SUPLEMEN PA MAMRE GBKP TGL. 10 - 16 MEI 2026

Pdt. Larena Sinuhadji (Nd. ReyRapha Tarigan)

PA Bersama Kategorial : Tetap Ersembah Man Tuhan

Ogen : Pilipi 4:10-13

Tema : ENGGO NDATKEN RAHASIA NGGELUH

Tujun : Gelah Mamre :

1) Ngangkai rahasia nggeluh Paulus seh maka ngasup ia tetap ngataken bujur

2) Ngidah kekurangenta sedekah enda ibandingken Paulus dingen ertekad guna pekenasa i bas paksa si pas dingen nuriken ketahanen keluarga si iarapken kita

Metode : Sharing Kelompok

Penaruh

Ngaloken keadaan geluh uga litna biasana labo murah. Ula lebe ngataken bujur man Dibata, ngaloken keadaan geluhta pe maun-maun buen kita jungut-jungut. Apai ka i bas jaman medsos si gundari enda. Mbelin kel kecenderungen guna membanding-bandingkan keadaan geluhta ras keadaan geluh kalak. Adi siidah bagi si sukses geluh kalak i bas medsos, umpamana, minter stres kita. Sisalahken ka kalak si deban erkiteken kurang sukses siakap geluhta si gundari enda. I bas kesempaten enda radu ras kita mulihi erlajar arah Paulus nari, uga carana gelah tetap ngasup kita ngataken bujur man Dibata i bas keadaan si kugana pe. 

Mpebagesi Ogen

Rasul Paulus si majekken Perp. Pilipi, enda banci sioge i bas Perb. Rasul 16:12-40 ras Pil. 4:15-17. Erkiteken si e, lit hubungan si ndeher, antara Paulus ras Perp. Pilipi. Hubungen si ndeher e teridah arah dukungen si luar biasa i bas Perp. Pilipi nari man Rasul Paulus i bas pelayanenna (Pil. 1:5; 4:15-17). La lit persoalen si serius i bas Perp. Pilipi, maka isi surat Paulus e ertujun guna memelihara hubungen si mehuli gelah reh ulina sekaligus mpegegehi perpulungen gelah tetap paguh erkiniteken man Yesus Kristus amin pe melala tantangen (ay. 11-12). 

Secara khusus ogenta sendah, termasuk ku bas bagin pendungi surat, alu judul perikop “Pengataken bujur.” I bas terj. Bhs. Ind., nina, “Terima kasih atas pemberian jemaat.” Judul i bas Bhs. Ind., nari akap kami lebih tangkas maka perikop enda ngerana secara khusus kerna pengataken bujur Paulus man Perp. Pilipi si enggo mendukung pelayanan Paulus alu pemere-pemere si sifatna materi. Benaken ay. 14-20 teridah maka dukungen si isehken Perp. Pilipi labo terjeng ertoto ngenca, entah pe dukungen moril, tapi pe dukungen secara materi. I jenda teridah maka Paulus pe ngaloken penampat-penampat si sifatna materi arah perpulungen nari. Tujunna tentu labo guna mpebayak diri sendiri, tapi guna keperlun-keperlun pelayanenna pembarken Berita Si Meriah. Amin pe mungkin lit keperlun-keperlun pribadi Paulus, tek kita maka beluh Paulus ngaturkenca alu mehuli seh makana ia pe labo kekurangen, tapi labo ka kelebihen. Cukup kerinana.

Ay. 10 encihdahkenca secara tersirat maka mbaru denga ialoken Paulus penampat arah Perp. Pilipi nari. I bas si e mbelin kel keriahen si igejapken Paulus. Tek ia maka penampat si isehken Perp. Pilipi e erkiteken persadanna ras Kristus. Iteh Dibata kai si jadi keperlun pelayanen Paulus, seh maka ibahan Dibata Perp. Pilipi nginget Paulus kenca enggo piga-piga ndekah la lit komunikasi.

Ay. 11-13 akap kami enda sada pengajaren si isehken Paulus man Perp. Pilipi kerna teologia keugaharian. I bas ay. 11-12a ikataken Paulus, “aku enggo erlajar encukupken alu kai si lit i bas aku. Kueteh nge kai ertina nggeluh i bas kekurangen janah kai ertina nggeluh i bas kelebihen.” Ertina i bas membangun teologia ugahari enda labo murah, lit proses erlajar si cukup gedang, seh makana iteh Paulus ertina nggeluh i bas kekurangen entah kelebihen, janah ngasup Paulus encukupken diri alu kai pe si lit i bas ia.

I bas ay. 12b-13 ikataken Paulus kai rahasiana seh makana ngasup ia encukupken diri alu kai pe si lit i bas ia, janah ngasup Paulus ngalaken kerina keadaan? E me erdandanken kuasa si ibereken Kristus man bana. Enda akap kami si pentingna i bas PA-nta sendah. Selain nggit Paulus erlajar, la iandalkenna gegeh beluhna guna encukupken kebutuhenna, bage pe i bas ia ngalaken kerina keadaan, tapi tuhu-tuhu ia ernalem man Dibata. I bas si e pe akap kami, secara tersirat, iajuk Paulus Perp. Pilipi gelah nggit erlajar encukupken diri, janah si pentingna kel, tuhu-tuhu ernalem man Dibata gelah ipengasup Dibata ngalaken erbage-bage keadaan.

Versi Audio silahkan klik : https://youtu.be/flPQ5OuiARg

Pengkenaina

PA-nta sendah ngajuk kita, khusus kam kerina Mamre kami, gelah tetap ngataken bujur i bas kerina keadaan. Janah nggit kita erlajar mencukupkan diri bagi si enggo iteladanken Paulus. Sada hal penting si harus sisedari e me, labo sada jaminen maka geluh kalak si erkiniteken e pasti aman dan nyaman. Tapi si jadi jaminen kepastian e me penemani Dibata i bas ngalaken erbage-bage keadaan kegeluhen kalak si tek. Emaka i bas si e, erlajar kita arah Paulus nari.

Si pemena e me kerna kiniersadanna ras Dibata i bas Yesus Kristus. Arah persadanta ras Dibata, tek kita maka Dibata tuhu-tuhu engkelengi kita, iperdiateken Dibata kegeluhenta, janah alu cara Dibata si la terantusi kita, icukupken Dibata kerina si jadi kebutuhenta. Arah persadanta ras Dibata, erbahanca kita megenggeng ras megegeh ngalaken erbage-bage tantangen kegeluhen.

Si peduaken, iajuk Paulus gelah nggit kita erlajar nggeluh encukupken diri alu kai pe si lit i bas kita. I bas si e, hal si penting si harus silakoken kita e me lalap ngataken bujur man Dibata i bas kai pe si enggo ipercayaken Dibata man banta. Keluarga, pendahin, pelayanen, rsd.-na. Ula sibanding-bandingken pemere Dibata man banta ras pemere Dibata man kalak si deban. Sebab iteh Dibata kengasupenta masing-masing i bas mengelola kerina si iberekenNa man banta. Pindolah kepentaren ras pemeteh i bas Dibata nari, gelah ipengasupNa kita mengelola alu mehuli kerina si enggo ipercayakenNa man banta. Em tandana kita enggo ndatken rahasia nggeluh bagi si idatken Paulus, e me geluh ernalem man Dibata.