PA Kategorial GBKP Tgl. 14 - 20 Agustus 2016

PA MAMRE GBKP TGL. 14 - 20 AGUSTUS 2016

Nrs. Bp. Rey Tarigan

HUT RI Pe-71-Ken

Ogen : Matius 14:22-23

Tema : PEKESAHKENLAH

Tujun :

1) Nuriken maka pekesahken e me salah sada kearusen nggeluh

2) Nuriken cara mbaleng-mbalengi sura-sura ras perukuren

Penjelasen Bahan Ogen

Bahan ogenta sendah nuriken kerna Tuhan Yesus si lawes sekalak guna ertoto ku sada uruk. Kenca enggo dung ielaiNa kalak si nterem alu mpepalem kalak si sakit ras mereken man lima ribu kalak, lawes Tuhan Yesus sekalak ku sada uruk guna ertoto. I bas kitab Injil si deban, khususna Injil Lukas si mbue nurikenca bahwasana i bas kesibuken pelayanenNa lit ibahan Tuhan Yesus waktu khusus guna ertoto sekalak saja, Mrk. 1:35; Luk. 5:16; 6:12; 9:18; 11:1; rsd. I bas litna waktu khusus Tuhan Yesus guna ertoto sekalak saja, teridah bahwa kerembaken ras persadanNa ras Dibata secara pribadi merupaken hal si penting i bas pelayanen Tuhan Yesus. Em energi i bas Dibata nari si lit i bas Tuhan Yesus makana ngasup ia ngelai kalak si nterem bage pe ajar-ajarNa.

Pengkenaina

Tema si seh man banta i bas PA sendah e me, “Pekesahkenlah”, alu tujun gelah Mamre ngasup nuriken maka pekesahken e me salah sada kearusen nggeluh, ras Mamre ngasup nuriken cara mbaleng-mbalengi sura-sura ras perukuren. Kai hubungenna antara waktu khusus Tuhan Yesus guna ertoto sekalak saja ras pekesahken? Mungkin pemahamenta kerna pekesahken perlu ipelimbarui. Sebab umumna kita memahami pekesahken sebage waktu luang si ipergunaken kita guna ngadi entah pe istirahat i bas kesibuken rutin entah pe pendahinta nari. I bas istirahat e umumna la lit je kaitenna ras ersembah entah pe rembak ras Dibata. E maka situhuna i bas pekesahken e labo unsur fisik saja si ngadi ras beristirahat, tapi lit ka je unsur ngerembakken dirinta ras Dibata. I bas tradisi kalak Yahudi, wari Sabat, entah pe wari pepituken ipakena guna ngadi ras beribadah man Dibata, erpalasken Kej. 2:3, i je Dibata ngadi i bas wari pepituken kenca enggo itepaNa si nasa lit 6 wari ndekahna. I bas ngadi e lit je unsur ersembah man Dibata. I bas jaman modern enda, istilah weekend, entah pe akhir pekan, ibenaken i bas wari Jumat berngi seh wari Minggu, umumna ipergunaken kalak guna istirahat i bas pendahinna si rutin. I bas tradisi kalak Kristen, weekend e ibenaken i bas wari Jumat berngi seh wari Sabtu, sebab wari Minggu, wari si pemena i bas sada minggu e, ipergunaken guna beribadah man Dibata. Lit ka je unsur ersembah man Dibata.

Adi rikutken tradisinta si menam seri ras kalak Yahudi, banci ikataken i bas pekesahken e (entah pe ngadi kentisik) lit je unsur rohanina, e me waktu khusus si ipergunaken guna ersembah man Dibata, entah pe ngerembakken dirinta secara khusus ras Dibata. Bagi istilah “retreat”, ngadi lebe kita kentisik (mundur sejenak) i bas keramaian nari ku sada ingan si melenget, je kita mbue ertoto man Dibata. Bage pe istilah “rekreasi”, situhuna lit je unsur penyegaran secara rohani, e me ngadi lebe kita kentisik i bas sada ingan guna re-creation, entah pe “menciptakan kembali” energi si enggo sipekeri guna erdahin, lit je unsur rembak ras Dibata guna ndatken energi si mbaru arah Dibata nari. E maka i bas kita rekreasi bahanlah waktu khusus guna ersembah man Dibata raduken ras isi jabunta.

