PA Kategorial GBKP Tgl. 11 - 17 Maret 2018

PA MAMRE TGL. 11 - 17 MAR. 2018

Nrs. Pdt. L. br. Sinuhadji (Bp. Rey Tarigan)

MAMRE CENTER

Ogen : Kejadin 18:1-8

Tema : MAMRE CENTER

Tujun : Gelah Mamre :

1) Meteh konsep Mamre Center

2) Muat bagin i bas majekken Mamre Center

Metode : Diskusi

Ogenta sendah nuriken kerna Abraham si ngalo-ngalo ras ngelai telu kalak temuena. Telu kalak temue Abraham enda e me Dibata ras dua malekatNa. I bas ay. 1 pe enggo ikataken “TUHAN encidahken baNa man Abraham”. Kenca enggo iidahna telu kalak ndai minter ialo-alo Abraham janahna erjimpuh ayona seh ku taneh. Itenahkenna temuena ndai singgah i rumahna. Isikapkenna lau guna murihi nahe. Idilona Sara ndeharana guna nikapken roti. Isuruh Abraham suruh-suruhenna guna ntasakken sada lembu nguda si mburna kal ras si ntabehna. Kenca bage isikapken Abraham susu si mejilena raduken ras kerina pangan-pangan ndai i lebe-lebe temuena, janah Abraham jine ngelai kalak enda man. Rikutken Alkitab Edisi Studi hlm. 55, kai si ilakoken Abraham nandangi temuena e me hal si semal ilakoken sebage budaya keramahtamahan kalak Timur Dekat kuno.

I bas hlm. 64 Alkitab Edisi Studi ikataken nina, “Di Timur Dekat kuno, adat keramahtamahan mewajibkan tuan rumah mengurus dan melindungi orang asing yang diundangnnya untuk tinggal di rumahnya. Orang asing yang tidak dibawa ke rumah seseorang tidak mempunyai status atau perlindungan dalam komunitas. Begitu seorang tuan rumah menyanggupi membawa masuk orang asing, ia harus menjamu tamunya seperti anggota keluarga sendiri, menyajikan makanan terbaik, dan memberi tempat terhormat. Tuan rumah yang tidak memenuhi kewajiban ini akan mempermalukan diri sendiri, keluarga dan komunitas”. Ertina kai si ilakoken Abraham labo erkiteken temuena ndai Dibata ras dua malekat, tapi memang tuhu-tuhu adat keramahtamahan. Bicara labo Dibata si reh pe tetap nge ialo-alona ras ielaina temuena alu mehuli.

PA Mamre i bas paksa sendah ibahan i bas rangka Mamre Center, alu tujun gelah Mamre meteh konsep Mamre Center ras muat bagin i bas majekken Mamre Center. Mamre Centre e me sada ingan si irencanaken ibangun i daerah Tongging si tujunna guna semakin meningkatken kualitas kiniteken Mamre i GBKP. Kerna konsep Mamre Center enda banci sioge i bas buku PA Mamrenta hlm. 3-8. Salah sada bagin si ikutip kami i jenda nina, “Spirit dasar dari pembangunan Mamre Center sangat terkait dengan masalah kehidupan yang hendak dijawab dan digarami oleh gereja, yakni sebagai tempat pembangunan spiritual, karakter dan mental dalam menghadapi tantangan kehidupan”. Ertina kerina si mehuli si tujunna guna semakin meningkatken kualitas kiniteken arus tetap sidukung.

Rikutken ogenta sendah, Abraham ncidahken adat keramahtamahan si tulus ras si mehulina man temuena, kita pe iajuk gelah nehken pelayanen alu kualitas si terbaik i japa pe kita ringan. Selaku pengurus, baik i tingkat pusat seh ku runggun, ogenta sendah tentuna banci menjadi bahan evaluasi guna semakin meningkatken kualitas pelayanenta. Mamre Center pe akap kami ibangun alu prinsip nehken pelayanen si terbaik man kerina kalak si singgah, alu arapen kerina kalak si singgah e banci mulih dem alu sukacita ras damai sejahtera. Emaka mari radu ras sidukung kerina rencana si enggo iputusken, alu dukungen dana ras pertotonta, gelah proses pembangunen Mamre Center enda banci erdalan alu mehuli. Dibata termulia arah pembangunen Mamre Center enda.

