PA Kategorial GBKP Tgl. 21 - 27 Agustus 2016

PA MAMRE GBKP TGL. 21 - 27 AGUSTUS 2016

Pdt. Larena br. Sinuhadji

HUT Mamre

Ogen : 2 Korinti 3:3

Tema : KAM ME SURAT NI KRISTUS

Tujun : Mamre ngasup :

1) Nuriken erti surat ni Kristus

2) Nuriken kai-kai saja si banci teridah i bas Mamre selaku surat ni Kristus

Penjelasen Bahan Ogen

Surat 2 Korinti itulisken rasul Paulus i bas konteks membendung pengaruh guru-guru palsu si labo saja mabai perpulungen ku dalan si papak, tapi pe alu maksud-maksud guna mujiken dirina sendiri njajaken Kata Dibata ku tengah-tengah perpulungen guna keuntungenna jine. E maka i bas ps. 1:12 ras 2:17 i je rasul Paulus negaskenca bahwasana pelayanen si ilakokenna e me tuhu-tuhu erpalasken kinibujuren ras ukur si bersih i adep-adepen Dibata labo guna datken puji-pujin entah pe guna keuntungenna jine.

Bahan ogenta sendah merupaken persinget man perpulungen Korinti bahwasana perpulungen e seri bagi “surat Kristus si isuratkenNa arah pendahin kami. Surat e la itulis alu tinta, tapi alu Kesah Dibata si nggeluh; la itulis i bas papan batu, tapi i bas pusuh manusia”. Ertina, sebage kalak si enggo iselamatken i bas kiniteken man Yesus Kristus, kegeluhenna enggo idemi alu Kesah si Badia, janah pusuh perukurenna enggo bali ras pusuh perukuren Kristus. Secara praktis searusna pengkebet geluh kalak si tek tuhu-tuhu ncidahken kemulian Kristus sebage tanda kalak si enggo iselamatken. Alu istilah si deban rasul Paulus ngatakenca i bas ay. 18 nina, “kita kerina natap dingen pembincarken sinalsal kemulian Tuhan”. Kehadiren perpulungen e searusna mabai pengaruh si mehuli sue ras peraten Dibata. E maka situhuna adi enggo paguh identitas Kristen perpulungen e enggo lanai banci ipengaruhi ajaren-ajaren si la sue ras peraten Dibata i bas Yesus Kristus.

Istilah “surat Kristus” itulisken rasul Paulus alu maksud gelah kegeluhen perpulungen e banci ioge kalak si nterem si lenga itandaina Yesus Kristus, gelah ise pe si ngidah kegeluhen kalak Kristen tek man Dibata i bas Yesus Kristus. Istilah “pembincarken sinalsal kemulian Tuhan” semakin negasken identitas kalak Kristen si tuhu-tuhu enggo itandaina Yesus Kristus. Si e kerina arus iwujudnyataken erpalasken kinibujuren ras ukur si bersih i adep-adepen Dibata ras manusia.

Pengkenaina

Tema i bas PA Mamrenta sendah e me “Kam me surat ni Kristus” alu tujun, mamre ngasup nuriken erti surat ni Kristus ras ngasup nuriken kai-kai saja si banci teridah i bas Mamre selaku surat ni Kristus. Arah tema ras tujun PA-nta sendah, iajuk Mamre gelah tuhu-tuhu menyadari identitasta sebage kalak si tek man Yesus Kristus. Adi enggo tuhu-tuhu isedari ise kita i adep-adepen Dibata maka geluhta pe terkondisi guna ncidahken kemulian Dibata arah kerina pengkebet geluhta.

Bahan PA-nta sendah mungkin ilatarbelakangi alu kinata kegeluhen bahwasana melala denga Mamre si perukurenna, pengeranana, pengelakona lenga sue ras identitasna sebage kalak Kristen, entah pe kalak si enggo iselamatken Dibata i bas Yesus Kristus. E maka, PA-nta sendah banci jadi bahan evaluasi man banta kerina, uga kegeluhenta sedekah enda, apakah enggo tuhu-tuhu bagi surat ni Kristus entah lenga? Adi enggo, kai-kai saja si perlu itingkatken? Adi lenga, kai tekadta sebage Mamre si enggo iselamatken i bas Yesus Kristus? I bas HUT Mamre enda, mari radu ras ertekad kita gelah sue ras usia Mamre si-21-ken reh dewasana kita i bas erkiniteken man Dibata i bas Yesus Kristus.

PA MORIA GBKP TGL. 21 - 27 AGUSTUS 2016

Pdt. Larena br. Sinuhadji

HUT Mamre GBKP Pe-21-Ken

Si Man Ogen : Kolose 3:12-17

Tema : MAKEKEN PAKEN ANAK DIBATA

Tujun : Gelah Moria :

1) Erlajar kerna paken anak Dibata

2) Menaken percakapen kerna paken anak Dibata guna pekenaken kegeluhen

Metode PA : Aksi

Penjelasen Bahan Ogen

Perikop si jadi bahan PA-nta sendah sangat jelas, sabab hal-hal praktis ras konkrit si arus ilakoken selaku kalak si enggo jadi sikerajangen Kristus. Paulus nulisken suratna man perpulungen Kolose labo erkiteken ia si manteki perpulungen enda, tapi rutang pusuhna erkiteken litna pengajaren-pengajaren sesat si iajarken guru-guru perguak. Maka Tuhan Yesus ngenca Juruselamat dingen ngasup mereken keselamaten. Janah selaku kalak si enggo iselamatken Kristus arus kita ertanggung jawab nggeluhken geluhta bagi si ngena ate Tuhan. E maka i jenda melala Paulus ngerana labo hanya soal pengajaren (doktrin) tapi pe kerna etika Kristen, uga kearusen nggeluh sebage kalak si enggo jadi sikerajangen Kristus.

