PA Kategorial GBKP Tgl. 28 Agustus - 3 September 2016

PA MAMRE GBKP TGL. 28 AGT. - 3 SEPTEMBER 2016

Pdt. Larena br. Sinuhadji (Nd. Rey Tarigan)

Lingkungen hidup/Ekologi

Ogen : Kuankuanen 10:2-5

Tema : RULIH ADI MEJINGKAT

Tujun : Mamre Ngasup :

1) Nuriken kerna erdahin e me orat nggeluh kalak si erkiniteken

2) Nuriken cara si payo i bas erdahin

Penjelasen Bahan Ogen

Bahan ogenta sendah terdiri i bas empat ayat ngenca si isina pengajaren-pengajaren hikmat si praktis berkaiten ras pengalamen kegeluhen si tep-tep wari. Kebujuren ipertentangken ras kejahaten, kalak si benar ipertentangken ras kalak si jahat, kebayaken ipertentangken ras kemusilen, kalak si mejingkat ipertentangken ras kalak si kisat. Kalak si pentar, si lit bas ia pengelako si benar, bujur, mejingkat, e me kalak si datken ulih kesangapen, kebayaken, keriahen ukur man dirina sendiri, keluargana, ras sekelewetna. Sedangken sebalikna, kalak si bodoh, si la lit bas ia kebujuren ras kebenaren, janah jahat ras mekisat ia, ulihna e me kemelan, kemusilen, ras kematen.

Si paling inti i bas ogenta sendah e me ay. 3, “Kalak bujur kutera pe la ipelepas TUHAN kelihen, tapi sura-sura kalak jahat la ipebentasNa”. I bas Alkitab Terjemahan Baru (TB-LAI) nina, “TUHAN tidak membiarkan orang benar menderita kelaparan, tetapi keinginan orang fasik ditolak-Nya”. I bas Alkitab Bahasa Indonesia Sehari-hari (BIS) nina, “TUHAN tak akan membiarkan orang baik kelaparan; tetapi Ia menghalang-halangi orang jahat supaya orang itu tidak memperoleh yang diinginkannya”. Enda merupaken pengakun kiniteken Salomo si nuliskenca bindu 10 enda kerna Dibata si erpihak man kalak si bujur (benar, baik). Icukupken Tuhan kerina si jadi kebutuhen kalak si bujur. Erta kebayaken banci jadi ulih kalak si bujur, tapi si pentingna kel e me kerembakenna ras Dibata si mpebayak ia alu kepentaren i bas Dibata nari.

Pengkenaina

Tema i bas PA-nta sendah e me “Rulih Adi Mejingkat”, alu tujun gelah Mamre ngasup nuriken kerna erdahin e me orat nggeluh kalak si erkiniteken ras ngasup nuriken cara si payo i bas erdahin. Kalak mejingkat banci iertiken sebage kalak si dem alu kininggiten ndahiken kai pe dahin si lit, la ia milih-milih dahin. Kalak si mejingkat biasana kalak si kreatif, ngasup ia menciptaken kai si man dahinken. Janah kalak si mejingkat e me kalak si berinisiatif ndahiken dahinna, la man suruhen. Si banci sitambahi erpalasken bahan ogenta sendah, kalak si mejingkat e me kalak si dem alu kebujuren, kebenaren, kiniulin, payo pendahinna, ras rembak ia ras Dibata. Kai ulihna? Icukupken Tuhan kerina si jadi kebutuhenna, janah bayak ia alu kepentaren i bas Dibata nari. E me orat nggeluh kalak si erkiniteken.

Engkai makana la bayak ia alu erta materi doni enda? Banci ka Dibata mereken erta kebayaken man kalak si tek, janah melala ka kalak si tek si bayak. Tapi si pentingna kel e me kepentaren si rehna i bas Dibata nari, sebab kepentaren Dibata mpengasup kalak si tek menatakelola kai pe si ipercayaken Tuhan man bana alu payo. Memang adi sinen orat nggeluh kalak doni jaman gundari enda melala si bayak alu erta tapi idatkenna alu kejahaten. Janah melala kalak si jahat sukses i bas kegeluhenna. Pengerana 8:11 ngatakenca (i bas bhs. Ind.) nina, “Oleh karena hukuman terhadap perbuatan jahat tidak segera dilaksanakan, maka hati manusia penuh niat untuk berbuat jahat”. Ertina lit ukumen man kalak si jahat, tapi adi soal ukumen man kalak si jahat e urusen Dibata labo urusenta. Si jadi baginta gundari e me erdahin kita alu mejingkat, tutus, bujur, benar, bagi arusna kalak si erkiniteken man Dibata. Sebab Dibata enggo mereken man kalak si tek kerina si jadi kebutuhenta rikutken kengasupenta (penjelasen kerna si e banci iogendu Khotbah GBKP Minggu Tgl. 28 Agustus 2016 khususna i bas penjelasen Roma 12 ay. 3). Tek kita Dibata pasti ncukupi kerina si jadi kebutuhenta.

PA-nta sendah ibahan i bas sub tema Lingkungen Hidup/Ekologi. Adi sikaitken ras bahan ogen, tema bage pe ras tujun situhuna la lit hubungenna. Mungkin arah litna tema khusus kerna lingkungen hidup entah pe ekologi, iajuk Mamre gelah erdiate nandangi lingkungen hidup/ekologi si enggo nandangi ceda. Ekologi i bas bahasa Yunani nari, e me oikos (rumah, lingkungen, entah pe habitat) ras logos (ilmu), ertina ilmu si mempelajari interaksi antara mahluk si nggeluh, entah pe interaksi antara mahluk si nggeluh ras lingkungenna. Penjelasen kerna si e banci ogendu postingen PJJ GBKP Tgl. 28 Agustus - 3 September 2016.

