PJJ GBKP Tgl. 7 - 13 Agustus 2016

PJJ GBKP TGL. 7 - 13 AGUSTUS 2016

Pdt. Larena br. Sinuhadji (Nd. Rey Tarigan)

Tema : JAGAI KULANDU (Kuan-kuanen 23:19-21; 1 Korinti 6:19-20)

Penjelasen Bahan Ogen & Perenungen

Bahan ogenta si pemena termasuk i bas perikop alu judul “Telu pulu petuah kalak pentar” (Alkitab Terj. TB-LAI “Amsal-amsal orang bijak”). I bas bindu 22:17-21 ikataken 30 petuah enda isina e me perkatan kalak pentar, pertenget kepentaren, ajar si mehuli, bage pe pengajaren si benar. Tujun 30 petuah enda, e me gelah ise pe si ndengkehkenca tek man Tuhan ras ndatken keriahen ukur. Secara khusus ogenta sendah masuk i bas petuah si pe-15-ken. I bas ay. 19, “Mergermetlah nandangi perdalanen geluhndu” i bas terjemahen Alkitab TB-LAI nina, “Tujukanlah hatimu ke jalan yang benar”, banci iertiken kalak pentar e me kalak si mergermet entah pe ngarahken pusuh perukurenna ku dalan si benar. Ngikutken dalan si benar seri ertina ras taat, ngikutken perentah Tuhan. Ay. 20 i bas kalimat si positif merupaken persinget gelah mengkondisiken geluh ergaul ras kalak si benar. Kalak pemabuk ras merangap bage pe si medem saja dahinna banci iertiken secara harafiah sebage tuhu-tuhu kalak pemabuk, merangap, ras kisat. Banci ka pe iertiken sebage simbolisasi kalak si la benar si geluhna musil (miskin) baik secara materi bage pe secara mental ras spiritual. Ergaul ras kalak si bage rupana tentuna labo mabai kemalemen ate ras keriahen ukur.

Bahan ogenta si peduaken merupaken persinget rasul Paulus man perpulungen Korinti i bas hal erlua-lua (tentang percabulan, ay. 15,16, atau nasihat-nasihat tentang seks bebas dan perkawinan, bdk. ps. 7:1-40). Kalak si enggo iselamatken i bas kiniteken man Kristus enggo ersada pertendinna ras kulana ras Tuhan. Ertina, pertendin ras kula kalak si enggo itebus alu dareh Yesus i kayu persilang enggo jadi sikerajangen Dibata (ay. 20). Adi enggo jadi sikerajangen Dibata tentuna la banci ipergunaken guna erlua-lua entah pe ngelakoken hal-hal si deban si banci ncedaken pertendin ras kulana sebab kula ras pertendin e enggo ipebadiaken Dibata, lit je ringan Kesah si Badia. E maka payo kel adi kula kalak si tek e igelari Rumah Pertoton Kesah si Badia (ay. 19). Lit pemahamen piga-piga perpulungen Korinti maka pertendin ras kula e labo ersada. Kenca mate kari pertendin mulihken ku Dibata sementara kulana tading jadi taneh. I bas pemahamen si bagenda makana melala kalak Kristen Yunani si ipergunakenna kulana guna erlua-lua. Pemahamen si e tentuna labo benar. Si ipekeke kari i bas wari pendungi jaman e me kula ras pertendin kalak si tek labo pertendinna saja (bdk. 1 Kor. 15:44-52), e maka sijagalah kula ras pertendin gelah tetap badia i adep-adepen Dibata.

Lit peribahasa si ngatakenca “Di dalam tubuh yang sehat terdapat jiwa yang kuat”. Payo, adi kulanta sehat tentuna mereken gegeh man pertendinta. Jagai kula gelah tetap sehat tentuna hal si penting, sebab adi sakit kulanta enggo pasti la banci erkai pe alu maksimal. Bage pe sebalikna, adi sakit pertendinta sakit ka kulanta. E maka sehat i jenda sifatna holistik, sehat kulana bage pe sehat pertendinna. Kalak si pentar tentu saja kalak si ngasup ngaturken alu payo kesehaten kulana ras pertendinna. Umpamana, gelah sehat kulana maka iaturkenna alu payo pola konsumsina, man ia secara teratur 3 kali 1 wari, melala minem lau (air putih), cukup jam istirahat entah pe medem, ras olah raga teratur. Gelah sehat pertendinna maka ijagana alu payo pola pikir ras pola rasana, e me berpikir secara positif ras optimis, bage pe lit sukacita ras dame i bas perasaanna. Sebab melala kalak sakit erkiteken la ngasup ia menjaga pola pikir ras pola rasana, lalap negatif nandangi kalak si deban, lalap gejap-gejapen i bas ngaloken ranan kalak si deban, murah tersinggung, pikiran kotor, rsd., umpamana. Janah i bas pergaulan pe ijagana alu bergaul ras kalak si mehuli. Sebab melala kalak sakit erkiteken bergaul ras peminem-minem ras kalak si narkoban. E maka perlu sijaga kesehatenta secara holistik, sehat pertendin bage pe sehat i bas kulana. Kalak si enggo iselamatken alu dareh Kristus e me kalak si enggo ipebadiaken Dibata kula ras pertendinna, enggo ersada ras Dibata, entah pe enggo jadi sikerajangen Dibata kula ras pertendinna. Alu pemahamen si bage e maka wajar kel adi iajuk kita gelah njagai kulanta ras pertendinta gelah tetap sehat ras badia i adep-adepen Dibata.

Secara praktis hal enda banci siaplikasiken umpamana, mari radu ras sirobah pola konsumsi i bas perjumpan-perjumpan Gerejanta alu menu si sehat rikutken situasina. Umpamana adi enggo lewat jam 7 berngi konsumsi buah-buahan mungkin lebih pas ras sehat. Janah menu konsumsi e ula melalasa daging. Man banta si ngisap denga, adi banci sipengadi, adi lenga banci sipengadi bahanlah ingan khusus guna ngisap gelah anak-anakta ras kalak si deban si la ngisap pe tetap sehat. Man banta pernanden si hobi denga nyontil, adi banci la nai sipake tembakau, janah bahanlah ingan khusus guna percidurna. Man banta si overweight, entah pe kelebihan berat badan, kolestrol, rsd., mari sijaga pola man ras minemta. Selain si e mari radu ras siciptaken lingkungen pergaulan si mehuli, gelah pola pikir ras pola rasanta pe positif ras membangun. Bage pe mari radu ras sijaga pergaulenta gelah ula ndabuh ku bas pinakit-pinkit si situhuna banci isilahken kita. Ras melala denga contoh-contoh si deban si banci siaplikasiken guna njagai kulanta ras pertendinta gelah tetap sehat. Kenca PJJ-nta sendah mari radu ras erbahan pola hidup sehat bage pe ertoto, mindo pergegeh i bas Dibata nari gelah ipengasupNa kita njagai kula bage pe pertendinta gelah tetap sehat ras badia i adep-adepen Dibata.