PJJ GBKP Tgl. 4 - 10 Feb. 2018

PJJ GBKP TGL. 04 - 10 FEB. 2018

Pdt. Larena br. Sinuhadji (Nd. Rey Tarigan)

Tema : KINIRUGIN KAP KERINA RIMBANGKEN KRISTUS (Pilipi 3:1-11)

Kai nge si mehergana i bas geluhta? Tentu beda-beda jawabenta. Lit deba erta kebayaken si mehergana akapna. Lit ka jabaten kekuasaan si genduari sangana idudukina. Lit ka prestasi-prestasi akademis si luar biasa. Lit ka kinijilen daging kula si nibanggakenna, rsd. Banci jadi erkiteken si nibanggaken kita e, erbahanca lebih fokus ukurta ku je, lit deba jadi ILAH-na pe, bahkan kai pe nggit ilakokenna guna mpertahanken si mehergana ndai, termasuk cara-cara si la mehuli pe nggit ia ngelakokenca.

Pengalamen si bage e pe pernah ialami Paulus ope itandaina Jesus Kristus. Statusna sebage kalak Jahudi, sebage “bangsa pilihen” sangat ibanggakenna. Ia isunatken asum umurna waluh wari. Suku Benyamin, ras i bas golongen Parisi nari. Ketutusenna ndalanken aturen agama ras budayana erbahanca ia jadi kalak si fanatik, radikal i bas agamana seh makana njemba ia nggasgasi Gereja. Janah pang ia ngatakenca, i bas ndalanken undang-undang labo pernah ia ersalah. Tapi kenca enggo Jesus Kristus, si ndai ianggapna untung, genduari enggo kinirugin. Kai pe kinirugin iakapna rimbangken si mehergana eme penandaina kerna Jesus Kristus.

Bahkan si ndai iakapna meherga (ibanggakenna) enggo iambekkenna, ipedirepna desken sampah, gelah banci itandaina Kristus dingen tuhu-tuhu ersada ras Jesus. Kenca enggo itandaina Kristus terjadi perubahen i bas diri Paulus. La nari undang-undang si jadi syarat i bas keselamaten bas dirina tapi kinitekenna man Jesus (sola fide) ras si e kerina erkiteken perkuah ate Tuhan (sola gratia). Adi nai ia si berusaha ras berjuang, tapi genduari Dibata sendiri si ngerembaken diriNa man Paulus erkiteken kinitekenna man Dibata.

Pengangkanna si mbaru kenca tandaina Kristus mabai Paulus tetap setia i bas ndalanken tanggung jawabna selaku Rasul Tuhan, subuk senang entah pe susah. Sura-surana nandai Kristus dingen nggejapken kuasa kekekenNa ras ikut i bas kiniseranNa. Kai pe si nidalankenna palasna erkiteken Kristus, emaka labo akapna dalih ipenjara pe ia erkiteken meritaken Kata Dibata.

Lit lagu “Mengikut Yesus Keputusanku”. Adi enggo e jadi keputusenta berarti kai pe silakoken kita tujunna guna kemulian man Jesus. Lit pe erta, jabaten, prestasi-prestasi si luar biasa, rsd., kerina guna kemulian man Kristus, labo si e siagahken. Pengalamen ras pengangkan bagi si enggo ilumbaken Paulus, banci nggeluh bas kita asum kita pe tuhu-tuhu lit pengalamen rembak ras Kristus, nggeluh bas Kristus, metedeh ateta ndalanken pedahNa. Arah si e mabai kita tetap setia jadi pengikut Kristus, amin kai pe si terjadi.

Mari radu ras sisungkun dirinta, ras banci sievaluasi pengalementa i bas kita enggo tek man Jesus Kristus. Apakah tuhu Jesus si utamana ras si mehergana ras si debanna kinirugin rimbangken Kristus? Adi Kristus si utama, berarti senang ras susah tetap setia mengikut Jesus. Kai pe silakoken kita guna kemulian man Kristus. Janah terjadi perubahen ku arah si mehuli kenca enggo sitandai Kristus. Ula sempat tek kita man Kristus, tapi si lahiriah tetap menjadi si utama i bas kegeluhenta bahkan enggo ia jadi tujun utamanta nggeluh ras sipuja.