SUPLEMEN PJJ GBKP TGL. 21-27 SEPTEMBER 2025

Pdt. Larena Sinuhadji (Nd. ReyRapha Tarigan)

TUHAN NGANGKAT PENJAGA BANGSA-NA - Esekiel 3:16-21

(Serayan)

Penaruh 

Rikutken informasi AI nari nina, “Tugas penjaga adalah menjaga keamanan, ketertiban, dan kebersihan suatu tempat, yang bisa berupa lingkungan sekolah, gedung, fasilitas umum, atau lapangan olah raga. Tugas umum seorang penjaga meliputi patroli rutin, mengawasi keluar masuk orang dan kendaraan, memelihara barang milik tempat tersebut, serta melaporkan atau mengatasi gangguan keamanan dan ketertiban.” I bas mengatasi gangguan keamanan dan ketertiban, salah sada tugas si harus ilakoken e me kap memberi peringatan man ise pe si atena mengganggu keamanan, ketertiban, ras kenyamanan.

I bas kesempaten enda radu ras kita erlajar kerna penjaga si iangkat Dibata guna mpersingeti bangsaNa erpalasken si man ogenta sendah, ikaitken ras tugas tanggung jawab Serayan i tengah-tengah Gerejanta.

Mpebagesi Ogen

Ogenta sendah lit i teruh judul perikop “Tuhan ngangkat Esekiel jadi si erjaga” i bas terj. TB-LAI nina, “Yehezkiel dipanggil menjadi penjaga Israel.” Arah judul enda mis teridah tugas kai si harus ilakoken Nabi Esekiel i tengah-tengah bangsa Israel. Ise Nabi Esekiel enda? “Esekiel” ertina “Dibata mpegegehi” (Allah menguatkan). Ia tubuh ras mbelin i bas lingkungen keluarga imam si tading i Jerusalem (Ese. 1:3 - Buzi e me sekalak imam rikutken Kamus Haag). Sanga i bas pendidiken denga guna jadi imam reh me bangsa Babil menjajah bangsa Israel, ibaba bangsa Babil Esekiel ras melala kalak Israel si deban ku tanah Babil. I bas usiana si pe-30-ken ialokenna pendilo guna jadi nabi (Ese. 1:2-3). Amin pe ertugas sebage sekalak nabi, Esekiel nggeluh bagi masyarakat biasa si tading i tengah-tengah kalak buangen i tepi lau Kebar (Esek. 1:1; 3:15,24) janah lit jabuna (Esek. 24:18). Esekiel melayani ras meritaken Kata Dibata alu tutus ras setia, kurang lebih 22 tahun ndekahna ia melayani i tengah-tengah bangsa Israel.

Secara khusus si jadi fokus i bas PJJ-ta sendah e me penugasen si ibereken Dibata man Esekiel guna jadi penjaga entah pe si erjaga i tengah-tengah bangsa Israel. Kai si harus ilakoken Esekiel selaku si erjaga? Si utamana e me nehken persinget i bas Dibata nari. Jelas i jenda, persinget i bas Dibata nari, labo i bas Esekiel nari. Ertina Esekiel suruh-suruhen Dibata ngenca. Penyambung lidah Tuhan. Tapi amin bage gia, mereken persinget i bas Dibata nari e labo murah. Engkai maka labo murah? Erkiteken Kata Dibata e me kata si benar. Labo kerina banci ngaloken kata si benar. Umumna kalak adi ipersingeti, labo ngataken bujur malah merawa, merasa tersinggung, merasa terusik, rsd.-na. Emaka melala kalak si sinik saja adi inenna perbahanen-perbahanen si salah, si lepak, entah pe si la sue ras peraten Dibata. Gelah ula gejek. Gelah ula ceda perkade-kaden entah pe pertemanan. Gelah ula merawa. Gelah aman. Rsd.-na. Bage ninta rusur. Ertina tugas tanggung jawab Esekiel e labo murah, bahkan banci ikataken berbahaya, sebab banci jadi lit kalak si munuh ia erkiteken la senang nandangi persinget si isehken Esekiel.

