PA Kategorial GBKP Tgl. 18 - 24 Feb. 2018

PA MAMRE TGL. 18 - 24 FEB. 2018

Nrs. Pdt. L. br. Sinuhadji (Bp. Rey Tarigan)

POLITIK 2

Ogen : Kejadin 41:37-49

Tema : POLITIKUS YANG BERKUALITAS

Tujun : Gelah Mamre :

1) Ngangkai erpolitik erpalasken si ngena ate Dibata

2) Ngasup erpolitik ras jadi politikus si erkualitas

Metode : Diskusi/Sharing

Wikipedia njelaskenca erti “politikus” nina, “politikus (jamak : politisi) adalah seseorang yang terlibat dalam politik, dan kadang juga termasuk para ahli politik. Politikus juga termasuk figur politik yang ikut serta dalam pemerintahan”. Rikutken erti politikus ndai maka banci ikataken politikus e me sekalak pelaku politik, kalak si erpolitik praktis, entah pe kalak si lit bas ia kekuasaan guna erbahan kebijakan-kebijakan publik. Emaka labo kerina kalak politikus, entah pe terbedaken ras kalak si awam politik. Lit erbage cara guna jadi sekalak politikus, umpamana melalui jalur partai. Sekalak si aktif i bas partai biasana enggo datken erbage training entah pe pelatihan-pelatihan si berkaiten ras dunia politik, janah sekalak kader partai biasana enggo lit tahapan-tahapan pencapaian rikutken kebeluhen si enggo idatkenna arah training entah pe bentuk-bentuk pendidiken si debanna. Jalur si deban umpamana jalur independen. Sekalak si atena jadi politikus i bas jalur independen nari biasana enggo melala pengalamen i bas bidang organisasi masyarakat, erbage-bage kegiaten i bas bidang sosial kemasyarakatan enggo ilakokenna, bage pe enggo erbage-bage kegiaten i bas bidang politik si ilakokenna. Janah si pentingna enggo melala kalak si nandai sepak terjangna i bas kerina bidang ndai. Jalur si deban e me jalur si la terduga bagi si nialami Yusuf.   

Yusuf i bas ogenta datken kehamaten arah Firaun nari guna jadi wakilna. Janah labo terjeng je saja, tuhu-tuhu igunaken Yusuf kuasa si lit bas ia alu mehuli guna kesejahteraan rayat negara Mesir. Adi sioge turi-turin kerna Yusuf enda benaken bindu 37 nari tuhu-tuhu mberat kal kai si ialami Yusuf i bas kegeluhenna. Tapi Tuhan la pernah nadingken kalak si erkemalangen man baNa. Ibahan Dibata sangap kerina si idahiken Yusuf, seh turah pengakun i bas Firaun nari nina, “Labo lit dat kita jelma tersikapen asang Yusup enda, sekalak si lit kesah Dibata i bas dirina jine” (Kej. 41:38). Ertina i bas diri Yusuf mungkin la pernah icita-citakenna jadi sekalak penguasa i Mesir, apai ka paksa si e lit i bas penjara denga ia, tapi Yusuf tutus i bas erkemalangen man Dibata janah tutus i bas tanggung jawab kai pe si ialokenna. Hasilna Firaun alu objektif pang ngangkat Yusuf si labo kalak Mesir jadi wakilna i bas pemerentahenna.

Adi rikutken tema ras tujun i bas wari si sendah, situhuna lit dua politikus si erkualitas rikutken ogenta, Yusuf ras Firaun. Yusuf arah pengalamen geluhna bage pe pengalamenna i bas erkiniteken man Dibata, erbahanca ia jadi sekalak si tangguh ras berintegritas, janah kenca enggo lit kekuasaan i bas ia, tuhu-tuhu ipergunakenna guna kesejahteraan rayatna. Firaun e me sekalak raja entah pe peminpin si nggit erlajar arah si deban nari, maka nungkun ia kerna antusen nipina. Firaun pe sekalak raja si objektif i bas menilai kapasitas Yusuf janah pang ia i bas erbahan keputusen guna njadiken Yusuf jadi wakilna i bas pemerentahenna. Ertina i bas PA sendah iajuk kita gelah ngusih Yusuf ras Firaun i bas kita erpolitik jadi politikus si berkualitas khususna man banta si memang terlibat i bas politik praktis. I bas dampar si deban, kita si awam i bas politik tetap iajuk gelah tutus i bas kerina tanggung jawab si ipercayaken man banta, subuk kita sebage peminpin i bas jabu, gereja ras masyarakat sekelewetta.