PA Kategorial GBKP Tgl. 04 - 10 Maret 2018

PA MAMRE TGL. 04 - 10 MARET 2018

Nrs. Pdt. L. br. Sinuhadji (Bp. Rey Tarigan)

POLITIK 4

Ogen : Matius 5:13-16

Tema : POLITIK

Tujun : Gelah Mamre :

1) Meteh kerna Konfesi GBKP kerna politik

2) Ndalanken prinsip sira ras terang

Metode : Diskusi

Ogenta sendah termasuk salah sada bagin i bas pengajaren-pengajaren Yesus si iajarkenNa man ajar-ajarNa i das uruk nari. Sira ras terang e me gambaren si biasa i bas kegeluhen si tep-tep wari, janah sira ras terang e mbelin kel fungsina i bas kegeluhen si tep-tep wari paksa si e. Gambaren sira ras terang enda pengajuk man ajar-ajarNa gelah nggeluh mereken dampak si positif ras membangun ku sekelewetna. Ay. 16 secara konkrit ikataken Yesus “perbahanen si mehuli”, ertina si nimaksudken berdampak positif ras membangun enda lit wujud nyatana secara konkrit e me kerina si mehuli si terbegi arah pengerananta, si teridah arah perbahanenta, janah si ternanami arah pengkebet geluhta i japa pe kita ringan. Si peduaken, Yesus ngajuk gelah ajar-ajarNa secara proaktif ngelakoken kerina si mehuli gelah dampak positif ras membangun e terjadi terus-menerus, berkesinambungan gelah tuhu-tuhu banci mabai perobahen ku si mehuli man lingkungen sekelewetta.

Tema si seh man banta i bas kesempaten enda e me “Politik”, kerna erti politik akap kami enggo pernah radu ras sibahas, baik i bas PA-nta bage pe i bas PJJ. Secara khusus man banta si terjun i bas dunia politik praktis, akap kami kai si iajarken Yesus enda arus menjadi palas i bas erpolitik praktis. Pemimpin kristiani i bas politik praktis arus ngasup mereken pengaruh si positif ras membangun janah ngasup mabai kerina si impimpinna berobah ku si mehuli. Bage me seharusna secara ideal kerina kalak Kristen si terlibat i bas politik praktis tuhu-tuhu ndalanken kai si iajarekan Yesus ndai. Tapi i bas kinatana, tentu kita banci menilaisa. I bas wilayah si melala je kalak Kristenna seharusna daerahna aman, nyaman, bersih, ekonomi maju berkembang, rayatna labo lit si kekurangen, mehuli kerina pelayanen i bas kantor-kantor pemerintahan, melala program-program entah pe kebijaken-kebijakenna si pro-rakyat, lalu lintas tertib, rsd. Adi lit umpamana sada daerah si je melala kalak Kristenna tapi daerahna kumuh, kotor, melala je kejahaten, judi, narkoba, lalu lintas bas dalan raya la ratur, ekonomi la maju, rsd., tentuna banci sipertanyaken fungsi kalak Kristen je janah kai situhuna fungsi gereja i bas daerah e? Apakah gereja tidak sanggup mengorganisir para pemimpin politik yang menjadi anggotanya untuk berkomitmen melakukan politik Kerajaan Allah?

Rikutken Konfesi GBKP kerna politik ikataken, “kami percaya, dalam pentas politik, gereja hadir sebagai garam dan terang baik dalam proses pencerahan masyarakat, mengkritisi kebijakan dan memberikan pertimbangan dalam pengambilan keputusan-keputusan politik”. Enda situhuna akap kami lebih cenderung ngerana kerna gereja sebage lembaga. Penungkunenna, enggo seh ija GBKP berperan dalam proses pencerahan masyarakat, mengkritisi kebijakan dan memberikan pertimbangan dalam pengambilan keputusan-keputusan politik? Adi melala anggota-anggota GBKP si terjun i bas dunia politik praktis akap kami enggo banci GBKP erbahan sada kelompok kategorial politisi gelah banci ibahan perjumpan-perjumpan secara periodik si fungsina mpegegehi anggota-anggotata si terjun i bas dunia politik praktis ndai gelah pang ia berpolitik secara benar sue ras peraten Dibata.

Rikutken tujun si peduaken selaku Mamre iajuk kita gelah ndalanken prinsip sira ras terang. Kerina perbapan entah pe Mamre pemimpin, paling tidak pemimpin untuk dirinya sendiri. Sekalak pemimpin si mehuli e me sekalak si ngasup mempengaruhi sekelewetna ku si mehuli. Tujun enda sekaligus jadi bahan evaluasi man banta apakah enggo tuhu-tuhu sidalanken tugas tanggung jawabta selaku pemimpin si erprinsip sira ras terang i tengah-tengah jabuta, gereja, ras masyarakat? Dibata si mpegegehi kita.