Tapi tangkas perentah Dibata man Esekiel, kata persinget harus isehken man kalak si jahat bage pe kalak si bujur. Man kalak si jahat tujunna gelah jera, bertobat, i bas kejahatenna nari. Man kalak bujur tujunna gelah ula erbahan dosa. Arah kata persinget si isehken Esekiel, kalak jahat bage pe kalak bujur jadi terkelin erkiteken bertobat i bas kejahatenna bage pe la nari erbahan dosa. Adi enggo ipersingeti tapi la bertobat, janah terus erbahan dosa, maka tanggung jawab e enggo lanai man Esekiel, tapi man si bersangkuten. Keterkelinen ibereken Dibata man Esekiel adi idalankenna tugas tanggung jawabna selaku penjaga si nehken kata persinget i bas Dibata nari.

Versi Audio Silahkan Klik : https://youtu.be/qxq_hA0wkgE

Pengkenaina

Erpalasken 1 Pet. 2:9, situhuna kerina kalak si tek bertanggung jawab guna nehken persinget erpalasken Kata Dibata. Tapi i bas kesempaten enda fokus kita ku Serayan GBKP. Rikutken Tata Gereja GBKP (Tata Dasar Pasal 10), serayan e me pelayan khusus: pendeta, pertua, diaken, ras emeritus (Pdt./Pt./Dk.). Pendeta, pertua, ras diaken adalah pribadi-pribadi yang mendapat panggilan khusus dari Allah Tritunggal menjadi pelayan khusus yang berintegritas dalam kehidupannya sehari-hari. Tugas pendeta ras pertua e me menggembalakan, mengajar dan memberitakan Firman Tuhan kepada keluarga, jemaat, masyarakat, melalui perkataan dan perbuatannya. Tugas diaken e me menggembalakan, mengerjakan diakonia dan memberitakan Firman Tuhan kepada keluarga, jemaat, masyarakat, melalui perkataan dan perbuatannya.

Arah kutipen singkat i bas Tata Gereja nari tangkas maka serayan e me kalak si ndatken panggilan khusus i bas Dibata nari, berintegritas, perkataan dan perbuatannya harus encidahken Kata Dibata, ndahiken tugas-tugasna alu mehuli, baik dahin mengajar ras pelayanen diakonia. Adi rikutken ogenta sendah, Serayan GBKP seri ras Nabi Esekiel, e me penjaga si nehken kata persinget i bas Dibata nari man perpulungen kalak si tek. Penungkunen evaluatif man banta kerina serayan, enggo kin kita ngelakoken tugas tanggung jawabta selaku penjaga si nehken kata persinget i bas Dibata nari alu kai pe resikona? Adi enggo, puji Tuhan! Sipindo terus gegeh i bas Dibata nari gelah ipengasupNa kita ngelakoken kerina tugas tanggung jawab si melekat i bas jabatenta selaku Serayan GBKP. Adi lenga, tentu enda menjadi persinget man banta, maka selaku Serayan GBKP, lit konsekuensi si harus idalanken kita, sebab kita e me pelayan khusus, si labo seri ras pelayan-pelayan si deban.

Penungkunen evaluatif man banta kerina perpulungen, enggo kin kita alu meteruk ukur ngaloken kata-kata persinget i bas Dibata nari erkelangken serayan-serayanNa? Adi enggo, puji Tuhan! Ertina kam kerina enggo ikut muat bagin i bas ngelakoken Kata Dibata. Adi lenga, tentu PJJ-ta sendah ngajuk kam kerina guna menyadari maka salah sada tugas tanggung jawab Serayan GBKP e me mengajar, termasuk je nehken kata-kata persinget i bas Dibata nari. Marilah sidukung Serayan GBKP gelah banci idalankenna tugas tanggung jawabna alu mehuli. Si paling penting, akap kami, mari radu ras sitotoken Serayan GBKP gelah tuhu-tuhu jadi kepanjangen tan Dibata guna mewujudnyataken kerina si jadi peraten Dibata i bas konteks GBKP, janah gelar Dibata semakin termulia.