PA MORIA TGL. 11 - 17 MAR. 2018

Pdt. Larena br. Sinuhadji (Nd. Rey Tarigan)

Ogen : Markus 14:10-11; Lukas 22:1-6

Tema : PERTAKIN SI MBELIN (KONSPIRASI)

Tujun : Gelah Moria :

1) Erlajar arah perbahanen Judas si ertakin ras imam si mbelin

2) Metenget nandangi perdalinen politik si ngelibatken dirina

Metode PA : Diskusi (Kerna PA)

Judas e me salah sada i bas dua belas ajar-ajar Yesus, janah ia termasuk si njemak perduiten ajar-ajar, ras megati ipakena duit e (Joh. 12:6).

I bas perikop si pemena, kenca Yesus iminaki alu minak Narwastu si meherga, maka Judas nadingken lokasi e ras lawes njumpai imam-iman kepala alu maksud ngendesken Yesus man kalak enda. Meriah kel ukur imam-imam si mbelin. Mulai je nari Judas ndarami kesempaten guna ngendesken Yesus man imam-imam kepala.

Sedangken perikop si peduaken pe bali, i ja Judas bekerja sama ras imam-imam si mbelin ras guru-guru agama Yahudi guna ngendesken Yesus sabab sura-sura kalak enda munuh Yesus. Tapi erkiteken paksa si e enggo ndeher perayaan Paskah mbiar kalak enda rencana guna munuh Yesus ieteh jelma si nterem. Erkiteken enggo sepakat imam-imam ras Judas, janah Judas pe ngaloken sen bas imam-imam nari maka ndaramina kesempaten si cocok guna guna ngendesken Yesus alu la ieteh jelma si nterem.

Arah duana perikop enda, jelas maka Judas enggo ngelakoken pertakin (konspirasi) ras imam-imam si mbelin si tujunna gunda dirina, mpebayak dirina. Labo akapna dalih, aminna sedekah enda Yesus rabina (guruna), si penting ia ngaloken sen. Pemikiren si bagenda me gundari melala merasuki manusia, maka pas istilah “tidak ada kawan atau musuh yang sejati, yang ada hanyalah kepentingan”. Adi guna nehi sura-suranta lah, la siakap masalah ngelakoken erbage-bage hal si la mehuli.

Secara  khusus menjelang masa pilkada i bas paksa enda. Calon kepala daerah ras timsesna bage pe KPUD lit deba enggo terbukti ngelakoken pelanggaran, erkiteken alokenna sen guna banci maju jadi calon kepala daerah. Ngelakoken kampanya-kampanye hitam guna menjatuhken calon lawan si ujung-ujungna ngaloken sen. Group Saracen si enggo tertangkap pe tujunna arah kampanye hitam ras berita-berita hoax si isebarkenna e me sen. Termasuk pemilih pe, adi la kita cerdas banci ka kita berkonspirasi ras timses salah sada calon, iberekenna lebe sen man banta gelah nggit kita milih calon si bersangkuten ndai.

Benai awal tahun seh i bas paksa enda, arah bahan Pekan Penatalayanen, PJJ ras PA Kategorial enggo melala kita ercakap kerna politik ras politikus, maka situhuna politik labo kotor, sabab tujunna guna kesejahteraan man rakyat. Tapi lit deba politikus si kotor erkiteken sura-surana ngenca idalankenna kenca enggo ia duduk sebage pemimpin. Tapi sebage Moria si enggo ngaloken Kata Dibata, si enggo icerahi alu kebenaren Firman Tuhan, ula nggit kita terbawa arus jaman. Moria arus tetap jadi sira ras terang termasuk pe i bas pemilihen kepala daerahta.