PA Kategorial GBKP Tgl. 11 - 17 Feb. 2018

PA MAMRE TGL. 11 - 17 FEB. 2018

Nrs. Pdt. L. br. Sinuhadji (Bp. Rey Tarigan)

Ogen : Juna 1:1-3; 3:1-4

Tema : ERPOLITIK ALU MEHULI (POSITIF)

Tujun : Gelah Mamre :

1) Nandai tujun politik alu konsep Dibata

2) Ngasup ngaloken ulih si la bagi ukurta pe tapi tetap maba kedamen

Metode : Ceramah & Diskusi

Turi-turin kerna nabi Juna akap kami enggo semal sibegiken. I bas pengogen si pemena Yun. 1:1-3 ituriken kerna nabi Juna si la matuhi perentah Tuhan guna erberita kerna kesalahen si enggo ilakoken kalak kota Niniwe bagepe berita kerna ukumen i bas Dibata nari. Erkiteken la matuhi perentah Tuhan, iukum Tuhan Juna alu itelen nurung si galang. Kenca enggo sedar i bas kesalahenna, ilakoken Juna kai si jadi perentah Tuhan. Ogen si peduaken, Yun. 3:1-4, nuriken kerna nabi Juna si ngikutken kata Tuhan. Adi siterusken turi-turin enda, ertobat penduduk kota Niniwe janah salih ukur Dibata la surung iukumNa kalak Niniwe ndai. Nembeh ate Juna erkiteken keputusen Dibata si mekuah nandangi kalak Niniwe.

Engkai maka la iikutken Juna si iperentahken Dibata janah nembeh atena erkiteken mekuah ate Dibata nandangi penduduk kota Niniwe? Latar belakangna erkiteken dendam bangsa Israel nandangi bangsa Asyur. Niniwe e me bangsa Asyur. Bangsa Asyur paksa si e terkenal sebage bangsa si kejam. I bas Alkitab Edisi Studi hlm. 604 ikataken nina, “Semua bangsa di dunia kuno takut akan kekejaman bangsa Asyur. Mereka dikenal sering menusuk tulang rahang para tawanan untuk merantai mereka bersama ketika mereka dibawa pergi ke wilayah lain. Bangsa Asyur juga seringkali menambah penduduk di wilayah yang direbutnya dengan membawa tawanan dari negeri lain”. I bas si e tentuna wajar adi lit rasa erpenulak i bas nabi Juna nari erkiteken i bas pengakapna bangsa Asyur enda ulin iukum ras kernep asangken datken perkuah ate Dibata. Tapi la banci iatur Juna kai si jadi peraten Dibata. Keleng ate Dibata labo terjeng man bangsa Israel saja, kerina bangsa si ertobat ras nembah man baNa pe ikelengiNa.

Tema si seh man banta i bas PA Mamre sendah e me “Erpolitik Alu Mehuli” (Positif), alu tujun gelah Mamre : 1) Nandai tujun politik alu konsep Dibata. 2) Ngasup ngaloken ulih si la bagi ukurta pe tapi tetap maba kedamen. Kerna temata sendah tentuna e nge si jadi perayakenta, erpolitik alu mehuli entah pe positif, sebab kita iutus guna nehken si mehuli sue ras peraten Dibata i bas kerina dampar geluhta. Palas, pedoman entah pe usihenta i bas erpolitik jelas erpalasken peraten Dibata, ngusih kai si ilakoken Tuhan Yesus, e me menghadirkan Kerajaan Allah di tengah-tengah dunia ini. Kinirajan Dibata e me sada kondisi i ja keadilen, kebenaren, kekelengen, kedamen, keselamaten, ras keberpihaken nandangi kalak si lemah, tuhu-tuhu iperjuangken, tuhu-tuhu itegakken, ras tuhu-tuhu iwujudken i tengah-tengah doni enda. Adi rikutken pengogenta sendah, jelas sikap entah pe konsep Dibata i bas erpolitik e me menegakkan kebenaran ras keadilan nandangi penduduk kota Niniwe si kegeluhenna enggo dem alu kesalahen. Adi la jera enggo pasti iukum Dibata, tapi adi jera datken perkuah ate Dibata. Janah si la kalah pentingna keleng ate Dibata la lit batasna.

Rikutken tujun si peduaken, iajuk kita gelah dewasa i bas erpolitik. Lit erbage-bage definisi politik : 1) Politik adalah seni dan ilmu untuk meraih kekuasaan secara konstitusional maupun nonkonstitusional. 2) Politik adalah usaha yang ditempuh warga negara untuk mewujudkan kebaikan bersama (teori klasik Aristoteles). 3) Politik adalah hal yang berkaitan dengan penyelenggaraan pemerintahan dan negara. 4) Politik merupakan kegiatan yang diarahkan untuk mendapatkan dan mempertahankan kekuasaan di masyarakat. 5) Politik adalah segala sesuatu tentang proses perumusan dan pelaksanaan kebijakan publik. Rikutken piga-piga definisi politik enda akap kami kerina kita erpolitik, penungkunenna enggo seh i ja kedewasaanta i bas erpolitik? Pengalamen nabi Juna nuduhkenca kiniladewasaanna i bas erpolitik. La ia nggit ngikutken perentah Dibata janah nembeh ia erkiteken la bagi ukurna. Enda tentuna jadi pembelajaren man banta Mamre gelah reh dewasana kita i bas kerina dampar geluhta khususna i bas kita muat bagin i bas politik negaranta. Dibata si mpegegehi kita kerina.

