SUPLEMEN PA MORIA GBKP TGL. 24 - 30 MEI 2026

Pdt. Larena Sinuhadji (Nd. ReyRapha Tarigan)

Dibata Si Telu Sada

Si Man Ogen : Matius 3:13-17

Tema : DIBATA SI TELU SADA

Tujun : Gelah Moria:

- Nandai Dibata si telu sada

- Nulisken pengangkanta kerna Dibata si telu sada kenca dung ceramah

Metode : Ceramah

Penaruh 

Pengajaren kiniteken Kristen kerna Dibata si telu sada (Allah tritunggal) enggo rusur sibahas setiap tahun. Tentu maksudna gelah reh mbagesna pengangkanta kerna doktrin enda. Amin pe situhuna adi ngerana kita kerna Dibata ras karya-karyaNa i tengah-tengah doni enda perlu lebe sisedari keterbatasenta selaku manusia tinepa Dibata. Rasul Paulus i bas Roma 11:33 (TB - Ed. II) ngatakenca, “O, alangkah dalamnya kekayaan, hikmat, dan pengetahuan Allah! Sungguh tak terselidiki keputusan-keputusanNya dan sungguh tak terselami jalan-jalanNya.” Enda lebe si harus ialoken kita maka gegeh ras kengasupenta terbatas guna ngantusi Dibata, khususna i bas kita erlajar kerna Dibata si telu sada, Allah tritunggal, entah pe doktrin Trinitas.

Mpebagesi Si Man Ogen 

Si man ogenta sendah lit i teruh judul perikop “Yesus iperidiken” si secara garis besar nuriken kerna peridin man Yesus si ilakoken Yohanes Peridiken, janah peridin e penegasen kerna identitas Yesus sebage Anak Dibata. Turi-turin kerna Yesus iperidiken enda lit i bas Injil si deban, Mrk. 1:9-11 ras Luk. 3:21-22. Yohanes Peridiken e me sekalak persuruhen Dibata si nikapken dalan man Mesias. I bas rangka nikapken dalan man Mesias e, ipesehna berita i bas Dibata nari kerna pertobaten janah iperidinna kerina kalak si tek nandangi berita e ras ngakuken dosa-dosana (bdk. Mrk. 1:1-7; rsd.). Arah tugas tanggung jawab si ibereken Dibata man Yohanes Peridiken enda jelas maka si iperidikenna e me kerina kalak si ngakuken dosa-dosana ras ertobat (jera).

Tapi i bas si man ogenta sendah Yesus si iperidiken Yohanes Peridiken. Kai enda antusenna? Si pemena lebe, i bas ay. 14 secara tersirat Yohanes Peridiken ngakuken maka Yesus e me Mesias. Banci ikataken maka peridin Yesus e me pengakun Yohanes Peridiken kerna ke-Mesias-an Yesus. Si peduaken, i bas ay. 15 ngaloi Yesus nina, “sidalanken kai si ngena ate Dibata”, i bas terj. Bhs. Ind., nina, “melakukan semua yang dikehendaki Allah” (“kehendak Allah” i bas bhs. Yun., dikaiosunè, ertina: suatu cara hidup yang sesuai dengan kehendak Allah). Yesus mereken contoh nggeluh sue ras peraten Dibata, e me mpeteruk dirina i lebe-lebe Yohanes Peridiken guna iperidiken sebage langkah awal ibenakenNa misiNa i tengah-tengah doni enda. Si peteluken, langkah awal misiNa i tengah-tengah doni enda ibenaken alu pentahbisen Yesus sebage “Kristus” (yang diurapi Roh Kudus), Mesias (Juruselamat), Anak Dibata (kekelengen Dibata), penegasen kerna keilahian Yesus, Dibata si jadi manusia reh ku doni guna maba keselamaten holistik, IA nge si harus siikutken bagi si iberitaken Yohanes Peridiken. Sekali nari peridin Yesus labo seri ras peridin kalak perdosa. Peridin Yesus e me tanda ibenakenNa pelayanenNa i tengah-tengah bangsa Israel, pengakun maka tuhu IA Mesias, Anak Dibata, bahkan Dibata si nusur ku doni enda.

