SUPLEMEN PJJ GBKP TGL. 24 - 30 MEI 2026

Pdt. Larena Sinuhadji (Nd. ReyRapha Tarigan)

NGERGAKEN KATA DIBATA ARAH NDALANKEN ADAT

Matius 15:1-9 (Konfesi Budaya)

Penaruh

Secara umum erti budaya e me “suatu cara hidup yang berkembang, dimiliki bersama oleh sebuah kelompok orang, dan diwariskan dari generasi ke generasi.” I bas definisi budaya si ibuat kami arah Wikipedia ndai, banci isimpulken kita maka budaya Karo e me warisen turun-temurun. Bekas pedah-pedah orang tuanta ndube. Kerina pedah-pedah e menjadi kearifan lokal si iajarken dari generasi ke generasi. Sikataken bujur man Dibata erkiteken GBKP termasuk salah sada pihak si ikut melestarikan kearifan lokal budaya Karo.

I bas PJJ-ta sendah radu ras mulihi kita erlajar kerna budaya, entah pe adat, si enggo iterangi alu Kata Dibata.

Mpebagesi Si Man Ogen

Ogenta sendah lit i teruh judul perikop “Pengajaren kerna adat si ndekah.” Terj. Bhs. Ind., nina “Perintah Allah dan adat istiadat Yahudi.” Ituriken maka reh piga-piga kalak Parisi ras guru-guru Agama Yahudi ndahi Yesus. Isungkunna Yesus, engkai maka ajar-ajar Yesus la ngikutken adat nini-nininta, i ja sope man la iburihina tanna rikutken adat si ndekah? Man banta mungkin enda labo siakap hal si mbelin, tapi man kalak Yahudi enda hal si mbelin sebab benaken kitik-kitik nari enggo lit 613 undang-undang tertulis si harus ipatuhina. Ritual murihi tan labo hanya persoalen kebersihen, tapi sada keharusen. Ise si melanggarsa erdosa. Tapi Yesus labo terpancing emosi. IbalikenNa tuduhen e alu mulihi nungkun man kalak Farisi ras guru-guru Agama Yahudi, erkiteken enggo ilanggarna ka perentah Dibata alu alasen guna mpertahanken adat istiadat nenek moyang (ay. 3).

Kai si isungkun Yesus lengkap ras contoh konkritna. I ja rusur arah pengajarenna, rikut kalak enda pe ngelakokenca, maka ibahanna alasen mereken persembahen man Dibata guna menghindari tanggung jawabna engkelengi orang tuana. Padahal Tuhan mereken perentah, hamati orang tuandu, termasuk mpekena-kena asum orang tuanta enggo metua. Kalak enda make alasen persembahen guna menghindari (mengabaikan) tanggung jawab man orang tuana. Alasen si deban si rusur iban, la banci nampati kalak musil, sebab senna enggo ipake guna nggalari persepuluhen. Padahal situhuna lit denga senna si banci ipakena guna nampati kalak musil.

Banci siidah, maka si ilakoken kalak Farisi e me kemunafikan (bdk. Mas. 29:13). Kai si ilakoken kalak enda erbahanca sia-sia ibadah si ilakokenna. Padahal situhuna, ibadah yang sungguh-sungguh adalah mperdiateken anak-anak melumang ras diberu mbalu-mbalu (bdk. Jakup 1:27). Ibadah yang berkenan di hadapan Tuhan ibenaken alu ketulusen, la pura-pura (munafik), terjadi perubahen biak ku si mehuli ras nggeluh i bas kekelengen. Selain munafik, kalak Farisi ras Guru-guru Agama ndai njadiken adat istiadat palas guna ndarami kesalahen kalak bage pe guna membenarkan perbahanenna si menguntungken dirina. Sebalikna, Yesus menghormati adat istiadat Yahudi si labo bertentangen ras Kata Dibata, janah ngajuk gelah ngelakokenca alu kesadaren kerna maknana janah tetap ersukuten man Tuhan Dibata (ay. 8-9). 

Pengkenaina

Secara teologis palas si ipake nandangi budaya entah pe adat istiadat Karo i bas Gerejanta e me sikap transformatif, Kristus memperbaharui kebudayaan (Christ and Culture, H. Richard Niebuhr). Secara praktis melala bentuk-bentuk budaya Karo si enggo melalui “saringan teologis” Kristus memperbaharui budaya, ertina labo kerina bentuk budaya Karo ialoken i bas Gerejanta.

I bas si e tentuna patut kita ngataken bujur man Dibata erkiteken sedekah enda GBKP enggo berupaya menerangi budaya Karo alu terang Kristus. Janah sada prinsip si pasti i bas hubungen antara adat budaya ras kiniteken man Yesus Kristus, e me kiniteken man Yesus Kristus si jadi patoken entah pe standar i bas menerangi entah pe men-transformasi budaya. Konfesi GBKP kerna Budaya (Bab VI) ngatakenca: “Kami percaya, bahwa: Budaya adalah keseluruhan cipta, karya dan karsa manusia yang berakal budi. Oleh karena itu, dalam terang firman Allah, manusia harus menggali, mengembangkan dan melestarikan budaya secara positif, kreatif, kritis dan realistis untuk kesejahteraan manusia (1 Kor. 9:20-21; Yoh. 13:1-20).”

I bas PJJ-ta sendah iajuk kita gelah tetap terus melestarikan budaya Karo, khususna budaya Karo si enggo iterangi alu Kata Dibata. Enda akap kami erti tema PJJ-ta sendah “Ngergaken Kata Dibata arah ndalanken adat.” Emaka mari radu ras silestariken budayanta janah sipakeken budayanta jadi media er-Berita Si Meriah. Ula sempat siusih kalak Farisi si makeken adat istiadat guna ndarami kesalahen kalak si deban, apai ka guna keuntungen pribadina. I bas konfesi-nta ndai jelas maka i bas kita melestarikan budayanta lit i je unsur-unsur terus menggali, mengembangkan budaya secara positif, kreatif, kritis dan realistis guna kiniulin kalak si enterem. Enda akap kami salah sada bentuk penghormatenta man orang tuanta, e me ngelakoken pedah-pedahna. Janah i bas dampar si deban tetap kita ersukuten ras erkiniteken man Dibata i bas Yesus Kristus.