PJJ GBKP Tgl. 28 Agustus - 3 September 2016

PJJ GBKP TGL. 28 AGUSTUS - 3 SEPTEMBER 2016

Pdt. Larena br. Sinuhadji (Nd. Rey Tarigan)

Tema : KINIULIN TINEPA DIBATA (Masmur 104:1-35)

Penjelasen Bahan Ogen & Perenungen

Salah sada kelebihen kitab Masmur e me lit je piga-piga bagin si khusus ngerana kerna puji-pujin man Dibata si enggo njadiken alam semesta ras mpehagaken kiniulin alam semesta tinepa Dibata, bagi Masmur bindu 8, 19, 65, 104, ras 148. Kelebihen si deban si lit i bas kitab Masmur enda, bahasa si ipergunaken dem alu bahasa puitis guna mengekspresiken perasaan kagum entah pe takjub i bas hal-hal tertentu si la banci ibahasaken entah pe iekspresiken secara logis.

Ogenta sendah Masmur 104 ibere judul “Pujin man Si Mada Tinepa” merupaken ekspresi kekagumen entah pe ketakjuben Pemasmur nandangi Dibata si enggo nepa doni enda ras kerina isina, bage pe kiniulin kerina tinepaNa si arus iergai. Masmur 104 enda banci iringkasken i bas 4 bagin e me : 1) ay. 1-9, e me gambaren keagungen ras kuasa Dibata si mbelin si ngasup njadiken langit, daraten ras lawit. 2) ay. 10-18 gambaren pengkawali (pemeliharaan) Dibata nandangi kerina mahluk si lit i bas doni enda seh makana kerina mahluk e banci ndatken kebutuhen geluhna. 3) ay. 19-30 gambaren Dibata si enggo nentuken waktu (paksa-paksa) i bas doni enda bage pe Dibata si tuhu-tuhu erdolat jadi penentu kegeluhen kerina mahluk (Dibata si mereken Kesah kegeluhen) seh makana kerinana tuhu-tuhu bergantung man Dibata ngenca. 4) ay. 31-35 merupaken pengakun Pemasmur kerna Dibata si mahakuasa si mada kerina tinepa sekaligus resolusi entah pe tekad Pemasmur guna terus muji-muji Dibata.

Lit 2 point penting si banci jadi perenungenta arah ogenta sendah : 1) Dibata tuhu-tuhu erkuasa ras erdolat nandangi kerina tinepaNa. Kuasa ras kedolaten Dibata enda teridah arah : a. ijadikenNa doni enda ras kerina isina; b. pengkawali (pemeliharaan) Dibata nandangi kerina mahluk seh makana kerinana banci erdalan ratur i bas sada ekosistem si saling bergantung sada ras si debanna; c. Dibata sebage penentu kegeluhen i doni enda, i ja arah KesahNa si maba kegeluhen ipelimbaruiNa doni enda. 2) Pemasmur tuhu-tuhu ngakuken kuasa ras kedolaten Dibata i bas kegeluhenna si mpeturah kekagumen (ketakjuben), penghargaan nandangi kiniulin kerina tinepa Dibata, bage pe tekad guna terus muji Dibata kidekah kegeluhenna. Penghargaan nandangi kiniulin alam semesta tinepa Dibata enda teridah arah bahasa si nggambarkenca kerina tinepa e sebage subjek si ngaloken perkuah ate Dibata, seri bagi kita manusia, labo sebage objek si erkonotasi negatif guna ieksploitasi semata-mata guna keuntungen manusia. I bas si e Pemasmur tuhu-tuhu menyadari bahwasana kerina tinepa si enggo ijadiken Dibata e mehuli, masing-masing lit fungsina, janah saling bergantung sada ras si debanna. Kerina bagin i bas tinepa e arus tetap lit ras terjaga kiniulinna (kelestarianna) gelah dame sejahtera (syalom) Dibata tetap lit ras banci denga inanami kerina mahluk i doni enda.

Masmur 104 banci nampati kita er-ekoteologi. Ekoteologi e me refleksi entah pe perenungen si mbages kerna Dibata si mada kerina tinepa si jadi palas kinitekenta i bas kita menatakelola kiniulin entah pe kelestarian lingkungen alam tinepa Dibata si akhir-akhir enda nandangi ceda total (krisis ekologi). I bas sada literatur iprediksiken i bas tahun 2050 jumlah penduduk i bas doni enda enggo mencapai 9,5 miliar, i ja terjadi krisis ekologi si parah si iistilahken alu “point of no return” e me alam enda enggo lanai banci erproduksi (memperbaharui dirinya sendiri) ngehasilken kerina kebutuhen geluh manusia erkiteken enggo melala mata rantai ekosistem si enggo ceda, bene, ras enggo lanai banci erfungsi alu mehuli (Graham Turner, A Comparison of the Limits to Growth with Thirty Years of Reality, 2008). Kinata si bagenda terjadi erkiteken jumlah populasi manusia si semakin meningkat alu pola konsumtifna si la mperdiateken kelestarian lingkungen alam, bage pe eksploitasi besar-besaran nandangi alam semesta enda guna keuntungen materi pihak-pihak tertentu. Hal enda tentuna arus jadi keprihatinenta sekaligus mendorong kita guna ngelakoken tindaken-tindaken si nyata guna mengantisipasi bencana ekologis enda alu palas kinitekenta si mbages man Dibata.

Tema si seh man banta, “Kiniulin Tinepa Dibata”. Si jadi penungkunen man banta, kai si banci ilakoken kita guna ngergai ras njagai kiniulin tinepa Dibata? Akap kami enggo piga-piga kali bahan PJJ-nta bage pe i bas bahan-bahan PA Kategorial si membahas kerna pelestarian lingkungen alam tinepa Dibata. Tentuna perlu sievaluasi, apakah lit pengaruhna man banta entah berlalu bage-bage saja tanpa ilitkenna hal-hal si konkrit si banci ilakoken kita secara pribadi bage pe secara komunal i bas Gerejanta. Akap kami “Buku Panduan Gereja Sahabat Alam” si iterbitken PGI ras STT Jakarta banci mpebagesi pemahamenta kerna er-ekoteologi, janah banci nampati kita i bas kita erbahan program-program konkrit berkaiten ras krisis ekologi enda. Mari radu ras kita ertoto bage pe ngelakoken tindakan-tindakan si konkrit guna ngergai ras njagai kiniulin tinepa Dibata. Kita sebage kalak si tek e me wakil Dibata i bas doni enda si iutus guna mpelimbarui tinepaNa, sebab keselamaten i bas Kristus labo hanya itujuken man kita manusia tapi pe man kerina tinepaNa (bdk. Kol. 1:15-23).