PA Kategorial GBKP Tgl. 4 - 10 Feb. 2018

PA MAMRE TGL. 4 - 10 FEB. 2018

Pdt. Larena br. Sinuhadji (Nd. Rey Tarigan)

EVALUASI PA MAMRE 2017

Ogen : Ester 6:1-11

Tema : BAPA SI NDALANKEN PEDAH DIBATA (Negara ras Masyarakat)

“Jahat sura-sura manusia tapi banci isalihken Dibata jadi mehuli”. Pernyataan enda me si nyata jadi nandangi Mordekai, i ja erkiteken segatna ate Haman man bana, ersura-sura ia namaken Mordekai ku tiang gantungen ras ngkernepken kerina kalak Jahudi si lit i Persia.

Raja la banci tunduh, dalanna nuruh pegawaina guna ngelegi catatan sejarah kerajaan gelah iogeken man bana. I bas bagin si iogeken ndai tersinget gelar Mordekai si menghalangi sura-sura si jahat dua kalak pegawai raja si bersekongkol munuh raja, eme Bigtana ras Teres, si ngawal pintun i bas istana (bdk. Ps. 2:19-23). Tapi seh asa genduari Mordekai lenga datkan pujin ras pangkat erkiteken jasana e.

Emaka ersura-sura raja mereken kehamaten man Mordekai. Rembang paksa si e reh Haman bengket ku bas kesain istana. Kerehenna lako mindo gelah Mordekai igantung i tiang gantungen si mbaru denga dung ipajekkenna. Nina raja, “Lit sekalak jelma; ateku mereken kehamaten man bana. Kai nge akapndu patut kubahan man bana?” Akap Haman pasti ia nge si bakal ipehaga. Emaka nina man raja, “Buatlah paken kerajaan si meherga si biasa ipakendu. Je nari perentahken gelah ilegi kudandu, janah tamaken mahkotandu ku takal kuda e. Kenca bage dilo sekalak pembesar kerajaan si megajangna pangkatna lako makeken pakenndu ndai man kalak si ipehagandu. Kenca ipakena, iersakna kudandu, emaka pembesar ndai ngarakken ia arah tengah-tengah kuta janahna ersurak-surak nina, “nehenlah bagenda me perbahan raja nandangi kalak si ipehagana.” Kai si enggo ikataken Haman man raja, isuruh raja guna ilakoken Haman, ula sitik pe ikurangi. Haman nge si kedungenna ngaraken Mordekai asum ia ipehaga i tengah-tengah dalan kuta.

Kenca dung si e, mulih Mordekai ku kerabangen istanana, sedangken Haman pedas-pedas mulih ku rumahna. Mela kel akapna. Janah iturikenna kerina si enggo jadi man ndeharana ras teman-temanna. Janah nina kalak enda, “Kuasandu enggo mulai ndabuh man Mordekai, ia kalak Jahudi, emaka labo terlawanndu ia. Uga pape talu nge kam ibahanna.”

Mordekai kalak si erkemalangen man Tuhan, janah icidahkenna arah pendahinna selaku pegawai raja. Enggo pe iselamatkenna raja i bas sura-sura pegawaina si berencana munuh ia, janah sama sekali labo lit penghargaan ras ucapan terima kasih arah pihak kerajaan nari, labo e erbahanca la nari ia setia ndalanken tanggung jawabna. Erkiteken ia kalak Jahudi, janah lit sura-sura Haman ngkernepken kalak Jahudi erkiteken segat atena man Mordekai, alu dem perjuangen pe Mordekai membela ras terus erjuang uga makana bangsana banci selamat. Ikorbankenna dirina pe labo akapna dalih.

Tema “Bapa si ndalanken pedah Dibata” (Bangsa ras Masyarakat). Mulihi arah bahan PA Mamre sekali enda ipersingeti kerna tanggung jawab Mamre GBKP sebage bapa sekaligus bagin i bas anggota masyarakat i tengah-tengah bangsanta. Pedauh sikap la peduli, tapi kai si banci ilakoken idalanken alu dem keriahen ukur. Umpamana, ikut njagai keamanen, kebersihen i bas lingkungen i ja tading, gotong royong, nggalari pajak, mentaati aturen hukum i bas negaranta, menjaga kesatuan ras persatuan NKRI, rsd.