bentuken budaya, la siakap penting, mereha entah pe mela, alasen si deban banci erkiteken egois (kita ateta min si lalap ipujiken). Firman Tuhan mpersingeti kita, mulailah dari diri kita, ndehara man perbulangenna, ras benaken i bas hal-hal si kitik. Ula timai ia dat bonus bas ingan erdahinna nari maka sipujiken. Umpamana, “Ganteng kel kam sekali enda Pak, apai ka pakendu baju batik megarandu”. Babana barang belajanta asum ras-ras kita ku pajak, “Bujur ya Pak, meriah ukurku sekali-sekali ras kita ku pajak”. Mbaru denga potongna bukna e pe banci ka sipujiken, rsd. Memanggil pasangen dengan panggilan mesra, umpama, ma tigan, darling, honey, sayang rsd., enggo pasti erbahanca meriah ukur pasangenta dingen dalanna keharmonisen ras keromantisen tetap terjalin alu mehuli. Alu bage, ugapa pe situasi i bas jabu subuk senang entah pe susah, keluarga e tetap paguh, sempabu, la banci tergoda oleh orang ketiga (pelakor ras pebikor) la berhasil nehi sura-surana. Banci jadi agak sulit menakenca guna mengapresiasi pasangenta, tapi la lit kata terlambat guna erbahan si mehuli dalam rangka mpeteguhi hubungen bas jabu. Selamat Ulang Tahun Mamre, jadilah Bapa si erkiniteken.