Pekesahken e tentuna enggo semal ilakoken kita paling tidak sekali i bas sada minggu. E hal si penting si arus lit ras arus ilakoken kita gelah ndatken energi si mbaru guna ndalani kegeluhen enda. Tapi si payo i bas kita pekesahken e, i je arus lit unsur ngerembakken dirinta ras Dibata, ertina labo saja pekesahken secara fisik, psikis, tapi pe pekesahken secara pertendin. Membangun hubungen si mehuli ras Dibata arah pekesahken si ilakoken kita. Adi sihubungken ras tujun si peduaken, e maka sebage Mamre iajuk kita gelah pentar ngaturken waktu si enggo ibereken Dibata man banta. Lit waktuna erdahin, lit ka waktuna pekesahken si i je lit unsur rembak ras Dibata, gelah rutinitas si idalanken kita pe tetap lit maknana labo keri bage-bage saja. Adi sihubungken ras HUT RI pe-71-ken, ngataken bujur kita man Dibata erkiteken kemerdekan negaranta erbahanca waktu si lit man banta guna pekesahken banci ipergunaken kita alu suasana aman ras nyaman. E maka mari radu ras sipergunaken waktu si lit guna pekesahken, e me ngerembakken dirinta i bas waktu si khusus ras Dibata.  

PA MORIA GBKP TGL. 14 - 20 AGUSTUS 2016

Pdt. Larena br. Sinuhadji (Nd. Rey Tarigan)

Si Man Ogen : Ketangkasen 2:1-11

Tema : SETIA SEH MATE

Tujun : Gelah Moria :

1) Erlajar arah perbeben perpulungen Epesus ras Smirna si erbahanca ia la setia man Dibata

2) Setia man Tuhan i bas kerina kecibal geluhna

Metode PA : Studi Kasus

Penjelasen Bahan Ogen

Kota Epesus e me kota si sangat terkenal i bas propinsi jajahan Roma i Asia, kota pelabuhan si sangat sibuk alu perdagangen (bisnis) ras pusat pemujaan Dewi Artemis (Perb. Rasul 19:27,35) ras melala i je ingan perdukunen. Banci ikataken rikutken kondisi ras situasi daerah si melala tantangenna erbahanca la berkembang kekristenan, tapi sebalikna i kota Epesus nge perpulungen kalak Kristen si mbelinna i bas kerina jajahen Roma. I bas pengenehen Johanes, lit pujian i bas Dibata nari entah pe hal-hal positif si enggo idalanken perpulungen enda, e me kap :

• Jemaat si pekerja keras, semangat (“Kueteh kai si enggo idahikenndu, Kueteh kuga latihna iakapndu erdahin”, bhs. Ind., “Aku tahu segala pekerjaanmu; baik jerih payahmu maupun ketekunanmu”). Tuhan senang kepada jemaat yang dinamis, giat, aktif dan pekerja keras, bukan jemaat yang beku dan suam-suam kuku.
• Jemaat si kristis dingen pang menolak ajaren-ajaren si la sehat bage pe guru-guru palsu. Perpulungen Epesus ipujiken Tuhan erkiteken serius dengan imannya. Komitmen penuh ras kemurnian ajaren, e maka perpulungen enda kritis nandangi pengajaren-pengajaren si menyimpang i bas kebenaren Kata Dibata. Pengangkan si payo kerna Kata Dibata e nge si erbahanca ngasup dingen pang perpulungen e menolak segala pengajaren si la benar dingen “menelanjangi” kalak si mengaku dirina rasul labo situhuna rasul.
• Perpulungen Epesus enda pe megenggeng dingen la surut erkiniteken amin mbue tantangen si man alankenna erkiteken kinitekenna man Kristus (sabar dan tahan menderita).

Tapi lit si man pandangen perpulungen enda. Enda nuduhkenca maka la lit manusia si sempurna. Maka enggo urak kekelengen perpulungen e man Tuhan termasuk man sesama manusia (“La nai atendu keleng Aku bagi tantangna nai”). Ertina, perpulungen la banci konsisten njagai kiniteken ras kekelengenna man Tuhan erkiteken erbage-bage tantangen si man hadapen. Enggo ndauh perpulungen e ndabuh ku bas dosa. E maka ipindoken Tuhan gelah perpulungen enda jera ras berubah, dingen ngelakoken bagi si ilakoken tangtangna nai. Sabab adi la jera, iukum Tuhan perpulungen e.