I bas Ps. 3 jelas Paulus tegas ngatakenca man perpulungen Kolose maka arus bulat ukurna ndarami erta-erta i Surga, labo nandangi perkara-perkara doni si banci meneken kita. Banci jadi i bas kegeluhen perpulungen Kolose melala denga si lenga tutus erkiteken man Tuhan. Song ku Tuhan, song ku si deban. Adi kalak si enggo ersada ras Krisuts ia enggo hidup baru (kegeluhen si mbaru) si arus pakena, labo kegeluhen si male. Malah kegeluhen si male arus ibunuh (ay. 5), iambeken (ay.8) ras itangtangi (ay 9.).

Selanjutna rasul Paulus erbahan anding-andingen (metafor) “paken si mbaru” si arus ipakeken sekalak si enggo ersada ras Kristus, entah pe kegeluhen si mbaru i bas Kristus e me : ate perkuah, mehuli, rukur meteruk, lemah-lembut dingen saber (ay. 12), ola pergelut dingen si alem-alemen salah (ay. 13), sikeleng-kelengen (ay. 14, i bas bhs. Ind., nina  “kasih, sebagai pengikat yang mempersatukan dan menyempurnakan”), nggit iajari dame si ibereken Kristus i bas erbahan keputusen-keputusen (ay. 15, i bas bhs. Ind., nina, “damai sejahtera Kristus memerintah dalam hatimu”), Kata Dibata nggeluh i bas pusuh peraten, ngendeken puji-pujin man Dibata, lalap ngataken bujur (ay. 16), ras kai gia si ibahan, subuk i bas ngerana entah i bas perbahanen, bahanlah e i bas gelar Yesus Kristus (ay. 17). Em kerina wujud konkrit paken si mbaru si arus ipakeken sekalak si enggo ersada ras Kristus.

Pengkenaina

Adi ngerana kita kerna paken entah pe eruis, biasana pernanden melala jenis ras aksesorisna asangken perbapan. Lit paken si khusus lit ka uis si special si itukur kita terkadang alu erga si fantastis rikutken kerina aksesorisna si matching ras paken e. Si e kerina tujunna gelah kita pernanden e banci tampil mejile, meriah ate kalak si ngenehenca. Adi paken si khusus ras special ndai biasana lit perawaten khusus si la banci iperseri ras paken entah pe uis sehari-hari si biasa ipake kita pernanden. Janah adi enggo sikpake paken si khusus ras special ndai rikutken kerina aksesorisna biasana reh tambahna rasa percaya dirinta.

Mungkin bagem si nimaksudken rasul Paulus kerna anding-andingen paken si mbaru i bas Kristus. Paken e labo seri ras paken si male ras membutuhken perhatian bage pe perlakuan si khusus. Adi enggo sipake paken si mbaru i bas Kristus e, malem ras meriah ate kalak si ngenehenca bage pe reh tambahna rasa percaya dirinta i bas ndalani kegeluhenta. Paken si khusus e labo bagi uis entah pe bagi paken si tampak luar saja (mejile arah darat tapi macik arah bas) tapi tuhu-tuhu menjadi inner beauty i bas kita, kecantikan yang bukan saja tampak dari luar tetapi terpancar dari dalam. Mejile pe uis si ipakeken kita adi pusuh perukurenta macik tentuna sia-sia belaka. Si mejilena cantik luar dan dalam.

Tema ras tujun PA-nta sendah ngajuk kita Moria gelah semakin menyadari identitasta sebage pernanden si enggo ersada ras Kristus, janah identitasta e jelas teridah ras banci inanami sekelewetta (perbulangen, anak-anak, orang tua, perpulungen, teman-temanta meriah, rsd.) gelah arah identitasta si jelas e melala kalak si tek man Yesus Kristus. Secara konkrit paken si mbaru i bas Kristus e bagi si enggo ibahas i datas e me : ate perkuah, mehuli, rukur meteruk, lemah-lembut dingen saber, ola pergelut dingen si alem-alemen salah, sikeleng-kelengen, nggit iajari dame si ibereken Kristus i bas erbahan keputusen-keputusen, Kata Dibata nggeluh i bas pusuh peraten, ngendeken puji-pujin man Dibata, lalap ngataken bujur, ras kai gia si ibahan kita, subuk i bas pengerana entah pe i bas perbahanen, bahanlah e i bas gelar Yesus Kristus.

I bas rangka menyambut HUT Mamre si pe-21-ken, mari radu ras kita jadi penampat entah pe pendamping si tuhu-tuhu banci iandalken arah pengkebet geluhta. Dukungenta man Mamre banci semakin mpeteguhi kiniteken sada jabu gelah jabu-jabu kalak Kristen tuhu-tuhu jadi jabu-jabu si banci jadi teladan man sekelewetta. Selamat HUT ninta man Mamre GBKP, reh dewasana Mamre GBKP i bas erkiniteken man Dibata.