Khotbah GBKP Minggu Tgl. 21 Agustus 2016

KHOTBAH GBKP MINGGU TGL. 21 AGUSTUS 2016

Pdt. Larena br. Sinuhadji (Nd. Reynard Tarigan)

HUT MAMRE PE-21-KEN

Invocatio : “Untung kap anak si erbapaken kalak bujur, dingen si ndalanken perbahanen si bujur” (Kuan-kuan 20:7)

Ogen : Kejadin 13:1-12 (Tunggal)

Khotbah : Lukas 15:11-24 (Tunggal)

Tema : BAPA SI MELIAS

Penjelasen Bahan Pustaka Si Badia

Lukas 15 ngerana kerna pertobaten kalak si enggo papak (lalar kegeluhenna). Ps. 15:1-7, “Biri-biri si bene”, 8-10 “Duit si bene” ras ay. 11-32 “Anak bene”. Perbedaan i bas teluna judul perikop enda, maka asum biri-biri ras duit si bene, permakan ras kalak si kebenen duit ndarami biri-biri ras duitna ndai seh idatna mulihi, sedangken anak si bene ia sendiri mulih ku Bapana ras enggo itimai bapana dauh-dauh nari. Teluna perikop enda itutup alu kata keriahen ukur, “happy ending” beliden pe keriahen i Surga nandangi sekalak perdosa si jera asangken si siwah puluh siwah kalak siakapna ia benar dingen la perlu jera, “bage me malekat-malekat ermeriah ukur nandangi sekalak perdosa si jera”. “Patut kita ermeriah ukur sabab agindu si nai enggo mate, genduari enggo nggeluh mulihi”.

Janah secara khusus dalam rangka ulang tahun Mamre si pe 21 tahun ken si isoroti arah perikop enda e me kap peran Bapa si tuhu-tuhu melias, dem perkeleng ras panjang sabar.

Anak si nguda i bas perikop enda igambarken sebage anak si la meteh mehuli. Hal enda banci siidah arah erbage-bage dampar :

• Lenga pe mate bapana enggo pindona erta-erta sikerajangenna (ay. 12)
• Idayakenna ertana, je nari lawes ku negeri si ndauh, i je isia-siakenna duitna e (ay. 13, bdk. ay. 30 enggo ikerikenna erta-ertandu ras diberu perdenggal, ertina, erta warisen bapana la ngasup ia makekenca alu mehuli, bahkan idalankenna hal-hal si ncurnaken gelar Tuhan).

Seh keri senna, ras ia mengalami kesusahen. Si awalna sebage anak kalak bayak, sebab melala si erdahin bapana, kedungenna ia jadi si ermakan babi kalak. Untuk makan pe susah. Sabab iba-iba babi e pe meriah nge min ukurna manca, tapi ise pe la merekenkai pe man bana.

Tapi kedungenna sedar ia. I jenda me terjadi titik balik (syub - pertobaten) anak si bene ndai. Kesadaren, maka kegeluhen si genduari idalananina sangat susah, sedangken si erdahin bapana pe riba-iba panganna. Kenca rukur ia mbages, maka lit sura-surana mulihken ku rumah orang tuana ndube. Ay. 18, “Laweslah aku ndahi bapangku janah ningku man bana, O bapa, aku enggo erdosa man Dibata dingen ersalah man bandu. Lanai metunggung pe aku igelari anakndu. E maka berkat ia ndahi bapana”. I je me situhuna hal si penting dalam rangka pertobatan. Labo hanya soal erkadiola, menyesal, sedar, ngandung, tapi keberanian untuk berbalik nadingken dosa ras ndalanken si mehuli si ngena ate Tuhan.

Teridah maka kepeken bapana nimai suari ras berngi. Sabab ndauh denga pe ia i rumah nari enggo idah bapana ia. Mekuah ate bapa, e maka kiam ia ngayakisa, idakepna ras iemaina. Kebaliken si rusur terjadi i bas kegeluhenta i ja bapa entah orang tua, merawa-rawa lebe menumpahkan kekecewaan, kekesalan rsd. Kenca enggo minta maaf anakna, idilo bapana juak-juakna, nina, “Pedasken baba ku jenda uis si mejilena janah pakeken man bana. Tamaken cincin ku jari-jarina janah sepatui ia”. Labo ngadi je saja. Ibahan ka pesta meriah dalam rangka ngalo-ngalo anakna si enggo bene ndube si kedungenna mulihkenna, nai enggo mate, tapi genduari enggo nggeluh. Bagem me igambarken bapana kernca kecibal anakna, si tuhu-tuhu erbahanca meriahkel ukur bapana, keriahen ukur la terturiken kel.

