PJJ GBKP Tgl. 25 Feb. - 03 Mar. 2018

PJJ GBKP TGL. 25 FEB. - 03 MAR. 2018

Pdt. Larena br. Sinuhadji (Nd. Rey Tarigan)

Tema : PEMIMPIN SI ERMETERUK UKUR (Johanes 12:12-16)

Model pelayanen si ermeteruk ukur (menghamba) labo nari sesuatu si mbaru sabab si e pe enggo iterapken i bas dunia pendahin sekuler labo hanya bas gereja. Benaken tahun 1970 model pelayanen menghamba mulai ipetandaken Robert K. Greenleaf alu sada tulisenna si berjudul “The Servant as Leader.” Ipetandakenna kerna istilah servant leader (pemimpin hamba) ras servant leadership (kepemimpinan yang menghamba). Konsep enda kepeken mbue idukung tokoh manajemen bagi Stephen Covey, Kent Keith, rsd.

Konsep servent leadearship kepeken enggo leben igemaken ras idalanken Yesus ribuan tahun si lepas. I bas Mrk. 10:43-44 jelas kel nina Yesus, “Tapi i bas kam la banci bage. Ise atena i bas kam jadi mehaga, ia arus jadi si ngelai nandangi kam. Ise atena jadi si arah lebe, arus maka ia jadi suruh-suruhen temanna kerina”. Janah labo hanya teori sibelaskenNa, tapi pe i bas kegeluhenNa i tengah-tengah doni enda teridah kiniteruken ukurNa. I bas perikopta sekali enda jelas, kiniteruken ukur Yesus teridah.

“Surak-surak si meriah i pintu gerbang Yerusalem” e me sada perikop si empatna Injil ncatatsa. Janah bagi semalna, Injil Yohanes berbeda sitik ras teluna Injil Sinoptik (Matius, Markus, Lukas). Sope perikop enda, enggo lit sada kejadin si luar biasa kel, e me kap Yesus mpekeke Lasarus turang Martha ras Maria si tading i Betani. Jarak Betani ku Yerusalem 3.2 Km. Emaka la heran asum Yesus sangana i dalan nandangi seh ku Yerusalem, kalak si enggo enterem pulung i Yerusalem guna ngerayaken Paskah sikap pengalo-ngalona nandangi Yesus. Itek-tekna lambe je nari ialo-alona Yesus, ersurak-surak ia nina, “Pujilah Dibata! Ipasu-pasu Kam si reh i bas gelar Tuhan, ipasu-pasu gelah raja kalak Israel”. Janah paksa si e, iersak Yesus sada kelede si nguda denga.

Iersakna kelede nguda. Kelede si jadi kenderaan Yesus asum bengket ku Yerusalem. Sada pemandangen si kontras. Sabab umumna sekalak raja inangkihina kuda, labo kelede. Hal enda situhuna penggenapen nubuaten nabi Sakaria (Sak. 9:9-10, “Ersuraklah, ersuraklah, o anak kuta Sion! Ersuraklah meriah, o kalak Jerusalem! Nehenlah, rajandu reh ndahi kam! Ia dem kemulian, dem kemenangen. Tapi meteruk ukurna, IA reh ngersak kelede; kelede si nguda denga e me anak indung kelede. Nina TUHAN man bangsaNa, “Kusasapken me gereta perang i Israel nari bage ka pe kerina kuda i Yerusalem nari; panah si ipake i bas perang, Kukernepken seh keri. Rajandu e mperdameken bangsa-bangsa; i lawit nari seh ku lawit iperentahna kerina, mulai i Lau Eprat nari, se ku tampuk doni enda”). Ertina Yesus reh maba dame, maba perdamen man Yerusalem ras bangsa-bangsa si deban.

Iersakna kelede, enda merupaken simbol kiniteruken ukur. Sekalak Raja si erkuasa i doni ras i surga, Si ngasup erbahan tanda-tanda sengget tapi kenderanNa labo kuda si ncidahken kehebaten tapi kelede si merupaken rubia-rubia si ndauh lambanen asangken kuda. Kerendahan hati si tetap icidahken Yesus i bas pelayanenNa seh ngayak IA ndungi karya keselamaten si ibabaNa.

Adi Yesus pe Raja segala raja enggo ncidahken sosok pemimpin si meteruk ukur, bahkan dunia kerja sekuler pe i bas paksa gundari ngelumbaken pola servent leadership (kepemimpinan yang menghamba), me enggo sepatutna kita sebage ajar-ajar Yesus i bas kegeluhenta tetap ncidahken kiniteruken ukur? Pemimpin si meteruk ukur, si nggit merangkul ras mperdiateken kerina kalangen, si labo hanya teori ietehna tapi pe ikut bas praktek, si labo hanya nggit mengkritik tapi pe nggit ikritik, si tuhu-tuhu ncidahken kesederhanaan (ugaharian) labo itonjolkenna kehebaten, amin sekali kai pe la kurang i bas ia. Pemimpin si tuhu-tuhu nggit berkorban, labo hanya ngukurken dirina tapi lebih man kalak si nipimpinna gelah banci maju, berkembang ras sejahtera. Pemimpin si ermeteruk ukur enda me si perlu terus-menerus ilakoken i bas kegeluhenta selaku ajar-ajar Yesus, subuk i bas keluarganta, i gerejanta, i bas pendahinta, bage pe i tengah-tengah masyarakat.