Khotbah GBKP Minggu Tgl. 28 Agustus 2016

KHOTBAH GBKP MINGGU TGL. 28 AGUSTUS 2016

Pdt. Larena br. Sinuhadji

MINGGU BUDAYA

Invocatio : “E maka ijadiken Dibata manusia, si sentudu ras tempasNa, dilaki ras diberu ijadikenNa” (Kejadin 1:27)

Ogen : Roma 12:1-3 (Tunggal)

Khotbah : Jakup 1:1-5 (Tunggal)

Tema : DIBATA ULU KEPENTAREN

Penjelasen Bahan Pustaka Si Badia

Percuban, perbeben, pergumulen, entah pe kiniseran si reh erkiteken kiniteken man Yesus Kristus enggo ialami perpulungen kalak si tek sope perpulungen e igelari “Kristen” (bdk. Perb. Rasul 8; 11:26). E maka i bas bahan khotbahta sendah, Jakup arah suratna man perpulungen si merap i taneh perlajangen nehken pergegeh gelah perpulungen e megenggeng i bas kiniseran si nialamina. Si menarik i bas suratna enda, Jakup ngatakenca bahwasana kalak si tek si ngenanami erbage-bage percuban sebage kalak si sangap (adi i bas Alkitab Terj. Baru - LAI nina, “kebahagiaan”). Ate Jakup i bas suratna enda e me gelah perpulungen kalak si tek ngasup ngerobah sudut pandangna kerna erbage-bage percuban, perbeben, pergumulen, entah pe kiniseran si nialamina. Adi i bas Alkitab Terj. Baru - LAI jelas ikataken “anggaplah” bage pe i bas ay. 3 nina “ujian”, i bas si e perpulungen iajuk gelah ngaloken erbage-bage kiniseran e i bas sudut pandang si positif ras konstruktif si banci mabai ku hal-hal si mehuli, i bas ay. 4 e me : kinigenggengen si serta, dewasa i bas kai-kai pe, dingen la kekurangen (i bas Alkitab TB - LAI, “biarkanlah ketekunan itu memperoleh buahnya yang matang, supaya kamu menjadi sempurna dan utuh dan tak kekurangan suatu apa pun”). I bas Alkitab Bahasa Indonesia Sehari-hari (BIS), akap kami lebih tepat ay. 4 enda alu terjemahen “jagalah”, ertina pola pikir entah pe sudut pandang si positif ras konstruktif enda perlu sijaga konsistensina. Kengasupen guna ngerobah sudut pandang enda ras konsistensina banci idatken alu kepentaren si rehna i bas Dibata nari (i bas bhs. Ind., nina “hikmat”, “kebijaksanaan”). E maka i bas ay. 5 perpulungen iajuk gelah mindo kepentaren e i bas pertotonna man Dibata.

Lit telu hal si penting i bas bahan ogenta Roma 12:1-3. Si pemena, ay. 1 rasul Paulus ngerana kerna persembahen si nggeluh e me dirinta seutuhna sebage persembahen si paling logis (“mahluk si rukur” - Yun. Logikon) ipersembahken man Dibata. E me totalitas dirinta siendesken man Dibata. Adi sikaitken ras ayat sebelumna Roma 11:36, ertina, ise pe kita, i bas status sosial si kugana pe, situhuna ngasup mereken kai pe si mehulina si lit i bas dirinta (nggit erkorban) guna kemulian Dibata. Si peduaken, ay. 2, geluh i bas identitas Kristen si benar i tengah-tengah doni enda la banci lang arus lit perobahen si konkrit ku si mehuli sue sura-sura Dibata ras si ngena ateNa. I bas si e tentuna arus nggit kita ipelimbarui Dibata setiap saat erkiteken la kita ngasup ngerobah dirinta adi siandalken kebeluhenta entah pe gegehta jine. I bas si e si nibutuhken e me kiniteruken ukurta i adep-adepen Dibata gelah ipengasupNa kita mpelimbarui geluhta arah erlajar Kata Dibata secara kontinyu ras konsisten bage pe erlajar arah pengalamen geluhta. Si peteluken, ay. 3, “sue ras belinna kiniteken si enggo ibagi-bagiken Dibata man bandu sekalak-sekalak”, ertina Dibata enggo mereken kerina si jadi kebutuhenta sue ras kengasupenta. Kebutuhen ras kengasupen tep-tep kalak si tek e Dibata ngenca si metehsa, e maka nina Paulus, “Ola iakapndu ganjangen bandu asa patutna”, ertina i bas ngaloken kai si jadi kebutuhenta sue ras kengasupenta e si pentingna kel e me ngataken bujur kita man Dibata asangken membanding-bandingkenca ras kalak si deban. Pemahamen si bagenda tentuna mpengasup kita ngaloken kai pe si terjadi i bas kegeluhenta, sebab Dibata meteh si terbaik nandangi kerina kalak si tek man baNa, janah mpengasup kita makeken kerina si enggo ibereken Dibata man banta guna kemulian gelarNa.

