PJJ GBKP Tgl. 18 - 24 Februari 2018

PJJ GBKP TGL. 18 - 24 FEB. 2018

Pdt. Larena br. Sinuhadji (Nd. Rey Tarigan)

Tema : DAHILAH TUHAN MAKA KAM NGGELUH (Amos 5:4-6)

Amos bindu 5 i bas Pustaka Si Badia ibere judul “Pendilo gelah jera” (terj. BIS-BIMK, “Panggilan untuk bertobat”). Adi sioge kerina ayat i bas bindu 5 memang teridah pendilo Dibata arah nabiNa Amos nandangi bangsa Israel gelah jera i bas kinilaadilen bage pe ibadah palsu si ibahanna. Bangsa Israel si nimaksud i jenda e me kalak Israel si lit bas ia kinibayaken ras kekuasaan. I bas ay. 7-13 jelas icidahken maka kalak si bayak ras si erkuasa nge si ngelakoken rupa-rupa kinilaadilen, bage pe i bas ay. 21-27 jelas maka kalak bayak ngenca si ngasup mereken persembahen-persembahen si meherga.

Pendilo gelah jera lit i bas ay. 4-6 si jadi bahan ogen i bas PJJ-nta sendah. Nina TUHAN man kalak Israel, “Marilah, dahi Aku, maka kam nggeluh”. Pendilo enda iulihi i bas ay. 6 nina, “Dahilah TUHAN maka kam nggeluh”. Adi sikaitken ras kinijeran entah pe pertobaten akap kami terjemahen BIS-BIMK lebih tepat sebab ngajuk gelah mulihken (berbalik arah) ku Tuhan, nina “Kembalilah kepada TUHAN, maka kamu akan hidup”. Pendilo si seri ras ay. 4-6 lit i bas ay. 14-17 si ngajuk maka kerembaken ras Dibata arus teridah secara konkrit alu ngelakoken si mehuli, ciga man kejahaten, bage pe ngena ate man si benar (kebenaren) ras keadilen. Pilihen si deban selain jera, ndahi Tuhan, ras ngelakoken kerina si ngena ate Dibata, e me ukumen i bas Dibata nari. Adi pilihen e ihadapken man kita, pilihen si apai si ipilih kita?

Tema i bas PJJ-nta sendah e me “Dahilah Tuhan maka kam nggeluh”, i bas terj. TB-LAI nina, “Carilah Tuhan, maka kamu akan hidup”. Akap kami tema sendah merupaken pengajuk man banta gelah milih ndahi Tuhan ras ngelakoken kerina si mehuli sue ras peratenNa asangken milih ngelakoken rupa-rupa kinilaadilen bage pe ibadah-ibadah si palsu. Keadilen e me tema si penting i bas kitab Amos. Ikataken i bas Alkitab Edisi Studi (hlm. 1447) nina, “Keadilan di dalam Alkitab tidak semata-mata hanya mematuhi hukum, tetapi juga berarti hidup dalam relasi kasih dan kepedulian. Keadilan berasal dari Allah dan mengalir dari kasih Allah yang melimpah. Allah menghendaki agar keadilan itu berlaku untuk semua ciptaan ... Keadilan begitu penting bagi Allah sehingga jika umat Allah tidak berlaku adil dalam relasi dengan sesama, maka ibadah dan kesalehan mereka menjadi sia-sia. Semua umat Allah memang diharapkan berlaku adil, tetapi terutama mereka yang berkuasa dan kaya harus menjadi contoh hidup mengenai keadilan Allah. Mereka yang memakai kekuasaan dan kekayaan untuk mengambil keuntungan dari sesama akan dihukum Tuhan”.

Gereja iutus Dibata guna majekken kebenaran, keadilan, kasih, damai sejahtera, ras nampati si lemah sue ras Kata Dibata i tengah-tengah doni enda. Akap kami enda palas kiniteken si jelas ras tegas labo saja palas i bas pelayanen tapi pe palas i bas kerina dampar geluh termasuk i bas bidang politik. Gereja arus jadi teladan i bas kerina bidang khususna bidang politik. Emaka mari radu ras sidukung Gerejanta i bas sikap iman-na nandangi dunia politik. Akap kami sikap iman GBKP nandangi dunia politik enggo jelas i bas Konfesi GBKP, bagepe i bas pengelayasi-pengelayasi si iterbitken GBKP. Si utamana mari radu ras siusih kai si ilakoken Yesus Kristus.

Yesus Kristus i bas pelayanenNa i tengah-tengah bangsa Israel ibenaken alu berita pertobaten, kenca bage iumputi alu pengajaren-pengajaren kerna nggeluh i bas kegeluhen si mbaru i bas Kinirajan Dibata si dem alu syalom Dibata. Syalom Dibata i bas paksa sendah e me geluh i bas keselamaten holistik si dem alu kebenaran, keadilan, kasih, damai sejahtera, nampati si lemah, bagi si iperjuangken Yesus i bas pelayanenNa i tengah-tengah doni enda. Perjuangen Yesus i bas majekken kebenaran, keadilan, kasih, damai sejahtera, ras nampati si lemah labo hal si murah, melala tantangen si nihadapiNa, terutama i bas kalak si erkuasa nari paksa si e. Tapi Yesus labo surut, terus IA berjuang seh ku kedungenna. Teladan Yesus enda i bas sada sisi ngajuk kita gelah reh semangatna kita memperjuangken kebenaran, keadilan, kasih, damai sejahtera, nampati si lemah i japa pe kita ringan. Janah i bas sisi si deban iajuk kita gelah jadi teladan si mehuli i japa pe kita ringan ras i bas kai pe profesinta. Mari radu ras mindo pergegeh i bas Dibata nari gelah ipengasupNa kita ngelakoken kerina si jadi peratenNa.