PJJ GBKP Tgl. 29 Juli - 4 Agt. 2018

PJJ GBKP TGL. 29 JULI - 04 AGUSTUS 2018

Pdt. Larena Sinuhadji (Nd. Rey Tarigan)

Tema : TANGGUNG JAWAB NANDANGI GEREJA - 77 TAHUN GBKP NJAYO (1 Tim. 4:11-16)

Menjadi dewasa (mandiri, njayo) labo banci terjadi secara instan tapi perlu proses si arus ibentasi. Walaupe lit nge kalak (keluarga), termasuk organisasi, si njayo terpaksa erkiteken situasi. Tapi umumna, guna banci mandiri la banci instan si kedungenna erbahanca banci ertanggung jawab i bas kegeluhenta subuk secara jasmani, mental, ras pertendin.

Paulus mereken suratna man anak rohanina Timotius gelah banci ia ertanggung jawab ras jadi usihen selaku pemimpin jemaat walaupe nguda denga. Arah pengajaren Timotius iarapken jemaat pe dewasa, la mburlah-mburlih kinitekenna (ikut-ikuten, murah terpengaruh), bahkan banci jadi usihen ka. Rikutken perikopta lit piga-piga hal maka kita enggo mandiri entah dewasa :

1.  Geluhna jadi usihen. Kalak si nguda denga biasana rusur  iremehken (mapas kalak man bana). Alu bage gelah la kalak mapas terlebih Timotius paksa si e jadi pemimpin, geluhna arus jadi usihen. I bas pengerana, lagu langkah, nehken keleng ate,  kiniteken bage pe i bas ukur si bujur. Ertina, sue kata ras perbahanenna. Sabab lit ka pemimpin la berintegritas, beluh ngenca ngerana tapi kosong perbahanen.

2.  Nggeluh i bas Kata Dibata. Setia i bas ngoge ras mpelajari Kata Dibata. Adi sikaitken ku bas ay. 6, maka kesetiaan ngoge Pustaka Si Badia erbanca megegeh pertendinta. Adi enggo megegeh la murah ijola-joleken pengajaren si la mehuli. Tugas Timotius ngiah-ngiahi perpulungen ras ngajarisa. Banci jadi erkiteken lenga dewasa kiniteken e maka perlu denga iiah-iahi. I bas waktuna rikutken proses, maka enggo turah ketedehen ate bahkan enggo jadi sada kebutuhen si erbahanca la nari perlu iiah-iahi kalak.

3.  Alu senang makeken pemere si enggo ibereken Dibata. Sabab kegeluhenta desken sada kula, si arus saling menolong sada ras si debanna. Arah kita banci mpergunaken talenta entah pemere si enggo ibereken Dibata erbahanca geluhta berarti (bermakna) man kalak si deban. Ras si e kerina arus sidalanken alu ertutus ate ola mekarus.

4.  Tetap metenget (waspada) erkiteken buena tantangen ras godaan i bas kegeluhenta si erbanca banci kita ndabuh. Emaka nasehat Paulus arus banci kita njaga dirinta ras kai si niajarken kita. Ula siakap kita si pentarna, si badiana, piah dungna la kita metenget, banci erbahanca kita murtad. Jagai dirinta ras jagai perpulungen arah pengajaren-pengajaren si benar, gelah radu selamat kita ras perpulungen.

Adi si e sidalanken alu dem ketutusen maka lambat laun teridah pembaharuan i bas dirinta, reh dewasana kinitekenta, reh ertanggung-jawabna kita, si erbahanca kalak si deban pe ngidah kemajuan e i bas dirinta (geluhta).

GBKP i bas Tgl. 23 Juli 2018 mperingeti 77 tahun kemandirianna (njayo). Situhuna rikutken situasi paksa si e, i ja i bas penduduken Jepang si mengharusken kerina kalak Belanda nadingken Indonesia, termasuk daerah Karo, maka GBKP enggo mandiri. Njayo erkiteken terpaksa. Tapi enda me si mehulina rikutken rancangen Dibata, sabab sedekah enda GBKP ininaboboken erkiteken tetap bergantung man Zending Belanda (Pandita-pandita Belanda). Padahal paksa si e enggo 51 sehna Berita Si Meriah ku kalak Karo (Buluhawar, 18 April 1890). Puji Tuhan, walaupe la pedas perkembangenna, GBKP ambah warina enggo semakin maju ras berkembang, subuk secara kuantitas bage pe kualitas. Secara kuantitas memang lenga bo banci bangga kita, sebab ratana 40-50% denga kalak si aktif ku Gereja. Adi sievaluasi terdauhen, dari si aktif 40-50% e, piga % ka si geluhna tuhu-tuhu enggo dewasa, enggo banci jadi sira ras terang. Secara kualitas GBKP tuhu enggo jadi pasu-pasu man kalak si deban secara khusus i bas Bidang Diakonia tingkat Sinodal. Secara pribadi, keluarga ras Runggun? Em si terus jadi perayakenta.

Tema-ta ngatakenca “Tanggung Jawab Nandangi Gereja”. Tri-Tugas Gereja (Bersekutu, Bersaksi ras Melayani) menjadi tugas kalak si enggo tek man Yesus. Tugas enda arus sedalanen ras seimbang silakoken. La banci bersekutu saja kita megegeh tapi kurang pelayanenta bahkan geluhta la jadi kesaksian man kalak si deban. Ntah pe, i bas melayani kita la pernah tading, nampat-nampati kalak si perlu man sampaten  tapi ku Gereja ras PA - PJJ la pernah kita pulung. Kalak si enggo mandiri ietehna tanggung jawabna ras idalankenna alu tutus dingen dem keriahen ukur. Mulailah dari diri sendiri ras i bas hal-hal si kitik. Jadi usihen, senang ngoge ras mpelajari Kata Dibata, mpergunaken pemere si enggo ibereken Dibata gelah geluhta jadi kesaksian man kalak si deban ras tetap kita metenget. Alu bage sebage kalak Kristen, kita jadi kalak Kristen si berkualitas.