PA MORIA GBKP TGL. 28 AGT. - 3 SEPTEMBER 2016

Pdt. Larena br. Sinuhadji (Nd. Rey Tarigan)

Ogen : Kolose 2:1-5

Tema : RATUR DINGEN TETAP ERKINITEKEN

Tujun : Gelah Moria :

1) Erlajar arah kiniraturen perpulungen Laodekia

2) Ratur dingen tetap erkiniteken si teridah i bas perbahanen

Metode PA : Diskusi

Penjelasen Bahan Ogen

Kolose e me sada kuta i Asia kitik i ja perpulungen enda labo Paulus si matekisa. Perbeben si ialami perpulungen enda e me litna ajaren-ajaren si papak si la banci lang mpengaruhi jemaat. Ajaren e ngatakenca maka keselamaten idatken arah nembah man kesah-kesah ras kuasa si lit i awang-awang dingen manusia arus patuh nandangi adat sunat ras aturen adat si deban.

I bas bindu 2 ay. 1 Paulus ncidahken man perpulungen kuga perjuangen Paulus i bas melayani Tuhan i kota Kolose, kalak Kristen i Laodikia ras kota-kota si deban amin sekali pe lenga pernah Paulus jumpa ras perpulungen e. Kota Laodikia (4:13-15-16, bdk. Ketangkasen 3:14-22) posisina 17 km sebelah barat kota Kolose.

Tujunna jelas kai si ibahan Paulus gelah tetap kel ukur perpulungen (i bas Alkitab TB-LAI nina, “Supaya hati mereka terhibur”, i bas Alkitab BIS nina, “Agar hati mereka menjadi kuat”), bage pe gelah banci ersada perpulungen i bas keleng ate. Adi enggo megegeh kiniteken ras ersada arih maka perpulungen dem i bas kinibayaken ras pengertin si serta.  Alu bage itehna rahasia Dibata e me Kristus. Ertina, Kristus ncidahken kebenaren Dibata si sedekah enda terbuni i bas manusia nari (bdk. Kol. 1:27). Hanya di dalam Kristus saja, bukan pada yang lain, segala kebijaksanaan dan pengetahuan tentang Allah ditemukan. Alu kai si ilumbaken Paulus iarapken maka perpulungen paksa si e la terpengaruh i bas ajaren-ajaren si menyesatken. Alu tegas Paulus ngatakenca, gelah ula min perpulungen e itokoh-tokohi entah pe isesatken.

Banci ikataken jarak tuhu ndauh antara Paulus ras perpulungen bdk. ay 9, “sabab amin gia ndauh aku sirang ras kam, tapi ukurku ras kam kap”, perpulungen tetap jadi perhatian Paulus (i bas bhs. Ind. nina, “Tetapi dalam roh aku bersama-sama dengan kamu dan aku melihat dengan sukacita tertib hidupmu dan keteguhan imanmu dalam Kristus”). Si e situhuna nuduhkenca uga kedekaten Paulus ras perpulungen Kolose, aminna labo ia si mantekisa, bahkan secara fisik la pernah kalak enda jumpa tapi antara ia ras perpulungen e tuhu-tuhu enggo ersada. Alu kata si deban, jauh di mata tapi dekat di hati. Janah tuhu-tuhu si ipujiken Paulus nandangi perpulungen enda, e me kiniraturen perpulungen e ras ketetapen ukurna erkiniteken man Dibata. Ertina, perpulungen e murah guna iaturken erkiteken lit biak rendah hati ras nggit ipimpin. Bage pe tetap nteguh kinitekenna amin sekali mbue perbeben, tantangen si man alanken perpulungen e wari lepas wari. Tuhan pasti mereken si terbaik.

Pengkenaina

I bas 1 Kor. 14:33a ikataken nina, “Sabab Dibata labo Dibata kinilaraturen, tapi Dibata kiniraturen”. Adi Dibata pe ratur maka kita sebage pengikutNa pe ratur kegeluhenta. Senang ukurta nggeluh i bas kiniraturen. Sabab lit ka deba kalak geluhna ate-atena, la pernah ukur kena kawes kemuhen. Adi bahasa si genduari “cuek”, “emang gue pikirin”. Dirina ngenca ipikirkenna. Tapi adi kalak si enggo nggeluh i bas Yesus, nggeluna pe ratur, tertib. Ietehna waktu erdahin, istirahat, man, ikut muat bagin i bas kerina dahin Gereja, rsd. Asa gegeh ras kengasupenna itatalayakenna (imenejna) dirina nggeluh teratur (tertib). Kalak si nggeluh teratur e me kalak si meteruk ukurna, nggit ia ipimpin ras mimpin bana. Sabab enggo iaminina, maka Dibatanta pe ngena atena kiniraturen.

Tetap erkiniteken i bas kegeluhenta selaku kalak Kristen la nari man tawar-tawaren. Harus. Amin kai pe terjadi senang, susah, meriah ukur, ceda ate, sehat sakit, rsd., tetap Tuhan ingan ernalem. I bas kesusahen la jungut-jungut tetap bersyukur, bage pe i bas kesuksesen la ka megajang ukur tapi tetap rendah hati, sabab tuhu-tuhu igejapina si e kerina rehna i bas Dibata nari. Pindolah rusur gegeh man Tuhan gelah tetap ngasup kita nggeluh alu ratur ras tetap erkiniteken.