PJJ GBKP Tgl. 21 - 27 Agustus 2016

PJJ GBKP TGL. 21 - 27 AGUSTUS 2016

Pdt. Larena br. Sinuhadji

Tema : RUKUR RAS ERDAHIN GUNA KINIULIN BANGSA (Nehemia 2:1-18)

Penjelasen Bahan Ogen & Perenungen

Nehemia (ertina: dihiburkan Yahweh) e me sekalak tokoh si penting i bas jaman kenca pembuangen kalak Israel i Babilon, i je mulihken kerina kalak Israel secara bergelombang i Babilon nari ku taneh Israel. Nehemia si minpin kalak Israel majekken tembok kota Jerusalem mulihi seh dung (ps. 12:27 rst.), janah sebage sekalak Gubernur i Juda (ps. 5:14) ipengasup Tuhan ia guna erbahan pembaharuan i tengah-tengah bangsa Israel (ps. 13:4 rst.). Kerina si ilakoken Nehemia e erkiteken ia sekalak si rembak ras Dibata janah tuhu-tuhu ia erdiate nandangi bangsana si sangana lit i bas kiniseran si mbelin. Adi sioge kitab Nehemia enda bindu 1, kenca enggo ibegina kiniseran si mbelin si terjadi i Jerusalem, minter ia tangis, erceda ate, erpuasa piga-piga wari ras ertoto man Dibata (ps. 1:4).

I bas ogenta sendah teridah maka Nehemia enda labo sekalak si kem saja i bas zona nyamanna, sebab jabatenna banci ikataken enggo meganjang i bas kerajan Persia si ngkuasai Babilon paksa si e, ia sekalak juru inemen raja Artaserses. Kenca enggo ia ertoto mindo penampat man Dibata (ps. 1:5-11), mindo ia man raja gelah ipelepasna ia lawes ku Juda guna majekken mulihi tembok-tembok Jerusalem si enggo sontar. Kenca enggo idatna ijin i bas raja nari, minter lawes ia ku Jerusalem, ipepayona alu teliti tembok-tembok Jerusalem si enggo sontar e, janah ipekeke semangat kalak Israel mulihken guna radu ras majekken tembok-tembok si enggo sontar e. Nggit Nehemia ngkorbanken zona nyamanna guna membangun bangsana, janah kepedulian Nehemia nandangi bangsana labo terjeng cakap ngenca tapi banci ibuktikenna alu tindaken si nyata. Kerembakenna ras Dibata mpengasup Nehemia guna erdiate, rukur ras erdahin guna bangsana.

Tema PJJ-nta sendah e me “Rukur ras erdahin guna kiniulin bangsa”, ertina, sebage kalak si enggo imerdekaken i bas Yesus Kristus, iajuk kita guna erdiate nandangi bangsa ras negaranta alu menjadi warga negara si bertanggung jawab. Tanggung jawabta labo saja rukur ras ngerana saja, tapi kai si iukurken bage pe kai si irananken e tuhu-tuhu idahiken bagi bahan ogenta sendah. Tentuna melala hal si mehuli si banci ilakoken kita i tengah-tengah lingkungenta sebage wujud nyata tanggung jawabta sebage warga negara. Contoh-contohna banci siorati i bas PJJ-nta sendah janah banci ka menjadi bahan evaluasi man banta, apakah sedekah enda kita kurang peduli nandangi bangsa ras negaranta, apakah sedekah enda ngeranai saja dahinta entah pe mengkritik saja tanpa memberikan solusi i bas persoalen-persoalen si lit i bas bangsa ras negaranta? Bahanlah tekadta ras rencana tindaken-tindaken konkrit si banci ilakoken kita i bas rangka mengisi kemerdekaan bangsa ras negaranta. Si pentingna kel, bagi bahan ogenta sendah, kerembakenta ras Dibata mpengasup kita guna erdiate, rukur ras erdahin guna bangsa ras negaranta.