PJJ GBKP Tgl. 04 - 10 Maret 2018

PJJ GBKP TGL. 04 - 10 MARET 2018

Pdt. Larena br. Sinuhadji (Nd. Rey Tarigan)

Tema : TATANG-TATANGLAH PEMERENTAH (1 Tim. 2:1-7)

Pokok-pokok Pengakuan Iman (Konfesi) GBKP i bas Bab VII ngerana kerna pemerentah nuratkenca: “Kami percaya bahwa : Pemerintah adalah hamba Allah untuk menyejahterakan bangsa dan negara (Roma 13:4-5). Dalam pemahaman itu, orang Kristen bermitra, mendoakan dan taat pada pemerintah (Yer. 29:7, Mat. 22:21; 1 Tim. 2:1-2). Di samping itu, orang Kristen harus berdialog dan menyuarakan suara kenabian terhadap pemerintah dalam melaksanakan kewajibannya untuk menegakkan kebenaran dan keadilan (Maz. 72:1-4).”

Janah secara khusus arah bahan PJJ sekali  enda ilumbaken man banta guna natang-natang pemerintah. 1 Tim. 2:1-7 e me surat Paulus man Timotius kerna kebaktin i bas perpulungen (doa Jemaat). Ipersingeti Paulus gelah nehken syafaat, pemindon ras pertoton rikut ras pengataken bujur man Dibata guna kerina manusia, guna raja-raja ras kerina si erkuasa (“naikan syafaat dan ucapan syukur untuk semua orang, untuk raja-raja dan untuk semua pembesar”). Tujunna jelas gelah banci kita nggeluh senang dingen dame erkiteken pemerentah ndalanken tanggung jawabna alu mehuli.

Engkai maka arus sitatang-tatang pemerentah? Sabab pemerentah e me persuruhen Dibata guna banci ngaturken perdalinen bangsa ras negaranta, benaken daerah si terkitikna seh ku wilayah lebih tinggi (Roma 13:4-5). Enggo pasti adi la lit pemerentah wilayah e pasti kacau, sabab la lit si ngaturkenca. Emaka mehuli entah la pe mehuli pemimpin tetap kita butuh pemerentah e. Maka si payona, tetap sidukung alu erbage-bage hal gelah tetap dalankenna dahinna alu mehuli. Uga caranta i bas banci mendukung pemerentah e? Selain tetap siinget i bas pertoton syafaatta subuk i bas perpulungenta, entah pe i bas jabunta sekalak-sekalak arus tetap kita berperan aktif (berpartisipasi) ndalanken tanggung jawabta selaku warga negara si mehuli. Kai si menjadi kewajibanta : nggalar pajak, njaga lingkungen gelah tetap aman ras nyaman alu siskamling, labo kita erbahan kerusuhen, njaga kebersihen lingkungenta alu ikut gotong-royong, aturen-aturen si enggo ibahan pemerentahta arus sitaati gelah reh ulina perdalinen kegeluhenta.

Bahkan arah Konfesi GBKP pe jelas, arus pang kita menyuarakan suara kenabian, ertina perlu sikritisi erbage-bage hal kebijaken-kebijaken si ibahan pemerentahta adi la siakap pas entah pe enggo melenceng i bas tanggung jawabna selaku persuruhen Dibata. Kita perlu kritis nandangi penyelewengen-penyelewengen kekuasaan alu pang kita ngataken si benar, paling tidak la kita nggit ikut terlibat i bas perbahanenna si la mehuli. Sabab adi kita sendiri pe enggo terbawa arus labo mungkin lit nyalinta guna menyuarakan suara kebenaren. Nabi Jeremia ngatakenca, adi pemerentahta sikap maka kita pe selaku wargana ikut sikap. Mari tetap sitatang-tatang pemerentahta.