PA MORIA TGL. 11-17 FEB. 2018

Pdt. Larena br. Sinuhadji (Nd. Rey Tarigan)

PA HDS I

Ogen : Kejadin 2:15-17; 3:14-19

Tema : SI MEHULI CEDA ERKITEKEN KINIGANJANGEN UKUR

Tujun  : Gelah Moria :

1) Meteh maka ibereken Dibata man manusia kuasa guna njagai dingen ngusahai tinepa Dibata si mehuli, tapi icedai manusia.

2) Mpekena-kena kerina tinepa Dibata si enggo mehuli guna mperlengkapi kegeluhen i sekelewetna.

Metode PA : Diskusi/Aksi

I bas KEE 260 si berjudul “Oh Andiko Jilene” karya S. Tarigan, isuratken i bas bait pemena, “Oh andiko jilena tinepa Dibata subuk pertibi enda ras isina k’rina. Deleng si meratah kerangen, perik-perik rende kabangen, andiko jiena si banNa seh kal kap ulina, (bagin refrein) emaka tangarlah min kita jela, ola melangsa o meturdaksa, lit tenah kata pedah ni Dibata, jaga kelengi k’rina tinepaNa.” I bas bait si peduaken, “Ah andiko cedana, si tepaNa ndube. Penggaya Iblis erbanca jelma rate-ate. Uruk si megersing meturban, rudang ‘nggo merapak i mbal-mbal, andiko mekelek cedana, bekas tinepaNa.

Jelas lagu enda mereken persinget man banta gelah banci ndalanken pedah Dibata guna njaga ras ngkelengi tinepa Dibata. Erkiteken kerangapen manusia, maka la banci manusia nguasai dirina piah dungna si mehuli ndai jadi ceda.

I bas Kejadin 1, Dibata nepa manusia ras kerina isina jelas isuratken maka kerina si ijadiken Dibata mehuli jadina (ay. 3,10,12,18,21,25,31). Bahkan asum Dibata nepa manusia si sentudu ras tempas Dibata, si menam seri ras Dibata, lit i je mandat ibereken Dibata gelah manusia banci ngkuasai nurung-nurung, perik, bage pe asuh-asuhen ras rubia-rubia si meliar, subuk si galang ras si kitik. Janah i bas Kej. 2:15 i je pe Dibata mereken mandat man manusia kenca itamaken Dibata manusia i Peken Eden guna ngusahai ras njagaisa. Ras lit sada larangen si la banci ipan manusia e me kap buah batang kayu si mereken pemeteh kerna si bujur ras si jahat. Tapi erkiteken la ngasup menguasai dirina, tergoda manusia i bas bujuk rayu nipe si erbahanca manusia melanggar perentah Dibata. Manusia ndabuh ku bas dosa. Dingen dosa erbahanca turah kiniganjangen ukur, kerangapen, keegoisen ras melala nari biak-biak si la mehuli si erbahanca gagal manusia jadi mandataris Dibata.

Doni si arusna itata kelola alu mehuli, ijagai ras ikuasai alu dem tanggung jawab guna kelestarian tinepa Dibata si deban termasuk menjaga ekosistem enggo tuhu-tuhu ceda. Erbage-bage kecedan e, umpamana : ilegal logging, perambahan hutan, pembakaran hutan secara sengaja erbahanca kerangen  enggo gundul akibatna terjadi perubahan iklim, bahkan bagi si mbaru terjadi i Bogor, longsor, pergeseran tanah, lahan reh kitikna, pencemaren lau, terumbu karang hancur, ratusen sinuan-sinuan ras rubia-rubia langka i Indonesia nandangi bene. Pencemaren udara ras si debanna.

Mulihi bahan HDS I mpersingeti kita Moria, maka selaku tempas Dibata, si enggo ikelini ras iselamatken Dibata tanggung jawabta guna mpekena-kena kerina tinepa Dibata, termasuk lingkungen sekelewetta alu erbage-bage kegiaten si mehuli. Mbersihken lingkungenta, saluren air bebas dari sampah, nuan batang kayu ras bunga-bunga si mejile, tetap menjaga kebersihen alu membuang sampah pada tempatnya (ipersingeti terus-menerus), ras banci ka silakoken gerakan secara massal umpamana dalam rangka Paskah, e me kap gerakan menanam 1.000 pohon, rsd.