Invocationta ngerana kerna manusia (dilaki ras diberu) si enggo ijadiken Dibata sentudu ras tempasNa, ertina i bas diri manusia lit potensi guna meteh si ngena ate Dibata ras ngelakoken kerina si mehuli guna kemulian gelar Dibata i tengah-tengah doni enda. Alu bage tujun ijadikenNa manusia e me gelah manusia jadi representasi Dibata i tengah-tengah doni enda guna ncidahken kemulianNa i bas kerina dampar kegeluhenna.

Pengkenaina

Adi ngerana kerna kepentaren Dibata situhuna la lit kedungenna erkiteken kepentaren Dibata la lit batasna janah la lit ise pe si ngasup nerangkenca (bdk. Roma 11:33, rsd.). Tapi secara ringkas i bas Pustakanta si Badia kepentaren (hikmat) biasana berkaiten ras : 1) keterampilen khusus si ibereken Dibata man sesekalak guna ndahiken dahin si khusus (bdk. Kel. 31:1-5, rsd.). 2) Kengasupen si rehna i bas Dibata nari guna ngangkai ras ndungi persoalen-persoalen si terjadi si tep-tep wari (bdk. 1 Raj. 3:16-28, rsd.). 3) Cara rukur ras cara nggeluh si secara moral benar sue ras sura-sura Dibata (bdk. kitab Kuan-kuanen, rsd.). 4) Yesus Kristus sebage kepentaren Dibata si nggeluh si reh ku doni enda. Banci ikataken kepentaren Dibata enda merupaken kualitas si meganjangna i bas relasinta ras Dibata, em si jadi perayaken kalak si tuhu-tuhu tek man Dibata i bas Yesus Kristus. I bas kesempaten enda erlajar kita kerna kepentaren Dibata si lit i bas bahan-bahan khotbahta, pengogen ras invocatio.

Si pemena lebe arah invocationta, kita enggo ijadiken Dibata sentudu ras tempasNa, ertina lit potensi i bas dirinta guna meteh kerna kepentaren Dibata ras ngelakoken kepentaren e guna kemulian Dibata i bas kegeluhenta si tep-tep wari.

Si peduaken, i bas bahan khotbahta, kepentaren Dibata mpengasup kita megenggeng i bas kiniseran, bahkan ipengasup Tuhan kita nyalihken kiniseran si nialami kita jadi kesangapen ras kebahagiaan e me : kinigenggengen si serta, dewasa i bas kai-kai pe, dingen la kekurangen. Janah kepentaren Dibata rikutken surat Jakup e me : bersih pusuh peraten, nggit erdame, lemah lembut, la megogo. Dem perkuah ate i bas ia dingen erbuahken perbahanen si mehuli. La rayo-ayo, ras tangkas ukur tangkas kata (Jakup 3:17). E maka iajuk kita gelah mindo kepentaren Dibata e i bas pertotonta.

Si peteluken, arah pengajaren rasul Paulus man banta, kepentaren Dibata mpengasup kita guna ngendesken totalitas geluhta sebage persembahen si nggeluh guna kemulian gelar Dibata. Kepentaren Dibata mpengasup kita mpelimbarui geluhta. Janah kepentaren Dibata mpengasup kita ngaloken ras makeken kerina si enggo ipercayaken Tuhan man banta sue ras kebutuhenta ras kengasupenta.

Tema i bas kesempaten enda e me “Dibata Ulu Kepentaren”, merupaken pengakun kinitekenta bahwasana la lit ulu kepentaren si deban selain Dibatanta. Pengakun e perlu sicidahken i bas kerina pengkebet geluhta, e maka pindolah pergegeh arah Dibata nari gelah ipengasupNa kita ncidahken pengakunta ndai. Minggu enda merupaken minggu budaya, ngataken bujur kita man Tuhan erkiteken benaken sehna Berita si Meriah ku bas masyarakat Karo seh asa gundari enggo melala budayanta entah pe adatta si enggo iterangi alu Kata Dibata, ertoto kita gelah GBKP ipengasup Dibata guna mentransformasi budaya Karo sue ras si ngena ate Dibata. Lebih asangken si e, mari radu ras menciptaken budaya si ncidahken kepentaren Dibata i bas geluhta si tep-tep wari.