I bas pegogen si pemena, icidahken man banta kerna tokoh Abram entah pe Abraham, sosok bapa si bijaksana, la otoriter ras tuhu-tuhu beriman. Kenca enggo Abram ras rombongenna kelang-kelang Betel ras Ai, i je me tading Abram rikut ras keluargana bage pe biri-birina, kambingna ras lembuna. Lut ras keluargana rikut ras asuh-asuhenna ras si erdahinna tading i je. Kedungenna, rubati permakan Abaram ras permakan Lut. Mbiar kel Abram erkiteken persoalen erta, si erdahin si la cocok terjadi perubaten i bas ia ras Lut erkiteken kalak enda keluarga denga (setangke denga). Ula min erkiteken erta terjadi perselihen i bas keluarga. Jadi lebih ipentingken i jenda keutuhan keluarga asangken erta. E maka isuruhna leben Lut milihsa. Mbal-mbal siarah apai kin atendu nina Abram. “Adi kam kempak kawes, aku kempak kemuhen, bage pe sebalikna.” Situhuna, wajar Abram sebagai bapa tuana ia nge sierbahan keputusen. Tapi i je pe la ipakena hakna, lebih baik dia mengalah gelah banci mehuli hubungen kekeluargaan.

Aplikasi

  

“Absent Fathers, Lost Sons” e me kap judul buku si nitulis Guy Corneau si iterjemahkan “Ayah yang tidak dirasakan kehadirannya, Putra yang kehilangan Arah”. I bas buku enda Corneau nulisken pengalamen kegeluhenna si berkaiten ras bapana. Asum kitik denga ia, ndeher kel ia ras bapana, hubungen ras bapana seh kel ulina. Tapi memasuki usia remaja ia kehilangen sosok ayah si enggo terlalu sibuk ras urusenna. Tentuna pengalamen enda erbahanca ia kehilangan kepercayaan diri, tapi untungna geluhna terselamatken. Janah memang mbue ijumpaina pengalamen si seri sialami mbue remaja pria. Artina, budayanta mendukung “ketidakhadiren” bapa i bas membentuk, mendampingi anak. Dari generasi ku generasi enggo iwarisken maka bapa tugasna ndarami kebutuhen materi (erdahin di luar rumah) tanpa perlu tau urusen rumah tangga ras anak-anak. Si e me si perlu ipekena. Mpebelin ras ngkelingi anak-anak e me kap tanggung jawab bersama orang tua, bapa ras nande. Janah rikutken bahanta sekali enda secara khsusus i bas ulang tahun Mamre si pe-21 tahun ken, maka kepeken mbelin kel tanggung jawab bapa nandangi anak-anak si enggo bereken Tuhan man jabuna.

Bahan khotbahta, jelas jemba Mamre gelah jadi bapa si dem alu kesabaren ras kekelengen ngaloken uga kecibal anak e, sabab labo kerina anak-anakta e bagi ukurta. Sabab terkadang asum anak-anak e la bagi ukur, dengan gampangna sirawai, siperngasi, sisalahken tanpa lebe siteh kai alasenna. E maka mbue kel anak-anak si mengalami “akar pahit” ras bapana. Memang perikop nuduhken man banta, kerna Bapanta i bas Jesus Krisus tetap ngaloken kita amin uga pe keadaanta, si penting lit kesadaren diri guna bertobat ras ndalanken si ngena ateNa. Tapi rikutken konteks sebagai bapa i doni enda, iarapken ngasup Mamre, bapa ncidahken kekelengen, kesabaren amin kai pe si terjadi man anak e. Perban itandaina kel, maka bapana perkeleng, maka labo lit kebiarenna anak si bene ndai mulih ku rumah orang tuana.

Ogen si pemena mpersingeti kita sebagai orang tua,khususna Bapa si bijaksana, la otoriter, mau berkorban guna masa depan anak-anak. Mbiar kel ia terjadi perubaten, makana leben iantisipasina alu erbahan sada solusi si mehuli. Abram tidak takut kehilangan hakna ras materina, asum suruhna Lut leben milih inganna, sabab tek kel Abram adi ras Dibata, daerah si gersang pe banci iubahNa jadi daerah si subur, dem dadih ras tengguli. Bapa si bujur, subuk i bas perukuren, pengerana ras perbahanenna. Bapa si berintegritas. Labo hanya manis i mulut ras lebe-lebe jelma si nterem, la lit tambahna jelma pe tetap ia bujur ras mehuli. Bapa si banci jadi contoh si mehuli nandangi anak-anakna. Sabab terkadang si terjadi, bas jelma si deban ngenca bapanta e terkenal baik, murah hati, lembut, tapi man anakna sendiri egois, pelit, kurang perhatian. Seh kel untungna anak-anak si erbapaken kalak bujur, paling tidak anak-anakna pe nggeluh ngusih bagi bapana dingen kehadiren keluarga e enggo pasti jadi berkat man kalak si nterem.

Selamat HUT Mamre, Tuhan Jesus memberkati Mamre GBKP jadi imam i tengah-tengah jabu si tetap malang man Tuhan.