PA
MAMRE TGL. 25 FEB. - 03 MAR. 2018
Nrs.
Pdt. L. br. Sinuhadji (Bp. Rey Tarigan)
POLITIK
3
Ogen : Perb. Rasul 28:16-24
Tema : PAULUS “POLITIKUS” SI KONSISTEN (ERPALASKEN
PADAN SI MBARU)
Tujun : Gelah Mamre :
1) Tetap konsisten i bas misi politik
2) Tetap mperjuangken keadilen & kebenaren
Metode : Diskusi
Minggu si lepas enggo radu ras kita erlajar kerna
politikus si berkualitas erpalasken usihen si ibereken Yusuf bagepe Firaun. Rikutken
ogenta sendah erlajar ka kita arah Rasul Paulus. Adi sioge i bas bindu 21 nari ituriken
maka Paulus ngenanami erbage-bage tantangen ras kiniseran erkiteken kinitekenna
man Yesus Kristus. I bas Perb. Rasul 21:28-32 ituriken Rasul Paulus ipekpeki kalak
si nterem erkiteken provokasi kalak Yahudi si la senang nandangi Paulus alu
tuduhen si la tuhu. Si mejile banci siidah e me Rasul Paulus iamanken pihak
berwajib paksa si e i bas tindaken persekusi (main hakim sendiri) si ilakoken piga-piga
kalak Yahudi si la senang nandangi Paulus ras memang ersura-sura munuh Paulus.
Kenca iteh maka Rasul Paulus enda warga negara Roma, maka ihamati aparat
pemerentah Roma kerina si jadi hak-hakna sebage warga negara Roma. Keamanen ras
keselamaten jiwa Rasul Paulus tuhu-tuhu ijamin seh idalanina pengadilen
rikutken aturen negara Roma.
I bas bindu 21 seh 26 ituriken maka Rasul Paulus
arus ngadapi piga-piga kali pengadilen, si pemena i lebe-lebe kalak si nterem i
markas panglima tentera Roma (Perb. Rasul 21:37-22:1-22); si peduaken i
lebe-lebe pengadilen agama Yahudi (Perb. Rasul 22:30-23:1-10); si peteluken i
lebe-lebe Gubernur Feliks (Perb. Rasul 24:1-22); ras si peempatken i lebe-lebe
Raja Agripa (Perb. Rasul 26:1-32). Kerina proses pengadilen e tuhu-tuhu
imanfaatken Paulus guna ersaksi kerna Yesus Kristus si enggo mate ras keke i
bas si mate nari guna nebusi kalak si erdosa, janah kerina kalak si tek man
baNa datken keselamaten. Kenca enggo idalanina kerina pengadilen e, situhuna Paulus
enggo banci ibebasken erkiteken la idatken kesalahen si sue ras tuntunten kalak
Yahudi si nuntut gelah Paulus iukum mate. Tapi erkiteken pemindon Paulus gelah
Kaisar Roma si mutusken perkarana maka lawes ia erlayar ku Roma.
Ogenta sendah nuriken kerna Rasul Paulus si enggo
seh i kota Roma. Sanga i kota Roma, amin pe lit i bas pengawasen pemerentah
Roma, la isia-siaken Paulus waktu si lit guna erberita kerna Yesus Kristus. I
bas Perb. Rasul 28:30-31 ikataken, “Dua tahun dekahna Paulus ringan i bas rumah
sewana e. I bas si dua tahun e ialo-alona kerina kalak si reh ndahi ia. Iberitakenna
kerna Kinirajan Dibata janah iajarkenna kerna Tuhan Yesus Kristus. La ia
mbiar-mbiar dingen la lit pe si ngolang-ngolangi ia”.
Adi sikaitken ras tema bage pe tujun PA sendah,
maka politik si idalanken Rasul Paulus banci ikataken enggo sue ras peraten
Dibata e me politik Kinirajan Dibata. Kinirajan Dibata bagi si enggo rusur
ijelasken, e me sada kondisi entah pe situasi kegeluhen si dem alu kebenaren,
keadilen, kedamen, kekelengen, ras kerina si mehuli sue ras peraten Dibata. Si
e kerina tujunna guna kiniulin ras keselamaten manusia. Rikutken tema, maka
kerina si enggo ilakoken Paulus i bas pelayanenna banci ikataken konsisten seh
ku kedungenna, amin kai pe tantangen si nihadapina, Paulus tetap setia
ndalanken kerina si jadi peraten Dibata, khususna i bas ndalanken misi politik
Kinirajan Dibata bage pe i bas mperjuangken keadilen ras kebenaren.
Kerina si enggo ialami ras idalanken Rasul Paulus
tentuna banci jadi usihen man banta, baik kita si aktif i bas politik praktis
bage pe kita si kaum awam. Tapi lit akap kami si menarik i bas pengalamen Rasul
Paulus enda, kerina si ilakoken pemerentahen Roma pe perlu ka jadi usihen,
sebab pemerentah Roma enggo ndalanken aturen alu mehuli. Kenca enggo itehna
status warga negara Paulus, iberekenna kerina si jadi hak Paulus sebage warga
negara Roma, la lit ibahan perbedaan antara warga negara Roma keturunan Yahudi
ras warga negara si deban, kerinana seri i lebe-lebe hukum si berlaku. Enda
tentuna banci jadi usihen man banta, khususna man banta si erpolitik praktis.
Bage pe kita si awam i bas dunia politik nari, kai si ialami Paulus pe banci
jadi usihen i ja Paulus tuhu-tuhu itehna kai si jadi hak ras tanggung jawabna
selaku warga negara Roma si mehuli. Dibata si mpegegehi kita.
PA
MORIA TGL. 25 FEB. - 03 MAR. 2018
Pdt.