Kota Smirna. Adi kota Epesus kota terbesar ras tersibuk, kota Smirna e me kota teranggun, terelok. Enterem kalak gelarisa “Puspa Asia” entah pe kembangnya Asia. “City Planning” entah pe tata kota enda sangat terencana. Lychirmus membangun kota enda kenca 400 tahun ipediat terbengkalai asum iguncang gempa si cukup dahsyat. E maka labo sada kebetulen ipetandaken Kristus arah perikopta, “si enggo mate tapi nggeluh mulihken”. Labo hanya mpetandaken diri Yesus Kristus tapi pe kerna pengalamen kota Smirna jine. Hal si deban si erbanca Smirna terkenal, e me kap kesetiaanna man Roma. Smirna e me kap sekutu Roma si paling setia dingen si ndekahna. Sada paksa waktu asum pasukan Roma mengalami kelihen ras kedingingen i medan peperangen, penduduk kota Smirna tanpa ikordinir mereken penampat alu mpepulung jubah-jubahna ras ngkirimkenca ku medan peperangen.

I bas kota enda ka nge maka kekristenan sangat teruji. Lit kelompok si ngaku kalak Jahudi tapi situhuna anggota perpulungen Iblis si ngelakoken erbage-bage serangen, fitnah man perpulungen kalak Kristen i Smirna. Perpulungen si bayak tapi kedungenna “musil” erkiteken kiniseran sialami. Erkiteken kiniseran si mesangat maka piga-piga i bas perpulungen e ipenjara. Kisah si seh terkenalna e me kerna Uskup Polikarpus si mate martir i bas wari Sabtu 23 Peb. 155. Adi atena selamat, arus iakuina maka Kaisar e me Tuhan ras ersembah ia man Kaisar. Tapi si e la nggit ia ndalankenca. Man bana Yesus Kristus ngenca Tuhan la lit si deban. Untuk terakhir kalina ibereken kesempaten man bana ope ibunuh gelah mengutuki Kristus ras nehken persembahen man Kaisar. E maka nina Polikarpus, “Selama 88 tahun aku melayaniNya, tak sekalipun Yesus mengecewakan aku. Bagaimana mungkin sekarang aku menghujat Rajaku yang telah menyelamatkan aku?” Kedungenna ia itutung nggeluh-nggeluh (dibakar hidup-hidup). Api berkobar. Labo kepeken terbegi sora ratapan, tapi doa pujian si ipenangkih Polikarpus.

E maka pergegeh i bas Tuhan nari nandangi perpulungen Smirna, “Ola mbiar kerna kiniseran si nandangi si inanamindu. Tetaplah kinitekenndu man bangKu seh mate pe gelah kubereken man bandu rudang-rudang kegeluhen tanda kemenangenndu. Kalak si menang la nai pagi isiksa kematen sipeduaken. Adi lit cupingndu begikenlah kai siikataken Kesah Dibata man perpulungen-perpulungen”.

Pengkenaina

Lit lagu “Aku Berubah”, i ja ende-enden e mpersingeti kita, maka i bas perjumpanta ras Yesus, tek man Yesus terjadi perobahen ku arah si mehuli i bas kegeluhenta, subuk perukuren, pengerana ras perbahanenta. Labo sebalikna. Tapi menjaga konsistensi, kesetian, ketaaten, kekelengen gelah ambah wari na reh mehulina, reh sikapna tentu la gampang sabab melala kel tantangen-tangtengen i sekelewetta si banci erbahanca urak bahkan berubah kita ku bas si la mehuli bagi si ialami perpulungen i Epesus ras kalak Jerusalem. “Zona nyaman” entah pe kiniseran banci erbahanca berubah kita ku bas hal-hal si la mehuli.

Tema ngatakenca,  “Tetap Setia Seh Mate”, mabai kita guna intropeksi diri, maka kekelengen man Tuhan ngenca si mpengasup kita tetap njagai kinitekenta man Tuhan. Perentah si utamana kel bas Tuhan nari man banta e me uga kita banci ngkelengi Tuhan asa ukur, asa tendi dingen asa gegehndu. Bage pe ngkelengi manusia bagi kita ngkelengi dirinta jine. Adi enggo urak keleng ateta man Tuhan, la nari sigejapken ras siinget uga mbelinna perkuah ate Tuhan si nampati kegeluhenta katawari paksa pe.

Syair lagu Karo, “I ja kin keleng ate ndai” mpersingeti kita maka banci jadi Tuhan ras keluarganta, teman-temanta kidaramen kekelengen si biasa idahna ras igejapina bas kita nari tapi la nari idahna genduari i bas kita. Sabab penting kel kekelengen e nggeluh ras teraplikasi alu mehuli i bas kegeluhenta. Kekelengennta man Tuhan erbahanca kita nggeluh ertanggung jawab man anak jabunta, bujur i bas pendahinta, nggeluh berintegritas, tutus ras setia i bas pelayanenta, rsd. Arusna min lit semangat i bas kita, reh tambahna umur, reh ulina kegeluhen, semakin hari boleh semakin baik, geluhta ernanam, man kalak si deban.