Si jadi fokus i bas PA-ta sendah e me ay. 16-17, kenca Yesus iperidiken rempet talang langit janah idahna Kesah Dibata nusur bagi nderapati ku baboNa, je nari terbegi sora i surga nari ngatakenca nina, “Enda me AnakKu si Kukelengi. IA me si ngena ateKu.” Ayat-ayat enda encidahkenca Dibata si telu sada, lit sora i surga nari e me sora Dibata Bapa, lit Yesus Kristus si iperidiken, bage pe lit Kesah Si Badia si nusur bagi nderapati. Secara khusus kerna identitas Yesus sebage “Anak Dibata” e Dibata sendiri si merekenca, labo manusia. Janah Kesah Si Badia nusur sebage tanda kuasa si ibereken Dibata man AnakNa sope lenga IA berkarya i tengah doni enda. Dibata Bapa, Yesus Kristus (Anak Dibata), ras Kesah Si Badia tuhu-tuhu berperan i bas penciptaan doni enda, karya penyelamaten arah kematen, kekeken, ras kenangkihen Yesus ku surga, pajekna Gereja arah nusurna Kesah Si Badia, seh ku kedungen doni enda. Arah ogenta sendah teridah lit telu pribadi si berbeda tapi sada ngenca Dibata si isembah kita. 

Pengkenaina

Allah tritunggal, Trinitas, entah pe Dibata si telu sada, e me istilah i bas rangka pengajaren kiniteken, entah pe doktrin. Adi sidarami i bas Pustaka Si Badia la lit istilah-istilah ndai, tapi ituriken lit karya Dibata Bapa, Yesus Kristus, ras Kesah Si Badia. Penyataan Dibata si berbeda enda harus iajarken amin pe situhuna la terantusi logika sebab enda berkaiten ras misteri ilahi si hanya banci terantusi arah kinitekenta nari. Sejarah encidahkenca polemik kerna pengajaren Trinitas enda. Ibenaken alu litna istilah “trinitas” si ibahan Tertullianus sekalak teolog Latin i bas abad pe-3-ken nari, seh asa gundari melala denga pengajaren-pengajaren si papak kerna Trinitas enda. Pengakuan Iman Rasuli bage pe Pengakuan Iman Nicea - Konstantinopel, si ipakeken i bas Liturgi GBKP, e me bukti sejarah perjuangen Gereja i bas ngelawan ajaren-ajaren si papak kerna Dibata si telu sada.

GBKP enggo erbahan rumusen pengajaren kerna Dibata si telu sada i bas Buku Konfesi GBKP bage pe Buku Katekisasi GBKP. Tugasta kerina perpulungen, khususna kita kerina Moria guna mempelajari alu tutus doktrin Trinitas enda gelah banci tuhu-tuhu sipahami alu penampat i bas Kesah Si Badia nari. Emaka sibahanlah program-program pengajaren si khusus mempelajari kerna Dibata si telu sada enda, si tujunna labo terjeng gelah nambahi pemetehta saja, tapi guna ngelawan ajaren-ajaren papak si gundari semakin berkembang i bas dunia maya entah pe i bas Medsos. Adi la lit pemetehnta si benar kerna ajaren Trinitas, enggo pasti kita terbawa arus pengajaren si sesat si la sue ras Pustaka Si Badia.

I bas kesempaten enda ibahan kami piga-piga ilustrasi kerna Dibata si telu sada, amin pe perlu lebe sisedari maka ilustrasi kai pe si ibahan manusia la banci menjelaskan secara lengkap misteri Dibata: 1) Tiga nada berbeda (do - mi - sol) menjadi satu harmoni. 2) Satu api menghasilkan: nyala, cahaya, panas. 3) Tiga dimensi (ingatan, pengertian, kehendak) dalam satu jiwa manusia. 4) H2O dapat mewujud dalam tiga bentuk: cair, es, uap. 5) Satu ruang terdiri dari panjang lebar dan tinggi. 6) Kasih membutuhkan tiga unsur: kasih itu sendiri, yang mengasihi, dan yang dikasihi. Ras melala denga ilustrasi si deban. Ertoto kita gelah ipengasup Dibata kita ngantusi pengajaren Dibata si telu sada, janah si pentingna kel enggo nge sigejapken keleng ate Dibata i bas kegeluhenta? Sebab guna engkelengi doni enda nge Dibata reh i bas Dibata si nepa doni enda, Yesus Kristus, ras Kesah Si Badia.