PJJ GBKP Tgl. 11 - 17 Feb. 2018

PJJ GBKP TGL. 11 - 17 FEB. 2018

Pdt. Larena br. Sinuhadji (Nd. Rey Tarigan)

Tema : PULAHILAH BANGSA-NA (Lukas 4:18-19)

(Topik : Politik, Konfesi GBKP, Realita Perpolitiken)

Turi-turin kerna masa awal pelayanen Yesus Kristus rikutken Injil Lukas, ibenaken alu peridin Johanes Peridiken, iumputi alu icubai Iblis empat puluh wari dekahna i gurun pasir. Kenca italukenNa kuasa Iblis i gurun pasir, ibenaken Yesus pelayanenNa i Galilea. Ituriken maka ngajar Yesus i rumah-rumah pertoton si lit janah kerina kalak muji IA. Bage ka pe si nilakokenNa i kuta Nazaret. Ituriken i bas ay. 16-21, “Seh ka pe Yesus i Nazaret, e me kuta inganNa ipebelin. Sanga wari Sabat ku Rumah Pertoton IA bagi biasana. Tedis IA guna ngoge Pustaka Si Badia. Je nari ibereken kalak man baNa kitap Nabi Yesaya (Yes. 61:1-2). Kenca ipepayoNa, idahNa me ayat-ayat si ateNa iogekenNa e me, “Kesah Tuhan lit i babongKu, sabap enggo ipilihNa Aku guna meritaken Berita Si Meriah man kalak si musil. IsuruhNa Aku erberita man kalak si tertaban maka ipulahi me ia, janah kalak si pentang erpengidah me, kalak si itindas ipulahi me. Janah mpebetehken masana Tuhan mulahi bangsaNa.” Kenca dung IA ngoge, igulungNa kitap ndai, iulihkenNa man si erdahin i je, jenari kundul IA. Kerina mata kalak i bas rumah pertoton e ngenen ku IA. E maka ibenaken Yesus ngajar nina, “Sendah enggo seh isi Pustaka Si Badia si ibegindu ndai.” Kai enda antusenna?

Si pemena lebe, Yesus e me penggenapen nubuaten-nubuaten kerna Mesias si lit i bas Padan Si Ndekah. Ay. 18-19 si iogeken Yesus e me ngataken kerna DiriNa jine.

Si peduaken, ay. 18-19 e me palas pelayanen Yesus. Adi sikaitken ras Konfesi GBKP kerna politik point si pemena ras si peduaken (“Kami percaya, bahwa: 1. Politik merupakan upaya untuk menata kehidupan masyarakat demi kesejahteraan bersama. 2. Politik  menjadi sarana kesaksian dan alat untuk menghadirkan Kerajaan Allah di tengah masyarakat.”), jelas maka politik si ilakoken Yesus e me politik guna menata kegeluhen masyarakat demi kesejahteraan bersama, sekaligus ersaksi kerna Kinirajan Dibata.

Si peteluken, lit kesadaran si mbages i bas diri Yesus maka Kesah Si Badia lit i bas IA janah tunduk IA nandangi Dibata si ngutus IA guna ngelakoken misi Dibata i bas ay. 18-19. Ertina nggit Yesus ngkorbanken kepentingenna (DiriNa) guna kepentingen si lebih mbelin ras mulia e me kepentingen Dibata. Selain si e, tek Yesus maka misi Dibata e misi si mendesak si arus segera ilaksanaken. E maka nina Yesus i bas ay. 21, “Sendah enggo seh isi Pustaka Si Badia si ibegindu ndai.” Ertina ayat enda labo terjeng negasken kerna kerehen Yesus sebage Mesias tapi penegasen maka sendah waktu si tepat guna ngelakoken misi Dibata.

Tema si seh man banta i bas PJJ sendah e me “Pulahilah BangsaNa” (Topik : Politik, Konfesi GBKP, Realita Perpolitiken). Kerna tema si seh man banta sendah, Pustaka Si Badia enggo mereken melala kesaksin kerna Dibata si enggo mulahi bangsaNa. Janah tek kita maka Dibata i bas Yesus Kristus pe enggo mulahi kerina kita kalak si tek i bas kuasa dosa nari, janah kerina kalak si tek man Yesus Kristus enggo nggeluh i bas kegeluhen si mbaru e me kegeluhen i bas Kinirajan Dibata si dem alu keselamaten, kekelengen, keadilen, kebenaren, kedamen, bage pe keberpihaken nandangi kalak si lemah.

Kerna politik, lit erbage-bage definisi politik : 1) Politik adalah seni dan ilmu untuk meraih kekuasaan secara konstitusional maupun nonkonstitusional. 2) Politik adalah usaha yang ditempuh warga negara untuk mewujudkan kebaikan bersama (teori klasik Aristoteles). 3) Politik adalah hal yang berkaitan dengan penyelenggaraan pemerintahan dan negara. 4) Politik merupakan kegiatan yang diarahkan untuk mendapatkan dan mempertahankan kekuasaan di masyarakat. 5) Politik adalah segala sesuatu tentang proses perumusan dan pelaksanaan kebijakan publik. I bas piga-piga definisi politik enda akap kami point 1, 3, 4, ras 5 si perlu iwaspadai erkiteken i bas kinata politik si terjadi i bas negaranta point-point enda ndai si rusur isalahgunaken guna kepentingen pribadi entah pe kelompok tertentu.

Pandangan entah pe sikap GBKP nandangi politik akap kami enggo jelas i bas Konfesi GBKP. Ertina palas kiniteken GBKP i bas erpolitik ngusih teladan Yesus Kristus, politik si dem alu keselamaten, kekelengen, keadilen, kebenaren, kedamen, bage pe keberpihaken nandangi kalak si lemah. La nggit GBKP terlibat i bas kepentingen-kepentingen si la sue ras peraten Dibata. Tading genduari kita sebage anggota-anggota GBKP, uga ninta? Si mehulina tentu sidukunglah kai si menjadi sikap iman GBKP nandangi politik. Apai kita, si terlibat aktif i bas politik praktis entah pe si lang, arus ngusih kai si ilakoken Yesus i bas telu point i datas. Intina, Kesah Si Badia lit bas kita janah Dibata ngutus kita guna ngelakoken misi Dibata khususna i bas dunia politik i bas negaranta. Hal si deban si penting e me ula kita terpancing kabar-kabar, pesan singkat, ras sejenisna si beredar i media sosial. Adi banci langsung sikonfirmasi ku si bersangkuten e si payona, adi lang, ula kita ikut memprovokasi entah pe menyebarken berita si la tuhu i bas media sosial. Terakhir mehuli akap kami adi sicermati Bimbingan Moderamen GBKP Dalam Rangka Menyambut Pilkada. Dibata si mereken pergegeh ras nampati kita i bas tahun politik enda.