Larena br. Sinuhadji (Nd. Rey Tarigan)
Ogen : Jeremia 14:17, 29:7
Tema : MPEKENA DINGEN PEHULIKEN KEGELUHEN SI NTEREM
Tujun : Gelah Moria :
1) Meteh uga cara Jeremia mpekena dingen mpehuliken
kegeluhen kalak si nterem
2) Ngasup mpekena pehuliken kegeluhen si nterem
Metode PA : Diskusi
Lit rusur pernyataan si ngatakenca, “adi la beluh
kita nampati, nampeti lah gia ola. Adi la beluh kita pehuliken, ngerontangi lah
gia ola.” Melala kalak si setuju nandangi pernyataan enda, padahal situhuna adi
sipergemeti kurang pas denga. Sabab situhuna arah pernyataan e erbahanca kita
pasif. Memang enggo nampati kita la kita erbahan si la mehuli. Tapi situhuna
kehadirenta bas geluh enda labo pasif (diam), la erbahan kai pe, tapi geluhta
berarti, bermakna ras menjadi berkat. Termasuk i bas mpekena ras pehuliken
kegeluhen si nterem.
Bahan PA-nta sekali enda, terdiri i bas dua nats entah
pe perikop. Sada i bas Jer. 14:17 nari, si secara garis besar isina kiniseran
si ialami bangsa Juda, erkiteken dosana man Tuhan. Terjadi kelegon si mesangat,
erkiteken lalap la nusur udan. Kerah lau, kerina taneh pe kerah si erbahanca
mesui ate perjuma. Rubia-rubia pe terancam, kelde, rusa betina, pokokna kerina
rubia si membutuhken dukut-dukut si meratah i mbal-mbal. Janah Tuhan sendiri la
ngaloken puasa, persembahen rikut pertotonna. La ialoken Tuhan sebab
perbahanenna si jahat. Janah Jeremia sendiri pe ilarang Tuhan guna ertoto man
bangsa e (ay. 11). Emaka i jenda iperentahken Tuhan man Jeremia nuriken kecedan
atena kerna bangsa e si igambarkenna alu iluh mambur si erdire-dire, i ja suari
ras berngi tangis ngandung sebab luka bangsa e si seh kel bagesna dingen la
nari terpepalem.
I bas nats si peduaken, e me bindu 29:7, bangsa
Israel enggo iambekken ku Babilon erkiteken dosana man Tuhan ras iukum Tuhan
selama kurang lebih 70 tahun. I bas bindu 28 situhuna enggo lit berita palsu
arah nabi Hanania si ngatakenca dua tahun ngenca bangsa e i Babilon (28:3), si erbahnca
santai-santai saja bangsa e i Babilon erkiteken la ndekah. Tapi nina Jeremia
arah perkataan Tuhan, labo dua tahun tapi 70 tahun (ay. 10). Emaka arah suratna
isuruh Jeremia maka bangsa Israel tetap terlibat aktif mengisi wari-wari
kegeluhenna alu erbahan si mehuli. Majekken rumah, erjuma, erjabu dingen
pejabuken anak-anak pe gelah ertambah-tambah beligan kalak enda. Ras erdahin
guna kiniulin kota-kota i ja Tuhan enggo ngambekken bangsa Israel jadi tabanen.
Dingen ertoto guna keperlun kota e, sabab adi sikap kota e rikut ras
pemimpinna, bangsa Israel pe ikut sikap. Situhuna, labo nge jaminen, sikap
bangsa Babilon ras pemimpinna arah campur tan kalak Israel erbahanca sikapka
kegeluhenna. Banci jadi tetap ia mengalami kiniseran ras diskriminasi sebage
kalak tabanen, tapi si penting kalak enda enggo mereken hal si positif, mpekena
ras pehuliken.
Johanes Calvin mereken slogan si cukup terkenal,
e me “Ora et labora”, bekerja dan berdoa. Enda me si itugasken Jeremia man
bangsa Israel asum itaban i Babilon. Janah tugas enda ka si arus terus-menerus
sidalanken kita selaku warga masyarakat i bas negaranta.
Penekanen Program tahun 2018 e me “Menumbuhkan
dan meningkatkan kesadaran warga GBKP dalam bidang politik, hubungan dengan masyarakat
dan pemerintah”. Ertina, si sama sekali lenga lit tanggung jawabta man bangsa
enda, mulai lit ras si enggo lit sedekah enda, ate min itingkatken. Khususna
lebe i bas tahun enda tahun politik, i ja lit pemilihen kepala daerah secara
serentak i bas 171 daerah. Melalui erbage-bage bahan pembinaan subuk PJJ ras PA
Kategorial iarapken pengangkanta kerna politik reh payona. Sabab sedekah enda
alergi kita ercakap kerna politik erkiteken politik iakap kotor ras la mehuli.
Padahal situhuna Politik e me kebijaken-kebijaken si banci mereken kiniulin ras
kesejahteraan man masyarakat si enterem.
Melala hal si banci ilakoken Moria, sada lebe ula
kita golput, tentuken pilihenta alu mehuli. Emaka perlu sipelajari rekam jejak
kerina calon kepala daerah i daerahta masing-masing. Ula kita terlibat money politic i bas pemilihen enda. Ikut
terlibat i bas kegiaten-kegiaten bas inganta tading, subuk rapat guna ngarihken
kegiaten si banci ilakoken i bas lingkungenta, gotong royong. Bahkan adi lit
talentanta banci ka kita jadi pengurus posyandu, ibu PKK si banci mengembangkan
ekonominta ka entah kalak si deban arah keterlibatenta. Adi sikap inganta
tading, la banci lang ikut ka kita ngenanamisa.
Tidak ada komentar:
Posting Komentar