SUPLEMEN PJJ GBKP TGL. 14 - 20 SEPTEMBER 2025

Pdt. Larena Sinuhadji (Nd. ReyRapha Tarigan)

PERDIATEKEN RAS PATUHI UNDANG-UNDANG TUHAN

Josua 1:7-9 (Garis-garis Besar Pelayanan GBKP)

Penaruh

Lit sada artikel menarik i bas situs kumparan.com nari alu judul “Mengapa masyarakat Indonesia sulit mematuhi hukum?” Salah sada penyebabna nina, faktor pendidikan, enterem denga masyarakat Indonesia si la ndatken pendidikan si cukup, erbahanca la iangkana kerna hukum-hukum entah pe aturen-aturen si berlaku. Arah artikel enda nari banci ikataken maka tingkat pendidikan menentukan kepatuhan nandangi hukum entah pe aturen si berlaku, amin pe labo sada jaminen kalak si meganjang tingkat pendidikenna taat hukum.

I bas kesempaten enda radu ras kita erlajar kerna pemeteh ras kepatuhen nandangi Undang-undang Tuhan, bage pe i bas rangka sub tema Garis-garis Besar Pelayanan GBKP si mbaru. 

Mpebagesi Ogen

Teks ogenta sendah lit i teruh judul perikop, “Perentah Dibata man Josua lako naluken Kanaan.” Ituriken maka bangsa Israel lit i bas masa transisi kepemimpinen, Musa nari ku Josua. Musa la banci bengket ku taneh Kanaan, e maka Josua si sedekah e jadi pembantu Musa, mimpin bangsa Israel bengket ku Kanaan. Emaka kenca enggo mate Musa, isuruh Dibata Josua guna mimpin bangsa e mengketi Kanaan. Perentah Dibata tangkas maka enggo ibereken Dibata kerina taneh i Kanaan, janah la lit ise pe si ngasup naluken Josua erkiteken la ndigan pe itadingken Dibata Josua. Tetap ikawali Dibata Josua bagi Dibata enggo engkawali Musa.

Lit dua hal si akap kami banci jadi fokus i bas PJJ-ta sendah. Si pemena, lit telu kali kata-kata “tetap ukur ras tek” (ay. 6, 7, 9). Amin pe la ituriken uga respon Josua nandangi perentah Dibata, tapi teridah secara tersirat maka lit kebiaren i bas diri Josua, kuatir, bimbang dan ragu. Ngasup nge aku naluken bangsa Kanaan? Mungkin e nge si jadi kebiaren Josua. Emaka ipetetap  Dibata ukur Josua seh makana la aru atena ras  la mbiar  janah tek Josua maka la lit ise pe si ngasup naluken adi Dibata ras ia. Adi sioge Kitab Josua seh dung, terbukti maka janji Dibata e, ya dan amin!

Si peduaken, adi sioge ay. 8, lit je perentah Dibata gelah terus ipelajari Josua Kata Dibata suari ras berngi. Labo terjeng ipelajari tapi si pentingna e me patuh nandangi Kata Dibata gelah sangap ras seh sura-sura Josua. Enda akap kami salah sada hal si penting si erbahanca Josua tetap ukur i bas ndalanken kerina si iperentahken Dibata man bana selaku ia pemimpin paksa si e. Adi sioge Kitab Yosua seh dung, terbukti maka Yosua enda salah sada pemimpin si mehuli. Labo terjeng ngasup ia mimpin bangsa Israel, ngasup ka ia mimpin keluargana erkiniteken man Dibata. Maka lit pengakuan Josua sope ia mate, “adi aku ras isi jabungku Tuhan saja ngenca isembah kami.” (Josua 24:15b).

Pengkenaina

Tema i bas PJJ-ta sendah “Perdiateken ras patuhi Undang-undang Tuhan,” alu fokus si deban e me kerna Garis-garis Besar Pelayanan (GBP) GBKP.

I bas bagin Pendahuluan Buku GBP-nta itulisken maka, “GBP GBKP 2026-2030 dirancang sebagai langkah awal dalam mewujudkan visi besar GBKP tahun 2045 di mana GBKP menghidupi visi sendiri, “GBKP menjadi keluarga Allah yang diutus mengerjakan misi Allah di dunia bagi seluruh ciptaan” (Mar. 16:15, 1 Pet. 2:9-10), sekaligus menghidupi visi Indonesia emas. Maka diharapkan pada tahun 2045 GBKP telah menjadi Gereja yang Misional, Relevan, dan Transformatif untuk menyatakan rahmat Allah kepada dunia.”

GBP GBKP 2026-2030 berfokus pada lima relasi spiritual (5R)

1. 2026: R1- Relasi dengan Tuhan (Nandai Dibata): Menguatkan spiritual Jemaat melalui doa, ibadah dan kedekatan dengan Allah.
2. 2027: R2 - Relasi dengan diri sendiri (Nandai Diri): Membantu Jemaat mengenali indentitas dan panggilan mereka sebagai ciptaan Allah.
3. 2028: R3 - Relasi dengan keluarga (Nandai Jabu): Mendorong Jemaat untuk menjadi saksi kasih Allah melalui pelayanan kepada sesama.
4. 2029: R4 - Relasi dengan orang lain (Nandai Teman): Mendorong Jemaat untuk menjadi saksi Allah kepada dunia.
5. 2030: R5 - Relasi dengan cipataanNya (Nandai TinepaNa): Menanamkan tanggung jawab untuk menjaga dan melestarikan ciptaan Allah.

GBP menjadi alat bantu man kerina Serayan Tuhan rikut ras perpulungen i bas kerina wilayah pelayanen guna meteh fokus pelayanen tiap tahunna ras kai-kai saja si harus jadi perayakenta ras. Gelah ula tahun berganti tapi program si menjadi sasaran tetap seri (copy paste) ras tahun si enggo berlalu. Piah dungna kai si man arapenken la tercapai. Sebab berdasarken hasil penelitian Litbang GBKP, 8% denga kita si make GBP sebage palas ras acuan erbahan program. Alu bage, la banci lang rikutken bahan PJJ-nta maka kerina kita harus mperdiaken ras matuhi “undang-undang” si enggo isepakati, secara khusus GBP enda. Kerina serayan ras perpulungen berkomitmen guna mencapai sasaren pelayanen. E maka sosialiasi, diskusi, ceramah harus ilakoken terus-menerus. Si melawenna bulan Oktober tahun enda, enggo harus ilakoken sosialisasi ras penyusunan program guna sasaren pelayanen tahun 2026 si menfokusken ku bas relasi dengan Tuhan (nandai Dibata). Adi la kita setia ndalanken GBP-nta (“undang-undang”), labo terjeng keputusen Gerejanta la sidalanken tapi situhuna la kita patuh man Tuhan Dibata. Sebab GBP e me ulih keputusen persidangen, si tek kita maka i je pe Tuhan erdahin.

Bagi si enggo tersinget i bas bagin penaruh i datas, salah sada syarat kepatuhen e me nggit erlajar. Mperdiateken seri ertina ras nggit erlajar. Adi tutus kita erlajar kerna Kata Dibata bage pe GBP GBKP, turah me kepatuhen i bas dirinta. Adi enggo patuh kita, setia ngelakoken Kata Dibata si tertuang i bas GBP GBKP, la banci lang kesangapen jadi sikerajangenta (GBKP). GBKP reh majuna, paguh kiniteken perpulungenna. I bas tahun 2026, mari radu ras sitotoken gelah relasinta ras Dibata reh paguhna. GBKP tuhu-tuhu jadi pasu-pasu man isi doni enda. Dibata si mpegegehi kita kerina.